Onlayn ictimai-siyasi qəzet
“Aygün keçmiş Novruz bayramında mənə təklif etdi ki...” - VİDEO
Azərbaycana 2011-ci ildə "Avroviziya" sevinci bəxş edən müğənni Nigar Camal duet ortağı mərhum Əməkdar artisti Aygün Bəylərdən söz açıb.
Musavat.com bizim.media-ya istinadən bildirir ki, sənətçi "O üz" verilişinə müsahibəsində A.Bəylərlə olan ünsiyyətindən bəhs edib.
Nigar Aygünlə baş tutan duetin pərdəarxası məqamlarından danışıb:
"Nəfəsim Qəlbim" mahnısının sözləri mənə aiddir. Mahnı hazır olandan sonra Aygünə təklif etdim. O isə bunu böyük məmnuniyyətlə qəbul etdi. Bundan sonra biz başladıq birlikdə layihə hazırlamağa. Hamı deyirdi ki, siz fərqli insansınız. Necə sizdə bu duet alındı? Amma hər şey bizdə əla idi... Gülürdük, danışırdıq. Aygün keçmiş Novruz bayramında mənə təklif etdi ki, bir yerdə milli ruhda mahnı oxuyaq. Gözəl bir klip də çəkdirək. Mən bu mahnıya klip də düşünmüşdüm.
İstəyirdim ki, 60-70-ci illərin tərzində bir klip çəkdirək. Əslində çox maraqlı olmalı idi. Amma milli mahnı oxumaqdan qorxurdum. Deyirdim ki, mən pop ifaçıyam, heç zaman milli mahnı oxumamışam və məndə sənin kimi möhtəşəm alınmaz. Amma o deyirdi ki, "Nigar səndə hər şey alınacaq. Gəl bir yerdə oxuyaq, insanlara maraqlı olacaq".
N.Camal bildirib ki, A.Bəylərin analizlərinin cavablarını Bakıdakı həkimlərə göstərəndə vəziyyətinin çox ağır olduğunu öyrənib:
"Milli mahnı oxumaq haqda yayda Aygünlə danışdım. Amma iki gün sonra onunla bağlı çox pis bir xəbər aldım. Aygündə xərçəngin 4-cü mərhələsi idi. Zəng edib ona söylədim ki, Bakıda çox yaxşı həkimlər tanıyıram. Mənə öz analizlərini göndər. O isə xəstəliyi ilə bağlı Türkiyəyə müalicəyə gedirdi. Bakıda xəstəxanaların birinə getdim. Orada həkimə Aygünün analizlərini göstərdim. Amma mənə söylədilər ki, analizlər çox pisdir. Mütləq şəkildə o kimyaterapiyaya başlamalıdır".
Nigar Aygünün qəfil ölümünə inanmadığını və onun sayəsində muğamı sevdiyini bildirib:
"Mənim üçün ən çətin Aygün Bəylərin ölümü oldu. Bir insanı çox istəyəndə ona nəsə bir pis şey olacağına inanmırsan. Elə düşünürsən ki, onda hər zaman hər şey yaxşı olacaq. Bizdə sənətkar çoxdur. Hamıya hörmətlə yanaşıram. Amma Aygün Aygündür. Aygünün səsi Allahdan verilən səsdir. Günlərin bir günü səs yazma studiyasında mahnımızı yazdırırdım.
Bir neçə dəfə çalışdım ki, nəğməni başqa cür oxuyum. Aygün gəldi... O mahnıya əvvəlcədən heç qulaq da asmamışdı. Bir dəfə yanımda mahnını dinlədi və elə oxudu ki, göz yaşlarım axmağa başladı. Dedim ki, "Aygün sən neyləmisən? Bu mahnını necə belə oxumaq olar? Aygünün səsi ilə müğama vuruldum. Çox xoşbəxtəm ki, həyatda Aygünü tanıdım".
Qeyd edək ki, Əməkdar artist Aygün Bəylər uzun sürən xəstəlikdən sonra yanvar ayının 6-da gecə saatlarında Ankarada müalicə aldığı xəstəxanada vəfat edib.
XƏBƏR LENTİ
25 Noyabr 2024
ŞƏRHLƏRŞƏRH YAZ