Onlayn ictimai-siyasi qəzet
“Ərim sağdır, mənə zəng etmişdi”- İki il öncə öldürülən Anarın xanımı
Gəncədə 1979-cu il təvəllüdlü Anar Hüseynovun qətlində təqsirləndirilən 1993-cü il təvəllüdlü Ramil Musayevin məhkəməsi başa çatıb.
“Qafqazinfo” xəbər verir ki, Ramil Musayev Cinayət Məcəlləsinin 120.2.4, və 29,120.2.7-ci (Xüsusi amansızlıqla adam öldürmə, iki və daha çox adamı öldürməyə cəhd) maddələri ilə təqsirli bilinib.
Məhkəmədə bildirilib ki, hər iki şəxs evlərdə usta kimi çalışıb və hadisədən bir neçə gün əvvəl aralarında şəxsi münasibətlər zəminində münaqişə yaranıb. Belə ki, Ramil sərxoş halda Anarın evinə gedərək onu ailə üzvlərinin gözü qarşısında boğazından bıçaqlayaraq amansızlıqla öldürüb. Daha sonra onun oğluna da xəsarət yetirib. Bu zaman Anarın arvadı yerdən daş götürərək Ramilin başına vurub.
R.Musayev ifadəsində Anarla qonşu olduqlarını, ailələr arasında xeyli müddətdir, narazılıq olduğunu, həmçinin pula görə mübahisə yarandığını deyib. O, özünü Cinayət Məcəlləsinin qeyd edilən maddələri ilə deyil, daha yüngül cəzanı nəzərdə tutan 126.3-cü (Qəsdən sağlamlığa ağır zərər vurma-Ehtiyatsızlıqdan ölümlə nəticələndikdə) maddəsi ilə təqsirli bilib.
Anar Hüseynovun xanımı Sevinc Hüseynova isə ifadəsində ərinin öldürülmədiyini, onun sağ olduğunu, dəfn etdikləri meyitin başqa şəxsə aid olduğunu iddia edib. Həyat yoldaşının bıçaqlandığını gördüyünü deyən zərərçəkmiş şəxs onun xəstəxanaya aparılandan sonra ölməsinin yalan olduğunu düşünür: “Həmin gün Anarla digər evimizdə işləyib ata evimizə gəlmişdik. Bir qədər sonra Anar küçəyə çıxdı. Oğlumla onun arxasınca çıxanda kənarda Ramillə söhbət etdiklərini gördük. Həmin vaxt Anar Ramilə “get, sabah danışarıq” dedi. Mən yaxınlaşanda Ramil bıçaqla Anarın boğazından vurdu. Anar boğazını tutub arxaya doğru çəkildi, böyük oğlum Ramilin üzərinə gedib nə üçün belə etdiyini dedi. Bu zaman o, oğluma sarı 3 dəfə bıçaq atdı, həmin zərbələrdən biri oğlumun qolaltı nahiyəsinə dəydi. Anar xəsarət alıb geriyə doğru hərəkət etdikdən sonra Ramil ərimin üzərinə yox, mənə hücum edərək öldürəcəyini dedi. Bu vaxt ona daş atdım.
Anarın bədənində döymələr vardı. Hadisədən sonra mənə məlum oldu ki, ərim Anar Hüseynov sağdır, bu hadisəni Ramil bəzi şəxslərlə birgə qurublar, hamısı oyundur. Anarın dəfn mərasimində iştirak etdik, lakin torpağa tapşırılan şəxs o deyildi. Mənə ekspertizada iştirak etməyə imkan vermədilər.
Ekspertizadan sonra ərimin qısa müddət ərzində dəfn edilməsini söylədilər. Mən dəfndən qabaq evdə olarkən onun üzünü açıb baxmaq istəsəm də, buna müxtəlif bəhanələrlə mane oldular. Anar sonradan mənə zəng elədi, dedi ki, meyityuma yerində onu başqa şəxslə dəyişiblər. Yoldaşım Abbas Səhhət adına xəstəxanada vəfat edib, ekspertiza üçün isə meyitini 3 nömrəli xəstəxanaya aparıblar.
Məhkəmədə iş gedən müddət ərzində Anarla bir dəfə telefon vasitəsilə gizlicə danışmışam, çünki ərim gizli nömrədən zəng etmişdi. Oğlum uşaq olduğuna və onun sözünə heç kəsin inanmayacağına görə Anarın kiçik oğlumla danışmasına imkan vermədim”.
Təqsirləndirilən şəxs isə A.Hüseynovun sağ olmasının həqiqətə uyğun olmadığını, onu həqiqətən öldürdüyünü deyib.
Anar Hüseynovun qayınanası da kürəkəninin sağ olmasına dair faktın olmadığını bildirib.
Gəncə Ağır Cinayətlər Məhkəməsi Ramil Musayevi Cinayət Məcəlləsinin 120.2.4 və 29.120.2.7-ci maddələri ilə təqsirli bilib. Ona 17 il 6 ay həbs cəzası verilib.
Qeyd edək ki, hadisədən sonra mediada cinayətin başqa zəmində törədilməsi barədə də iddialar yayılmışdı.
XƏBƏR LENTİ
30 Noyabr 2024
29 Noyabr 2024
ŞƏRHLƏRŞƏRH YAZ