Onlayn ictimai-siyasi qəzet
ABŞ-da yumurta 1 dollara qalxdı: Bahalaşma daha da sürətlənir
ABŞ-da son bir ayda yumurta qıtlığı bu məhsulun qiymətlərini rekord həddə çatdırıb.
Musavat.com CNBC-yə istinadən xəbər verir ki, ölkənin bəzi bölgələrində on iki yumurtanın olduğu 1 qutu artıq 7 dollardan bahadır. Eyni zamanda həm mağazalarda, həm də iaşə obyektlərində yumurta qıtlığı yaşanır.
Bildirilir ki, bir karton yumurtanın orta qiyməti son bir ildə 50 faizdən çox artıb və artım tempi noyabrda keçirilən prezident seçkilərindən sonra daha da sürətlənib. NIQ tədqiqat qrupunun məlumatına görə, yanvarın 18-də bitən həftədə 10 yumurtanın qiyməti 5,29 dollar olub, keçən ilin fevralında isə 3,50 dollardan bir qədər yuxarı idi.
İqtisadçıların və analitiklərin fikrincə, qiymət artımının əsas səbəbi toyuq populyasiyasını və yumurta tədarükünü azaldan yüksək yoluxucu quş qripi, eləcə də qış tətili mövsümü üçün xarakterik olan yüksək istehlak tələbidir.
ABŞ Kənd Təsərrüfatı Nazirliyinin məlumatına görə, dekabr ayından bəri ABŞ-da quş qripi epidemiyası səbəbindən 13 milyondan çox toyuq məhv edilib.
Nyu York Baş prokuroru Letitia James bildirib ki, quş qripi quşçuluq təsərrüfatlarına təsir edir və ölkə daxilində qıtlıq yaradır: “Lakin bu, biznesin qiymətləri yüksəltməsi üçün bəhanə olmamalıdır".
Birləşmiş Yumurta İstehsalçıları əkinçilik qrupuna görə, 2022-ci ildə quş qripi epidemiyası başlayandan bəri təxminən 104 milyon toyuq, o cümlədən keçən ilin oktyabr ayından 29 milyon toyuq ölüb.
RELEX Solutions şirkətinin Şimali Amerika qida bazarı strategiyasının vitse-prezidenti Amanda Orenin sözlərinə görə, əlavə olaraq, şəkər xəstəliyinin müalicəsi üçün hazırlanmış, lakin arıqlamaq üçün geniş istifadə olunan Ozempic kimi dərmanlar protein mənbəyi kimi yumurtaya olan tələbatı artırır.
Nyu-Yorkda Whole Foods Inc mağazalarında qəfəssiz yumurtanın bir karton qutusunun qiyməti 11,99 dollara qalxıb. Üstəlik, bu zəncirin bəzi pərakəndə satış məntəqələri üç qutudan çox olmayan alış limiti qoyub. Həftəsonu Bruklindəki ShopRite soyuducularının rəfləri demək olar ki, tamamilə boş olub, qalan ehtiyatlardan 1 yumurt təxminən 1 dollara satılıb. Çikaqoda Aldi, Fresh Thyme və Mariano's (Kroger Co.-ya məxsus) daxil olmaqla ərzaq mağazalarında iki qutu ilə məhdud sayda alış var.
Musavat.com
XƏBƏR LENTİ
04 Fevral 2025
ŞƏRHLƏRŞƏRH YAZ