Onlayn ictimai-siyasi qəzet
Aİ Rusiyaya qarşı sanksiyaların uzadılması ilə bağlı qərar qəbul edə bilmir – Macarıstanın vetosu səbəb olur
Musavat.com xəbər verir ki, Avropa İttifaqı (Aİ) Rusiyaya qarşı fərdi sanksiyaların uzadılması ilə bağlı yenə də razılığa gələ bilməyib. Əgər martın 15-dək sanksiyalar təsdiqlənməsə, onlar avtomatik olaraq ləğv ediləcək.
“Avropa Pravda” nəşrinin diplomatik mənbələrə istinadən verdiyi məlumata görə, Aİ-nin 27 üzv ölkəsinin daimi nümayəndələr komitəsi bu gün keçirilən iclasda yenidən konsensusa nail ola bilməyib.
Bunun əsas səbəbi Macarıstanın veto hüququndan istifadə etməsidir. Budapeşt bir neçə rusiyalı oliqarxın sanksiya siyahısından çıxarılmasını tələb edir.
Mediada yayılan məlumata görə, Macarıstanın müdafiə etdiyi şəxslər arasında Mixail Fridman, Pyötr Aven və Alişer Usmanov da var.
Bundan əlavə, mənbələr Lüksemburqun da Fridmanın sanksiya siyahısından çıxarılmasını dəstəklədiyini bildirir. Bunun səbəbi Lüksemburqda Fridmana məxsus 15 milyard avro dəyərində dondurulmuş aktivlərin yerləşməsidir. Məlumata görə, Fridman artıq bir neçə ildir ki, məhkəmə yolu ilə bu vəsaitləri geri qaytarmağa çalışır.
Əgər Aİ martın 15-dək sanksiyaların müddətini uzatmasa, onlar yerli vaxtla saat 23:59-da qüvvədən düşəcək. Bu isə Rusiya oliqarxlarının Avropadakı aktivlərinə çıxışını bərpa edə bilər.
Sanksiyalar məsələsində Macarıstanın mövqeyi və Lüksemburqun mövcud maraqları Aİ daxilində ciddi fikir ayrılıqları yaradır. Qərarın son taleyi önümüzdəki günlərdə məlum olacaq.
Musavat.com
XƏBƏR LENTİ
01 May 2025
30 Aprel 2025
ŞƏRHLƏRŞƏRH YAZ