Onlayn ictimai-siyasi qəzet
Aİ Rusiya banklarını SWIFT-ə qaytarmayacaq – Tramp təzyiq etsə...
Avropa İttifaqı nə Rusiyaya qarşı sanksiyalar rejiminə yaxın gələcəkdə dəyişiklik etmək, nə də Rusiya banklarının SWIFT sisteminə qoşulmasına icazə vermək niyyətində deyil.
Musavat.com xəbər verir ki, məlumatı “Euractiv” portalı avropalı diplomatlara istinadən yayıb. Bildirilir ki, bu, Səudiyyə Ərəbistanında məsləhətləşmələr nəticəsində Rusiya və ABŞ-ın əldə etdiyi razılaşmaların həyata keçirilməsini çətinləşdirə bilər.
Avropa Komissiyasının nümayəndəsi portala qeyd edib ki, Qara dənizdə atəşkəs sazişinin işə salınması üçün Amerika administrasiyası hər hansı anti-Rusiya sanksiyalarının ləğvi ilə bağlı Brüsselin razılığına ehtiyac duyacaq və buna nail olmaq çətin ola bilər: "Hər kəs bunun nə demək olduğunu və ya demək ola biləcəyini hələ də təhlil edir. Lakin hazırda bu, Rusiya və ABŞ arasındakı razılaşmalar haqqında bəyanatdır, bizim heç bir əlaqəmiz yoxdur. Sanksiyaların müddətinin növbəti uzadılmasına qədər (2025-ci ilin iyulunda – red.) heç nə dəyişməyəcək və biz buna heç çalışmırıq da, çünki nə Rusiyanın özü, nə də onun məqsədləri dəyişməyib".
Avropa Komissiyasının vurğulayıb ki, Aİ hələ də Ukraynada işğalçı müharibənin başa çatmasını və Rusiya qoşunlarının Qərbin Ukraynanı sanksiya rejiminə yenidən baxılması üçün əsas hesab etdiyi ərazilərdən tamamilə çıxarılmasını qeydə almayıb.
Euractiv xatırladır ki, SWIFT sistemi Belçikada yerləşdiyi üçün o, Avropa qaydalarına və Aİ sanksiya qanunvericiliyinə tabedir. Almaniya Beynəlxalq Münasibətlər və Təhlükəsizlik Siyasəti İnstitutunun baş elmi işçisi Janis Kluge hesab edir ki, “Aİ sanksiya qanunvericiliyini dəyişdirənə qədər SWIFT Rusiya banklarını birləşdirə bilməyəcək”. O əlavə edib ki, nəzəri olaraq hansısa Aİ dövləti, xüsusən də Macarıstan, Rusiya bankları SWIFT-ə yenidən qoşulmasa, iyul ayında sanksiyaların uzadılmasına mane ola bilər. Ekspert hesab edir ki, Vaşinqton Brüssel və SWIFT-i Rusiya banklarını birləşdirməyə məcbur edə bilməyəcək: “ABŞ Prezidenti Donald Tramp nəzəri olaraq SWIFT-ə təzyiq göstərməyə cəhd edə bilər ki, bu da onlar üçün həyatı daha da çətinləşdirəcək, lakin bu sistem Aİ qaydalarına zidd gedə bilməyəcək”.
Portalın yazdığına görə, Vaşinqton Rusiya bankları ilə əməliyyatlar aparmaq üçün onların SWIFT-ə qoşulmasını tələb etməyən müvəqqəti həll yoluna müraciət edə bilər. Analitiklər hesab edirlər ki, Birləşmiş Ştatlar Amerika yurisdiksiyasında olan Rusiya bankları üçün ayrıca hesablar aça bilər, lakin onların fikrincə, bu, “ağır, yorucu və ləng” olardı.
Musavat.com
XƏBƏR LENTİ
04 Aprel 2025
ŞƏRHLƏRŞƏRH YAZ