Onlayn ictimai-siyasi qəzet
Fransadan Xocalı qatilinin hesabına 2 milyon köçürülübmüş
Xocalı soyqırımının fəal üzvü Bakıda hakim qarşısına çıxarıldı - Fransadan 2 milyon avro alıb; qadın-uşaqları güllələyərkən qəhqəhə çəkib gülürdük!!!
Bakının Sabunçu Rayon Məhkəməsinin binasında Füzuli Hərbi Məhkəməsinin hakimləri Raşid Beqlaryanın cinayət işi üzrə məhkəmə araşdırması aparır.
Musavat.com xəbər verir ki, Raşid Beqlaryan Xocalı soyqırımının törədilməsində iştirak etməkdə ittiham olunur. Azərbaycanlı istintaqçıların əlinə Raşid Beqlaryanın vaxtilə öz əli ilə yazdığı sənədli mətn keçib. Həmin mətndə Raşid Beqlaryan Xocalıda soyqırımı törədilməsini xırda detallarına qədər qələmə alıb. Ağlına belə gəlməyib ki, əlyazması onun və əli Xocalıda Azərbaycan vətəndaşlarının qanına batan özü kimi qatillərin ittiham aktının əsasını təşkil edəcək. Bu gün, 2024-cü il iyunun 7-də o, hakim qarşısına sülh və insanlıq əleyhinə və digər ağır cinayətlərin törədilməsinə görə çıxarılıb.
Hakim Əli Süleymanovun sədrliyi ilə keçirilən prosesdə dövlət ittihamının müdafiəsi Respublika Hərbi Prokurorluğunun dövlət ittihamının müdafiəsi şöbəsinin prokuroru Fuad Kazımova həvalə olunub.
Ermənistan vətəndaşı Raşid Beqlaryan ötən ilin yayında Azərbaycan-Ermənistan dövlət sərhədinin Laçın rayonunun Zabux kəndi ərazisindən keçən hissəsində dövlət sərhədini qanunsuz keçərkən həbs edilib. Onun cinayət işi üzrə istintaq Dövlət Təhlükəsizliyi Xidmətinin (DTX) İstintaq Baş İdarəsi tərəfindən aparılıb.
Beqlaryan Xocalı soyqırımının törədilməsi ilə bağlı istintaqa önəmli məlumatlar verib. O, 1992-ci ilin fevralın 26-da özünün də daxil olduğu silahlı birləşmələr tərəfindən 200 nəfərə kimi mülki azərbaycanlını xüsusi amansızlıqla güllələdiklərini etiraf edib. Müvafiq şəxslər cinayət işi üzrə zərərçəkmiş qismində tanınıb.
Beqlaryan məhkəmədə dövlət hesabına vəkil və tərcüməçi ilə təmin edilib, hakim onun qanunla nəzərdə tutulan hüquqlarını izah edib.
Beqlaryanla bağlı istintaq zamanı başqa maraqlı məqamlar da üzə çıxıb. Məlum olub ki, Fransa Respublikasından onun hesablarına 2 milyon avroya yaxın pul köçürüb. Özünün iddiasına görə tutulanadək Fransada yaşayan bəzi şəxslər həmin pulu ona kömək məqsədi ilə ianə ediblər.
Beqlaryanın Xocalı faciəsi vaxtı iştirak etdiyi və şahidi olduğu cinayətlərinə gəlincə, o, həmin vaxt baş verənləri özünün “Beqlaryanın döyüş yolu” adlı sənədli mətnində (Azərbaycanda tutulanadək) ətraflı qeyd edib.
Beqlaryan həmin sənədli mətndə yazır ki, döyüş yoluna Murad Petrosyanın rəhbəri olduğu 3-cü dəstədən başlayıb, həmin dəstənin tərkibində döyüşüb, komandirin tapşırıqlarını icra edib. Etiraf edib ki, həmin dəstə Ağdam-Şuşa yolundakı körpünü partladıb, türklərin kalonlarını məhv edib. Sonradan özü dəstə komandiri olub. Xocalı və Xocəvənddə gedən döyüşlərdə 4 dəfə yaralanıb. Döyüşlərdən sonra ona “Vətənin müdafiəsi” medalı verilib.
İstintaq dövründə əməllərini etiraf edən Beqlaryan məhkəmədə Xocalı faciəsi ilə bağlı bəzi məqamları dostu Seqo Doluxanyandan eşitdiyini deyib. İstintaq vaxtı deyib ki, Seqo Doluxanyan Əsgəran bölüyünün döyüşçüsü olub. Xocalı faciəsinin törədiləcəyini də o deyib:
“Seqo dedi, göstəriş var ki, azərbaycanlıları güllələyək. 50-60 nəfər hücum üçün hazır vəziyyətdə idi. Həmin vaxt biz hamımız Qarabağ azərbaycanlılarına nifrət edirdik, tapşırıq olmasa belə öldürməyə hazır idik”.
Hakim sənədləri tədqiq edərkən Beqlaryanın Xocalı soyqırımının törədilməsi haqda etiraflarını elan edib. Beqlaryan həmin faciəli 26 fevralı özü də dəhşətli gün adlandırıb: “Dəhşətli mənzərə idi. Həmin gün azərbaycanlılar bir yerə toplaşdığı vaxt onları güllələməyə başladıq. Bəziləri meşəyə qaçmağa çalışsa da, onların çoxunu tapıb güllələdik. Qadın və uşaqlar ah-nalə edirdi. Etiraf edim ki, dəhşətli mənzərə idi. Qadınlar, uşaqlar qışqıranda bizimkilər qəh-qəhə çəkib gülürdü. Yalnız kiçik bir qrup meşə yolu ilə canını qurtara bildi. Hamını qırdıqdan sonra bizimkilər meyitlərin üzərindəki qiymətli əşyaları topladılar, sonda da Əsgəran yolu ilə qaçdıq”.
Təqsirləndirilən şəxs vəhşicəsinə öldürülən dinc əhalinin meyitlərinin necə basdırılmasından da danışıb: "Hadisədən bir müddət sonra eşitdik ki, camaat yerdə qalan meyitlərin iyindən şikayət edir. Bundan sonra meyitlər bir-birinin üstündə Əsgəran qalasının yanındakı kütləvi məzarlıqda basdırıldı”.
Separatçı müttəhim istintaq vaxtı dedikləri bəzi məqamların dostu Seqo Doluxanyandan eşitdiyini, öz əli ilə vaxtilə sənəddə yazdıqlarını isə guya müharibədən sonra ona pensiya verilsin deyə yazdığını deyib: “Mən ancaq yük maşınımla ərzaq daşımışam. Döyüşlərdə iştirakımı da ona görə şişirtmişəm ki, müharibədən sonra mənə pensiya versinlər”.
Bundan sonra hakimin sualına cavab verən Beqlaryan Xocalı soyqırımının törədilməsini açıq məhkəmə prosesində etiraf edib: “Qəbul edirəm ki, soyqırımı olub.”
Növbəti prosesdə sənədlərin tədqiqi mərhələsi davam edəcək.
E.Məmmədəliyev,
Musavat.com
XƏBƏR LENTİ
24 Dekabr 2024
ŞƏRHLƏRŞƏRH YAZ