Onlayn ictimai-siyasi qəzet
Efirdə səslə görüntü arasında problem... - İTV üzr istədi
İctimai Televiziya Avro-2024 final oyununun yayımı il bağlı açıqlama yayıb.
Televiziyadan Musavat.com-a verilən açıqlamada final oyununun yayımı zamanı şərhçinin səsi ilə videogörüntü arasında yaranan uyğunsuzluğa aydınlıq gətirilib:
"Hörmətli tamaşaçılar, bildiyiniz kimi, İctimai Televiziya və Radio Yayımları Şirkəti Azərbaycanda Avro-2024-ün rəsmi yayımçısı olub.
İyun ayının 14-dən etibarən bütün dünyanın diqqətlə izlədiyi bu idman turnirini biz də yüksək keyfiyyət və təqdimatda tamaşaçılarımıza nümayiş etdirdik.
Belə ki, çempionatın 51 oyununu milyonlarla tamaşaçı həm efirimizdən, həm də yutub kanalımızdan canlı olaraq izləyə bilib. Azərbaycan televiziya məkanında ilk dəfə olaraq Avropa Çempionatının final oyununu şərhçimiz Tural Dadaşov məhz oyun keçirilən stadiondan şərh edib.
Təəssüflə qeyd edirik ki, iyulun 14-də Avropa Çempionatının final oyununun yayımı zamanı şərhçimizin səsi və oyunun videogörüntüsü arasında bəzi epizodlarda uyğunsuzluq yaranıb.
Buna səbəb Avro-2024-də ilk dəfə olaraq şərhçinin səsinin internet, görüntünün isə peyk üzərindən ötürülməsi sisteminin tətbiqi olub. Sözügedən sistemin tətbiqi nəticəsində çempionat zamanı bir sıra ölkələrin yayımçı telekanalları da eyni vəziyyətlə üzləşiblər".
Açıqlamada həmçinin qeyd edilib ki, efirdən əvvəl edilən test zamanı bu kimi problem qeydə alınmayıb:
"Vəziyyətin yaranma səbəbkarı birbaşa İTV olmasa da, problemin aradan qaldırılması üçün tərəfimizdən müvafiq addımlar atıldı. Təəssüf edirik ki, qısa müddət ərzində texniki nasazlığı aradan qaldırmaq mümkün olmayıb. Belə bir mötəbər turnirin yayımında hər bir qüsurun izləyicilərin haqlı narazılıqlarına səbəb olduğunu anlayır və bir daha yaranmış vəziyyətdən narahatlıq yaşamış tamaşaçılarımızdan üzr istəyirik".
Nigar HƏSƏNLİ,
Musavat.com
XƏBƏR LENTİ
24 Noyabr 2024
ŞƏRHLƏRŞƏRH YAZ