Onlayn ictimai-siyasi qəzet
Komitə sədri Musa Quliyev Dövlət Sosial Müdafiə Fondunun xərclərindən danışarkən qeyd edib ki, fondun gələn ilə proqnozlaşdırılan ümumi xərclərinin 97%-ni və ya 6 milyard 77 milyon 580 min manatını əhaliyə ödənişlər təşkil edəcək.
Musavat.com-un məlumatına görə deputat fikrinin davamında aşağıdakıları söyləyib: “Əhaliyə ödənişlər üzrə xərclərin 5 milyard 907 milyon 180 min manatı əmək pensiyalarının, 170,4 milyon manatı isə məcburi dövlət sosial sığorta haqları hesabına verilən müavinətlərin hesabına təmin ediləcək. Əhaliyə ödənişlərin 2023-cü il üçün nəzərdə tutulmuş proqnozu 2022-ci ilin təsdiqlənmiş proqnozundan 646,4 milyon manat, yaxud 12% çoxdur. Əmək pensiyalarının orta aylıq məbləği 2020-ci ildə 302 manat, 2021-ci ildə 332 manat təşkil edib, 2022-ci ildə 371 manat təşkil edəcəyi gözlənilir, 2023-cü ildə isə 423 manat təşkil edəcəyi proqnozlaşdırılır. Əmək pensiyasının minimum məbləği anlayışı pensiya təminatı sisteminə 2017-ci ildə daxil edilib. 2017-ci ildə əmək pensiyasının minimum məbləği 110 manat, 2018-ci ildə 116 manat, 2019-cu ildə 200 manat müəyyən edilib, 2022-ci ildə isə bu məbləği 240 manata çatdırılıb”.
M.Quliyev deyib ki, növbəti ildə yaşa görə pensiyanın orta aylıq məbləğinin cari ildəki 399 manatdan 56 manat artaraq - 455 manata, əlilliyə görə pensiyanın 324 manatdan 45 manat artaraq - 369 manata, ailə başçısını itirməyə görə pensiyanın 328 manatdan 46 manat artaraq - 374 manata yüksəlməsi proqnozlaşdırılır: “Əvvəlki illərdə olduğu kimi cari və növbəti illərdə də əvəzetmə əmsalı, yəni orta aylıq pensiya məbləğinin orta aylıq əmək haqqı məbləğinə nisbəti müvafiq olaraq 44,2% və 45,5% olmaqla Avropa Sosial Xartiyasının tələblərinə cavab verəcəkdir. Qeyd edilən əmsal 2018-ci ildə 40,7%, 2019-cu ildə 41,5%, 2020-ci ildə 42,7% olub. Cari və növbəti il üzrə pensiyaların orta aylıq məbləğlərinin artım dinamikası müvafiq olaraq, 11,7 % və 14,1 % səviyyəsində qiymətləndirilir”.
E.Paşasoy,
Musavat.com
11 Oktyabr 2024
ŞƏRHLƏRŞƏRH YAZ