Onlayn ictimai-siyasi qəzet
Aldanmamaq üçün bu mesajlara inanmayın: Vəkillərin məlumatları olan sayt yaradıldı
Azərbaycan Respublikası Vəkillər Kollegiyasının (ARVK) rəsmi internet resursuna oxşar saxta sayt yaradılıb. Yeni yaradılan saytla Kollegiyanın rəsmi saytında yerləşdirilən məlumatlar eynidir.
Musavat.com xəbər verir ki, vəkillərlə bağlı yaradılan yeni sayt vakil-az.com-dur.
Bu sayt vasitəsilə insanlara qarşı fişinq hücumları həyata keçirirlər.
Məqsəd vəkil və vətəndaşları çaşdırmaq, onların məlumatlarını ələ keçirmək və potensial olaraq qanunsuz fəaliyyətlər göstərməkdir.
Həmin saytda ARVK-nın rəsmi saytında olduğu kimi, Kollegiya üzvləri ilə bağlı məlumatlar, əlaqə nömrələri yerləşdirilib, vəkillərin reyestrləri qeyd edilib.
Eyni zamanda həmin şəxs və şəxslər bir qrup vəkilə yerli və xarici ölkələrin mobil nömrə qeydiyyatında olan “WhatsApp” vasitəsi ilə mesajlar yazaraq, guya nömrələri “vakil-az.com” saytından əldə etdiklərini və hüquqi yardıma ehtiyaclarının olduqlarını bildiriblər. Yazışmalar zamanı göndərilən mesajların saxta olduğu və müraciətlərin fişinq hücumu məqsədi daşıdığı məlum olub.
Məsələ ilə bağlı Kollegiya tərəfindən aidiyyəti qurumlara məlumat verilib.
Kollegiya vətəndaşlara da müraciət edib:
“Xahiş olunur ki, bu cür şübhəli internet resurslarına güvənməsin və kibertəhlükəsizlik qaydalarına riayət edin. Saytın ünvanını diqqətlə yoxlamaq və yalnız rəsmi səhifəyə daxil olmaq lazımdır. Eyni zamanda şübhəli saytlara və mesajlara şəxsiyyət vəsiqəsi məlumatlarını, bank kartlarını və ya digər şəxsi informasiyanı daxil etmək olmaz.
Bu kimi hallarla qarşılaşdıqda dərhal hüquq-mühafizə orqanlarına və Vəkillər Kollegiyasına məlumat verilməsi tövsiyə olunur.
ARVK məsələ ilə bağlı aidiyyəti qurumlara məlumat verib, hazırda araşdırma aparılır və vətəndaşların hüquqlarının qorunması üçün lazımi tədbirlər görülür”.
Qeyd edək ki, Azərbaycan Respublikası Vəkillər Kollegiyasının (ARVK) rəsmi internet resursu budur: https://barassociation.az/news/1618
Bildirək ki, son zamanlar bu cür kiberhücumların sayı artıb. Hər gün müxtəlif yollarla aldadılan şəxslərin müraciətlərini dinləyirik. Siz də bu cür saxta mesajlara inanaraq şəxsi məlumatlarınızı qarşı tərəfə ötürə bilərsiniz.
İ.Muradov
Musavat.com
XƏBƏR LENTİ
04 Aprel 2025
ŞƏRHLƏRŞƏRH YAZ