Onlayn ictimai-siyasi qəzet
İpoteka marafonu, 2025-ci ildə 5 minə yaxın vətəndaş...
Əmlak eksperti: “İlkin vəsaitin 15 faizini toplaya bilməyən vətəndaşlar üçün kirayə mənzillərin satışı mexanizmi daha sərfəlidir”
2024-cü ilin sonuna olan məlumata görə, ümumilikdə ölkə üzrə verilmiş ipoteka kreditlərinin həcmi - 4,7 milyard manat təşkil edib ki, onun da 3,3 milyard manatı və ya 81,4 faizi dövlət xətti ilə verilmiş kreditlərin payına düşüb. Bu günə olan məlumata görə, fondun vəsaiti hesabına verilmiş ipoteka kreditlərinin həcmi 3,4 milyard manatı keçib.
İpoteka və Kredit Zəmanət Fondundan (İKZF) verilən məlumata görə, bu günədək fondun həyata keçirdiyi ipoteka kreditləşməsi və satmaq öhdəliyi ilə kirayə mexanizmi vasitəsilə 60 min 549 ailə özünün mənzil şəraitini yaxşılaşdırıb. O cümlədən 53 min 785 ipoteka krediti verilib və 6764 vətəndaşla satmaq öhdəliyi ilə kirayə müqaviləsi bağlanılıb. Fondun yaşayış maliyyəsi alətləri vasitəsilə mənzil şəraitini yaxşılaşdırmış ailələrin 70 faizə yaxını gənclərdir.
Qeyd edək ki, İpoteka və Kredit Zəmanət Fondu (İKZF) satmaq öhdəliyi ilə kirayə mexanizmi çərçivəsində Bakı şəhəri, Binəqədi rayonu, Cəfər Xəndan küçəsində yerləşən yaşayış kompleksində 213 yeni, tam təmirli mənzili vətəndaşlara təqdim edir.
Fonddan o da bildirilib ki, yaşayış sahələri 1, 2 və 3 otaqlı olmaqla, aylıq ödənişləri 954 manatdan başlayır.
Yaşayış sahələri çoxmənzilli bina kompleksində yerləşir və yüksək keyfiyyətli tikinti materialları ilə müasir dizaynda təmir edilib. Mənzillər elektrik enerjisi, qaz və su ilə tam təchiz olunub. Kompleks geniş həyətyanı sahəyə və yeraltı qaraja malikdir. Həyətyanı sahədə sakinlərin istirahəti üçün şərait yaradılıb, müxtəlif idman qurğuları, uşaq oyun meydançası quraşdırılıb. Ərazidə uşaq bağçası və məktəb mövcuddur. Metronun “Dərnəgül” stansiyasından 50 metrlik məsafədə yerləşən kompleksin yaxınlığında, həmçinin avtobus dayanacağı və digər zəruri infrastruktur mövcuddur.
Yeni mənzillər vətəndaşların seçimi üçün 8 aprel 2025-ci ildən etibarən açıq olacaq. Müraciətlərin qəbulu və mənzil seçimi Elektron hökumət portalına (e-gov.az) inteqrasiya edilmiş Elektron ipoteka və kredit zəmanət sistemi üzərindən həyata keçirilir.
Vüqar Bayramov
Xatırladaq ki, Milli Məclisin deputatı Vüqar Bayramov parlamentin martın 7-də keçirilən plenar iclasında Azərbaycanda güzəştli ipoteka kreditlərinin maksimum məbləğinin artırılmasını təklif edib. Onun sözlərinə görə, bu il ipoteka kreditlərinin verilməsi üçün dövlət büdcəsindən əlavə 100 milyon manat ayrılacaq: “Dövlət büdcəsindən ayrılan bu vəsaitlər daha çox sosial ipoteka kreditlərinin maliyyələşdirilməsi üçün istifadə olunur. 2025-ci ildə 5 minə yaxın vətəndaşımız ipoteka hesabına mənzil sahibi ola biləcək. Güzəştli ipoteka kreditləri maksimum məbləğ 100 min manat olmaqla 4 faizlə 30 il müddətinə təklif olunur. Mövcud bazar qiymətlərini nəzərə alaraq güzəştli ipoteka kreditlərinin maksimum məbləğinin 100 min manatdan 150 min manatadək artırılması məqsədəuyğun olardı”.
Elnur Azadov
Əmlak məsələləri üzrə ekspert Elnur Azadov “Yeni Müsavat”a şərhində bildirdi ki, güzəştli şərtlərlə təklif olunan mənzillərin sayı az, müraciətlərin sayı isə çox olur. Ekspertin sözlərinə görə, ilkin vəsaitin 15 faizini toplaya bilməyən vətəndaşlar üçün isə kirayə mənzillərin satışı mexanizmi daha sərfəlidir: “Son illər daşınmaz əmlakın qiyməti təxminən 50 faiz bahalaşıb. Aztəminatlı vətəndaşların yığım kapitalı isə ümumi məbləğin 15 faizi qədərində vəsait toplaya bilmək üçün yetərli olmadığına görə kirayə mənzillərin satışına tələbat artıb. Müraciət çox olsa da, mənzil seçimi geniş deyil. Satmaq öhdəliyi ilə kirayə mexanizmində vətəndaş mənzildə kirayə qalır, müddət bitdikdən sonra, ən azı 20 il sonra mülkiyyət onun adına keçir. Əgər vətəndaşın ödənişlə bağlı problemi yaranarsa, ödədiyi vəsait ləğv edilir. Adi ipotekada isə bu risk yoxdur. Vətəndaş ödəniş edə bilmədiyi halda mənzil satışa çıxarılır, ödənilən pulun bir hissəsi saxlanılır, əsas hissəsi isə qaytarılır”.
Nigar HƏSƏNLİ,
“Yeni Müsavat”
XƏBƏR LENTİ
04 Aprel 2025
03 Aprel 2025
ŞƏRHLƏRŞƏRH YAZ