Onlayn ictimai-siyasi qəzet
Ekspert: "Media Reyestrinin aparılması Qaydaları" mükəmməl hazırlanıb
" "Media Reyestrinin aparılması Qaydaları" haqqında Azərbaycan Respublikası Prezidentinin Fərmanı Azərbaycan mediasının saflaşdırılması, sağlamlaşdırılması və peşəkarlaşdırılması yönündə verilmiş çox mühüm bir qərardır".
Bunu Musavat.com-a açıqlamasında Jurnalistlərin Həmkarlar İttfaqının sədri, media eksperti Müşfiq Ələsgərli deyib.
O, Media Reyestrinin aparılması qaydalarından söz açıb:
"Şəxsən mən Media Reyestrinin yaradılması təşəbbüsünü ilk gündən, yəni onun "Media haqqında" Qanun layihəsində nəzərdə tutulduğu gündən dəstəkləmişəm. Media Reyestrinin aparılması qaydalarında nəzərdə tutulan maddələr, əslində, peşəkar KİV və peşəkar jurnalist anlayışı üçün mövcud olan meyarlardır. Reyestrin formalaşdırılması, orada nəzərdə tutulan prinsiplərin tətbiq edilməsi ölkədə peşəkar media subyektləri və peşəkar jurnalistlərlə həvəskar xəbər istehsalçısının sərhədlərini müəyyənləşdirəcək. Bu həm media işçiləri, həm də cəmiyyət üçün çox faydalıdır. Reyestrə düşməyin mühüm şərtlərindən biri etik davranış qaydalarına əməl etməkdir. Qaydaların 6.6.11-ci maddəsində bu ifadə çox açıq şəkildə təsvir edilib. Etik kodeksə əməl etmək doğru, düzgün, qərəzsiz informasiya istehsal etmək deməkdir ki, bu da cəmiyyətimiz üçün çox faydalıdır".
Ekspert əlavə edib ki, bu qaydaların qüvvəyə minməsi ilə həm də ölkədə ilk dəfə olaraq sərbəst çalışan jurnalistlərin hüquqları tanınmış olur:
"Onlar adı Reyestrdə olan KİV subyektlərinin biri ilə mülki müqavilə bağlamaqla jurnalist vəsiqəsi ala və hüquqlarını reallaşdıra biləcəklər. Reyestrin tətbiq edilməsi həm də ölkədəki peşəkar KİV subyektləri və peşəkar jurnalistlərin kəmiyyətini müəyyənləşdirməyə, statistik məlumat bazası yaratmağa yardım edəcək. Bu statistikanın əldə edilməsi dövlətə də imkan verəcək ki, medianın inkişafı üçün effektiv proqramlar hazırlasın və icra etsin. Qaydalarda diqqət çəkən daha bir mühüm bənd ora daxil olmağın könüllülük prinsipi əsasında qurulmasıdır. Əgər hansısa KİV subyekti Reyestrə daxil olmaq istəməsə, öz fəaliyyətini köhnə qaydada davam etdirə biləcək. Bir sözlə, Qaydalar mükəmməl hazırlanıb və media ictimaiyyəti üçün yalnız faydalılıq gətirir".
Afaq Mirayiq,
Musavat.com
XƏBƏR LENTİ
10 Noyabr 2024
ŞƏRHLƏRŞƏRH YAZ