Onlayn ictimai-siyasi qəzet
Ermənistan və Azərbaycan Rusiyanı Cənubi Qafqazdan sıxışdırıb çıxarır – sülhə aparan yol Zəngəzur dəhlizindən keçir
Cənubi Qafqazda yeni tarixi mərhələ: Moskva zəifləyir, Bakı-Ankara xətti möhkəmlənir, Türk Dünyası inteqrasiyaya doğru addımlayır
Ermənistan və Azərbaycan uzun onilliklərdir davam edən düşmənçilikdən sonra indi Rusiyanı bölgədən sıxışdırıb çıxarmaq hesabına sülhə doğru irəliləyirlər.
Musavat.com-un xəbərinə görə, “Euronews” xəbər verir ki, iki ölkə arasında birbaşa danışıqlar gedir və Moskvanın Cənubi Qafqazdakı təsiri görünməmiş şəkildə azalır.
Buna paralel olaraq “The Moscow Times” da diqqət çəkib ki, son 35 ilin böyük hissəsini bir-biri ilə müharibə vəziyyətində keçirən Ermənistan və Azərbaycanın indi ortaq bir düşməni var – Kreml.
Rəsmi Moskva bunu çox yaxşı anlayır və qəbul etmək məcburiyyətində qalır ki, Rusiyaya qarşı nifrət o həddə çatıb ki, hətta qatı rəqiblər belə gələcək naminə birləşmək qərarına gəliblər.
Bu vəziyyət xüsusilə Rusiyanın regionda apardığı avantüraları iflasa uğradır. Kreml Ermənistanda dövlət çevrilişi etməyə çalışdı, hətta keşişləri də küçələrə çıxardı, amma nəticəsiz qaldı. Çünki ABŞ buna imkan vermədi. Vaşinqton hazırda bütün gücü ilə Paşinyan hökumətini qoruyur. Əbəs deyil ki, dünyanın ən böyük ABŞ səfirliyi məhz İrəvanda yerləşir və bu da təsadüf deyil.
Digər tərəfdən, Azərbaycanda Rusiyanın iqtidar dəyişikliyi həyata keçirməsi ümumiyyətlə, mümkün deyil. Çünki Rusiya-Ukrayna müharibəsi bu ölkəni həm iqtisadi, həm hərbi, həm də beynəlxalq mövqelər baxımından ciddi şəkildə zəiflətdi.
Ekspertlər qeyd edirlər ki, Moskva artıq Cənubi Qafqazda və Türkistanda öz əvvəlki təsir imkanlarının ən azı 60-70 faizini itirib. Üstəlik, Rusiyanın öz daxilində də anti-müharibə əhval-ruhiyyəsi artır, Putin rejimi daxildən də getdikcə zəifləyir.
Bu fonda Zəngəzur dəhlizinin ABŞ nəzarəti altında açılması həmçinin İran üçün də böyük zərbə olub. Tehran uzun illər Qərbi öz sərhədlərindən uzaq saxlamağa çalışırdı. Amma İsrail-İran toqquşmalarından sonra xeyli zəifləyən molla rejiminin bu prosesə müqavimət göstərməyə artıq gücü çatmır.
Şübhəsiz ki, Zəngəzur dəhlizinin açılmasına ən böyük dəstəyi məhz Türkiyə verir. Rusiya və İranın Cənubi Qafqazda əriyib gedən təsir imkanları indi Türkiyənin əlini daha da gücləndirir. Azərbaycan isə bölgədə dominant gücə çevrilir və bu, ən çox Ankaranın maraqlarına uyğundur.
Bütün bunlar təkcə regional çəkidə deyil, həm də qlobal geosiyasi müstəvidə ciddi dəyişikliklərin xəbərçisidir. Çünki Zəngəzur dəhlizi Türk Dünyasının iqtisadi, siyasi və hərbi baxımdan daha sıx inteqrasiyasını sürətləndirəcək. Nəticədə isə Türk dövlətləri dünyanın yeni güc mərkəzlərindən birinə çevrilmək şansını əldə edəcəklər. Belə tarixi imkan heç vaxt əldən verilməməlidir.
Daha ətraflı: Euronews
Elbəyi Həsənli
Xüsusi olaraq Musavat.com üçün
Elbəyi HƏSƏNLİ, SÜRİX 
XƏBƏR LENTİ
11 Iyul 2025
10 Iyul 2025
ŞƏRHLƏRŞƏRH YAZ