Onlayn ictimai-siyasi qəzet
Məscid sökmək istəyən “iş adamı”, bayrağımızın yaşıl rəngindən xəbərin varmı?
Zaman-zaman dini-mənəvi dəyərlərimizə dil uzadanlar çox olub. Qarabağda 67 məsciddən 65-ni məhv edən erməni vəhşilərinin, ateist sovet rejiminin aqibəti məlum.
“Allaha inanıram, lakin qorxmuram... Əlimdə imkanım olsa, bütün məscidləri söküb yerində məktəb tikdirərəm”.
“Şərurlu İsfəndiyar” kimi tanınan iş adamı İsfəndiyar Axundovun Müsavat.TV-yə dediyi yuxarıdakı sözlər yada ən əvvəl onları – işğalçı ermənilərin və SSRİ-nin acı sonluğunu saldı.
Heyrətə gəlirsən, doğrudanmı bunu özünü müsəlman-türk sayan biri söyləyir? Bu adam nə yeyir, nə içir, özünü hansı əsrdə hiss edir – XXI, yoxsa orta əsrlərdə? Azğından çıxana niyə diqqət eləmir? Cəmiyyətlə nə üçün hörmətsiz davranır? Az öncə Nigar Fərhadın başına gələnlərdən də xəbəri yoxmu?..
Axı sən kimsən ki, namaz əhli olan milyonlarla insanın etiqadına, heysiyayına, millətin mənəvi dəyərinə həqarət edəsən? Sən kimsən ki, məscid sökəsən? Buna hünərin çatarmı? Şəkk-şübhəsiz ki, çatmaz.
Guya xeyirxah iş görmək istəyir. Bir xeyir iş şər niyyətlə görülməz ki. Məktəb tikmək niyyətin varsa, get tik. Nə çox yer, məkan, rayon...
Azərbaycanda, qardaş Türkiyədə yetərinə məktəb də var, məscid də. Biri o birinə maneə sayılmaz. Çünki insanın elmi ilə yanaşı, imanı da olmalı. Əks halda, o natamam şəxsiyyətdir.
Hətta imansız adam, kosmopolit fərd, manqurt təhsilsiz adamdan daha təhlükəlidir. “Vətəni sevmək imandandır” buyurub İslam Peyğəmbəri (ə).
Qarabağ torpaqları məscidlərimizi uçuran, uçurmadıqlarında isə donuz, inək saxlayan erməni vandallarından təzəcə qurtulub. Azad edilmiş ərazilərimizdə Prezident neçə-neçə məscidin bünövrəsini qoyub, neçəsinin təmiri haqda göstəriş verib. Amma bu adam məscid sökmək arzusundadır. Batil niyyət, batil arzu necə olur ki...
Məscidlərimiz həm də bizim kimlik pasportumuz, memarlıq incilərimizdir. Erməni onları həm də buna görə yerlə bir edib ki, türk-müsəlman izlərini silsin, türk-müsəlman kimliyimizi yox eləsin. Bunu anlamaq çoxmu çətin? Sən kimin dəyirmanına su tökürsən?
Barı öz iş stolunun üstünə qoyduğun üçrəngli bayrağa sayğılı ol. Uğrunda on minlərlə şəhid verdiyimiz o bayraqdakı rənglərin mənasını bilirsənmi? Onlardan biri – yaşıl rəng məhz İslamın rəmzidir.
Sən bu dövləti quranlardan, yaşadanlardan, yoxdan bayraq var edən fikir babalarımızdan özünü ağıllımı sanırsan? Azərbaycanda məscid sökmək həm də bayrağımıza tüpürməkdir!
Nəhayət, Allaha inanmaq nə, “Allahın ev”lərinə nifrət nə? İslamda bunun adı bilirsənmi nədir?
P.S. Gerçəkdən də, bir adamın çoxlu pulu ola bilər. Amma mənəvi zənginlik bambaşqa şeydir...
Musavat.com
XƏBƏR LENTİ
05 Aprel 2025
04 Aprel 2025
ŞƏRHLƏRŞƏRH YAZ