Onlayn ictimai-siyasi qəzet
Atəşkəs adı altında hücum: Rusiya vədini pozdu
Saat 06:00-a olan məlumata görə, cəbhənin müxtəlif istiqamətlərində artıq 59 dəfə Rusiya tərəfindən atəş açılıb və beş hücum əməliyyatı həyata keçirilib
Rusiya özü tərəfindən elan olunan "Pasxa atəşkəsi"ni pozmaqda davam edir, atəşlər dayanmır.
Musavat.com UNİAN-a istinadən xəbər verir ki, bu barədə Ukrayna prezidenti Volodimir Zelenski Ukrayna Silahlı Qüvvələrinin Baş komandanı Aleksandr Sırskinin saat 6:00-a olan cəbhədəki vəziyyətlə bağlı hesabatına istinadən məlumat verib.
“Cəbhənin müxtəlif istiqamətlərində artıq 59 Rusiya atəşi və beş hücum əməliyyatı qeydə alınıb. Starobelsk OTQ-də bir, Donetsk OTQ-də isə Pokrovsk və Novopavlovsk istiqamətlərində üç toqquşma qeydə alınıb. Zaporojye istiqamətində isə Stepnoe bölgəsində bir döyüş baş verib. Düşmən onlarla FPV dronundan istifadə edib”, – deyə Zelenski bildirib.
Bundan əlavə, Kursk bölgəsində Rusiya tərəfindən artilleriya zərbələri və dron hücumları da olub.
Zelenski qeyd edib ki, Ukrayna hərbçiləri “müəyyən döyüş şəraitinə uyğun olaraq, düşmənin layiq olduğu şəkildə cavab verir”.
O əlavə edib ki, dünən saat 18:00-dan bu gün saat 00:00-a qədər Rusiya ordusu tərəfindən 387 dəfə atəş açılıb və 19 hücum əməliyyatı həyata keçirilib. Rusiya tərəfi 290 dəfə pilotsuz uçuş aparatlarından istifadə edib.
“Rusiya ordusu atəşkəsin guya mövcud olduğu təəssüratını yaratmağa çalışır, lakin bəzi hallarda hələ də irəliləməyə və Ukraynaya itkilər verməyə cəhdlər göstərir. Rusiya tam şəkildə sükut rejiminə əməl etməlidir. Ukraynanın bu sükutu bu gün saat 00:00-dan sonra daha 30 gün uzatmaq təklifi qüvvədə qalır”, – deyə dövlət başçısı vurğulayıb.
Pasxa atəşkəsi
Rusiya 19 aprel saat 18:00-dan 21 aprel saat 00:00-a qədər “Pasxa atəşkəsi” elan etdiyini açıqlayıb.
BBC-nin məlumatına görə, Ukrayna hərbçilərinə demək olar ki, dərhal Rusiya mövqelərinə atəş açmamaq əmri verilib. Həmçinin, onlara Rusiya tərəfindən atəşkəsin pozulmasına dair foto və video sübutlar toplamaq, zəruri hallarda isə cavab atəşi açmaq hüququ verilib.
Günün sonunda isə Zelenski bildirib ki, Rusiya tərəfinin vədlərinə baxmayaraq, cəbhənin bəzi hissələrində rus artilleriyası fəaliyyətini davam etdirir, döyüşlər gedir və dronlardan istifadə olunur. Ön cəbhədəki hərbçilərin əksəriyyəti də atəşkəsi hiss etmədiklərini bildiriblər.
İqbal RZAYEV,
Musavat.com
XƏBƏR LENTİ
20 Aprel 2025
ŞƏRHLƏRŞƏRH YAZ