Onlayn ictimai-siyasi qəzet
Bayram günlərində hotellərinqiyməti fantastik həddə
“O qiymətə Avropada istirahət etmək olar”
Yeni il bayramına təxminən 10 gün vaxt qalıb. Hər il olduğu kimi bu il də regionlarda yerləşən hotellər bayram günləri üçün qiymətləri fantastik həddə qaldırıblar.
Məsələn, Yeni ili Şuşadakı 5 ulduzlu “Shusha” hotelində qeyd etmək istəyənlər 2 gecə 3 gün (31.12.2024-02.01.2025) üçün bir nəfərə 950 manat ödəməli olacaqlar. Paketə daxildir - səhər və şam yeməyi, Yeni ilin atəşfəşanlıqla qarşılanması, müxtəlif ulduzların iştirakı ilə Yeni il qala gecəsi, azyaşlılar üçün nəzərdə tutulmuş əyləncələr (Şaxta baba, qar qız, klounlar, mini disko, oyunlar).
İsmayıllıda yerləşən “Basqal Resort & Spa” hotelində isə Yeni il gecəsi qiymətə səhər və axşam yeməyi nəzərdə tutulub. Qala gecəsi də daxil olmaqla, 1 520 manat olacaq. Yeni il paketi iki gecəlik nəzərdə tutulub.
“Shamakhi Palace”da isə 31 dekabr tarixində iki gecəlik paketin qiyməti iki nəfər üçün 1 510 manatdır. Qiymətə üç dəfə qidalanma daxildir.
“Shahdag Hotel & Spa”da Yeni il üçün üç gecəlik, səhər və axşam yeməyi və qala gecəsi daxil olmaqla, 1830 AZN təşkil edir. Qiymət iki nəfər üçün nəzərdə tutulub.
“Quba Palace” hotelində qiymətlər dekabrın 31-dən yanvarın 2-nə qədər 2500-2700 manat aralığında dəyişir. Bu qiymət iki nəfər üçün təyin edilib. Məbləğə gündə üç dəfə qidalanma, SPA, sauna və keçiriləcək Yeni il şou-proqramlarına qatılmaq daxildir.
Qubada “Macara Lake Park” hotelində dekabrın 31-dən yanvarın 2-ə qədər üç günlük qiymət (iki nəfər üçün) 1450 manatdır. Qiymətə səhər və axşam yeməkləri daxildir.
Şabranda “Qalaaltı” hotelində isə 31 dekabr - 2 yanvar tarixlərində iki nəfər üçün qiymət 1430 manatdan başlayır. Bu məbləğə gündə üç dəfə qidalanma, SPA, sauna və sair xidmətlər daxildir.
“Qafqaz Tufandağ” hotelində iki nəfər üçün qiymət üç günlük istirahət və səhər yeməyi daxil olmaqla 1620 manatadır.
“Lankaran Springs Wellness Resort”da Yeni il gecəsi isə üç gün - iki gecə qonaqlama, üç dəfə qidalanma və qala gecəsi ilə birgə iki nəfər üçün 1 399 AZN təşkil edir.
Bəs hər il bayram günlərində hotellərin qiymətinin bu cür fantastik həddə çatması nə ilə əlaqədardır?
Mövzu ilə bağlı turizm üzrə ekspert Ceyhun Aşurov “Yeni Müsavat”a danışıb:
Ceyhun Aşurov
“Xatırladım ki, ötən il də Yeni il gecəsi üçün hotellərdə təşkil olunan ziyafət və əyləncə tədbirlərinin qiymətləri 1.000 manatdan 2.500 manata qədər dəyişirdi. Bu qiymətlər əsasən lüks hotellərdə tətbiq edilirdi. Bəzi regionlarda da belə hotellər mövcuddur və onlar geniş ziyafət zalları və əraziləri ilə seçilir.
Qiymətlər kifayət qədər yüksəkdir. Hətta bu qiymətlərə Parisdə istirahət etmək mümkündür. Buna baxmayaraq, Yeni il ərəfəsində yerli hotellərə tələbat artır.
Həmçinin, vətəndaşlarımızın bir hissəsi bayramı xaricdə keçirməyi üstün tutur, digərləri isə ölkə daxilində müxtəlif otel və məkanlarda bu xüsusi günü qeyd edirlər. Bayramın təbiəti və xüsusi gün olması səbəbilə, tələbatın yüksək həddə çatması gözlənilir. Yəni qiymətlər yüksək təklif olunsa da, bu xidmətlərə alıcılar mövcuddur və hətta yerlər əvvəlcədən bron edilir. Düşünə bilərik ki, qiymətlər yüksək olsa da, ötənilkindən yüksək deyil, lakin əlavə olaraq müxtəlif alternativlər də təklif olunur. Məsələn, kənd evləri, villalar kimi seçimlər təqdim edilir.
Turistlər üçün bu təkliflər xüsusilə cəlbedicidir. Ölkə xaricindən gələn turistlərin sayı artır və eyni zamanda, ölkə daxilində də vətəndaşlarımızın bir hissəsi bu məkanlardan istifadə edərək istirahətlərini təşkil edir. Artan tələbat qiymətlərin yüksək olmasını şərtləndirir və bu səbəbdən belə təkliflər təqdim olunur.
Düşünürəm ki, regionda otellərin sayı artarsa, daha çox otel fəaliyyətə başlayarsa və seçim imkanları genişlənərsə, bu, rəqabəti artırar. Nəticədə qiymətlər daha münasib, xidmətlər isə daha keyfiyyətli və əlçatan olar".
Xalidə GƏRAY,
“Yeni Müsavat”
XƏBƏR LENTİ
21 Dekabr 2024
ŞƏRHLƏRŞƏRH YAZ