Onlayn ictimai-siyasi qəzet
İranda kimyəvi təhlükə: Partlayışdan sonra fövqəladə vəziyyət elan olundu
İranın Hörmüzqan vilayətinin Bəndər-Abbas şəhərindəki Şəhid Rəcai Limanında baş verən güclü partlayışdan sonra bölgədə fövqəladə vəziyyət elan edilib.
Zəhərli qazlar yayıldı
Musavat.com xəbər verir ki, İranın Səhiyyə Nazirliyi partlayış nəticəsində havaya ammiak, kükürd dioksidi və azot dioksidi kimi təhlükəli maddələrin yayıldığını təsdiqləyib. Qurum fövqəladə hallara müdaxilə qruplarının dərhal təşkil olunması barədə göstəriş verib.
Sakinlərə xəbərdarlıq edildi
Sakinlərə evlərində qalmaq, açıq hava fəaliyyətlərindən uzaq durmaq və pəncərələri qapalı saxlamaq tövsiyə olunub. Xüsusilə risk qrupunda olan şəxslərə – tənəffüs və ürək xəstəlikləri olanlara, uşaqlara, hamilə qadınlara və yaşlılara N95 və P2 tipli qoruyucu maskalar taxmaq məsləhət görülüb. Eyni zamanda tez-tez üz yumaq və qoruyucu geyimlərdən istifadə etmək tövsiyə edilib.
Partlayışın səbəbi açıqlandı
İlkin araşdırmalara görə, partlayış limanda düzgün saxlanılmayan təhlükəli kimyəvi maddələr, xüsusən də raket yanacağı istehsalında istifadə olunan natrium perxlorat səbəbilə baş verib. Hazırda hadisə ilə bağlı genişmiqyaslı araşdırma aparılır.
Yanğın hələ də davam edir
Bölgədə yanğın tam nəzarət altına alına bilməyib və alovun intensivliyi artır. Rəsmi məlumatlara əsasən, partlayış nəticəsində azı 8 nəfər həyatını itirib, 750-dən çox insan isə müxtəlif dərəcəli xəsarətlər alıb.
Toğrul İSMAYIL,
Musavat.com
XƏBƏR LENTİ
27 Aprel 2025
26 Aprel 2025
ŞƏRHLƏRŞƏRH YAZ