Onlayn ictimai-siyasi qəzet
“Keşlə bazarı”nı niyə sökürlər?
Bazarda alver edənlər qəfil qərardan narazıdır və marta qədər möhlət istəyirlər
“Keşlə bazarı”nda işləyən şəxslərə yanvarın 1-dək mallarını çıxarmaq, ərazini təhvil vermək tapşırılıb. Bazarda fəaliyyət göstərən şəxslər isə bu qərardan şikayətçidir.
Məsələ ilə bağlı “Yeni Müsavat”ın əməkdaşı adıçəkilən bazarda olub, vəziyyəti daha yaxından öyrənməyə çalışıb.
Sabirabad rayonundan olan və bu rayondan bazara mal gətirən Amil Qurbanov deyir ki, 8 ildir bazarda çalışır. Bazarın sökülməsi və bununla bağlı malların 10 gün ərzində çıxarılması qərarı onu çətin vəziyyətə salıb: “8 ildir ki, bu bazarda alver edirəm. Azdan-çoxdan işimizi qurmuşduq. Dünən gəlib dedilər ki, bazarı sökəcəklər, mallarınızı yığışdırın. Aidiyyəti qurumlara müraciət edirik ki, bizə vaxt verilsin. Müəyyən müddət ərzində mallarımızı sataq, həm də nisyələrimizi yığışdıraq. Buradakı işçilərin çoxunun nisyələri var. Məsələn, bir işçi var ki, 2 ton nar alıb. Bəs indi nə edəcək? Hamımızın banklara borcu var, hər ay kredit ödəyirik, uşaqları oxutdururuq. İndi necə edəcəyik?”
“Amma yay aylarında bu bazarın söküləcəyi ilə bağlı məlumatlar yayılırdı. Siz bundan xəbərsiz olmuşdunuz” sualına Amil Qurbanov belə cavab verdi: “Doğrudur, yay aylarından bu barədə məlumat var idi. Amma dəqiq vaxt deyilməmişdi. Düşünürdük ki, heç olmasa bir neçə ay əvvəl xəbər edərlər. İndi isə 10 gün vaxt verilib. 10 gün ərzində necə çıxıb gedək? Xahiş edirik ki, bizə mart ayına kimi vaxt versinlər. Sabirabaddan mal gətirirəm. Kənddə çox adama nisyə mal vermişəm. Buradan nisyələrimi yığmalıyam ki, onların pulunu ödəyə bilim”.
22 ildir bazarda işləyən Nəzakət Bəşirova da mart ayına kimi möhlət verilməsini istəyir: “Bizə əvvəlcədən xəbərdarlıq etsəydilər, işimizi bilərdik. İndi isə cəmi 10 gün vaxt verilib. Bu müddət ərzində nə edə bilərik? Xeyli nisyələrim var. Bu vaxt ərzində nisyələrimi necə yığım? Bizə mart ayına kimi vaxt verilsin, başqa yerlə təmin etsinlər. Yol çəkirlər, lap yaxşı, amma bizə də bir yol göstərsinlər. Oğruların, kasıbların sayı artmasın. Burada 2 minə yaxın insan işləyir. İndi görün nə qədər insan və ailə çətin vəziyyətdə qalacaq”.
Saatlı rayonundan olan Anar Əhmədov isə bildirir ki, bir neçə ay əvvəldən xəbərdarlıq edilsəydi, çıxış yolu tapa bilərdi: “Göy-göyərti, qatıq-süd satıb dolanıram. Əvvəlcədən xəbərdarlıq edilsəydi və yer verilsəydi, camaat öz işini bilərdi. Bu bazar camaatın çörək yeri idi. İndi rəhbərlik heç nə demir. Uşağımın biri əsgərlikdədir, başqa heç bir gəlirim yoxdur. Evdə də deyirlər ki, atamız gedir çörəkpulu qazanmağa. İndi nə olacaq? Heç nə...”
Həvagət Məmmədseyidova da Novruz bayramına qədər möhlət istəyir: “20-25 ildir ki, bu bazarda işləyirəm. Tək qadınam. Banklara kredit verirəm, övladlarımı saxlayıram. Heç olmasa, bizə Novruz bayramına qədər möhlət versinlər. Bütün bazar camaatı bunu istəyir. Bizə bir ay əvvəl xəbər etsəydilər, mal almazdıq. İndi isə 10 gün ərzində mallarımızı hara aparaq?”
Əməkdaşımız məsələ ilə bağlı bazar rəsmisi Emin Cəbrayılovla da söhbətləşib. Bazar rəsmisi bildirib ki, aprel ayından Azərbaycan Avtomobil Yolları Dövlət Agentliyindən (AAYDA) bazar rəhbərliyinə məlumat verilib ki, bazar söküləcək və yerində yol çəkiləcək: “Bazar işçilərinin hamısına bu barədə məlumat vermişdik. Onların xəbəri var idi ki, bazar söküləcək. Narazılıq isə əsasən azı bir ay möhlət verilməməsi ilə bağlıdır. Hazırda müddətin uzadılması və işçilərin "Montin", “8 km” bazarlarına köçürülməsi üzərində çalışırıq".
Azərbaycan Avtomobil Yolları Dövlət Agentliyindən (AAYDA) isə “Yeni Müsavat”a açıqlama verilərək bildirilib ki, bazar rəhbərliyinə aprel ayından bəri bir neçə dəfə ərazinin boşaldılması ilə bağlı tapşırıq verilib. Son xəbərdarlıq isə yaxın zamanda edilib: “Bakı şəhərinin perspektiv inkişafı nəzərə alınmaqla Azərbaycan Avtomobil Yolları Dövlət Agentliyi tərəfindən Həsən Əliyev küçəsindən Ziya Bünyadov prospektinə paralel olaraq "Koroğlu" metro stansiyasına qədər yeni avtomobil yolunun tikintisinə start verilir.
Layihənin xüsusi dövlət əhəmiyyəti nəzərə alınmaqla, Heydər Əliyev prospektində və Ziya Bünyadov prospektində nəqliyyat vasitələrinin sıxlığının azaldılması və hərəkətin təhlükəsizliyinin təmin edilməsi nəzərdə tutulur.
Layihənin əsas üstünlükləri Həsən Əliyev küçəsinin davamı olaraq Yusif Vəzir Çəmənzəminli küçəsinə düzxətli davam etməklə şərq hissədə Ələsgər Qayıbov və Xəlil Rza Ulutürk küçələrinə birləşdirilməsi nəticəsində Təbriz küçəsi ilə Ağa Nemətulla və Əhməd Rəcəbli küçələrinin kəsişmələrində və Metronun “Nərimanov” stansiyası ətrafında müşahidə olunan nəqliyyat sıxlığı azalmış olacaq, habelə “Gənclik” və “Nərimanov” metro stansiyaları ətrafındakı ərazilərdən “Koroğlu” metro stansiyası istiqamətində hərəkət edən nəqliyyat vasitələrinin fasiləsiz yerdəyişmələrinin təmin edilməsinə şərait yaradılmış olacaq.
Eyni zamanda qeyd edilən yeni yol birləşməsinin yaradılması nəticəsində “Gənclik” və “Nərimanov” metro stansiyaları ətrafındakı ərazilərdən “Koroğlu” metro stansiyası istiqamətində və yaxud əks istiqamətlər üzrə Heydər Əliyev prospekti vasitəsilə yerinə yetirilən nəqliyyat yerdəyişmələrinin azalması və Heydər Əliyev prospektinə alternativ hərəkət marşurutunun yaradılması hesabına Hedər Əliyev prospektinin yan yolu üzrə müşahidə olunan tıxac hallarının minimumlaşdırılması təmin ediləcək.
Həmçinin qeyd edilən birləşməsinin yaradılması nəticəsində şəhərin şərq və mərkəzi qərb periferiyaları arasında Heydər Əliyev və Ziya Bünyadov prospektlərinə paralel və həmin prospektlərin mərkəzi aralığında yerləşən yeni yaşayış massivlərinə alternativ birbaşa nəqliyyat bağlantısının yaradılması təmin ediləcək.
- Yolun ümumi uzunluğu: 3896 metr;
- Yolun dərəcəsi: şəhər əhəmiyyətli magistral küçə;
- Hərəkət zolağının sayı: 6 zolaqlı;
- Hərəkət zolaqlarının eni: 3.5 m;
- Tunellərin sayı: 4 ədəd;
- Yeraltı piyada keçidlərinin sayı: 3 ədəd".
Xalidə GƏRAY,
Fotolar müəllifindir
“Yeni Müsavat”
XƏBƏR LENTİ
20 Dekabr 2024
ŞƏRHLƏRŞƏRH YAZ