Onlayn ictimai-siyasi qəzet
ABŞ Böyük Britaniyada atom bombası yerləşdirdi: NATO Rusiya ilə nüvə müharibəsinə hazırlaşır - FOTO
Musavat.com xəbər verir ki, ABŞ, ən azı son 20 ildə ilk dəfə olaraq Avropadakı nüvə silahları doktrinasını dəyişərək, Birləşmiş Krallıq ərazisində taktiki nüvə başlıqlarını yenidən yerləşdirib.
Etibarlı mənbələrin məlumatına görə, bu həftə bir neçə ədəd B61-12 tipli termonüvə bombası ABŞ Hərbi Hava Qüvvələrinin Nyu-Meksiko ştatının Kirtlend aviabazasındakı Nüvə Silahları Mərkəzindən İngiltərənin Suffolk qraflığında yerləşən Leykenhit aviabazasına daşınıb.
Yeni yerləşdirilən bombalar baza daxilində yeni inşa edilmiş xüsusi qorunan nüvə anbarına köçürülüb. Bu addım NATO-nun şərq cinahında Rusiyanın yaratdığı artan təhlükələr fonunda Qərbin deterrens strategiyasının bir hissəsi kimi qiymətləndirilir.
Bizim arayış: B61-12 — təkmilləşdirilmiş və dəqiqləşdirilmiş taktiki nüvə bombasıdır. Əvvəlki nəsil B61 versiyalarından fərqli olaraq bu model aşağı partlayış gücünə malikdir (dəyişkən partlayış gücü: 0.3, 1.5, 10 və 50 kiloton), lakin yüksək dəqiqliklə idarə olunur. Bombaya ən müasir GPS əsaslı yönləndirmə sistemləri inteqrasiya olunub. Bu, onun hədəfə metrlərlə dəqiqliklə çatmasını təmin edir və müharibə doktrinasında daha “istifadə edilə bilən” nüvə silahı statusu qazandırır.
B61-12 bombaları F-35A Lightning II təyyarələrinə tam inteqrasiya olunub. Hazırda Leykenhit bazasında ABŞ Hərbi Hava Qüvvələrinin 48-ci qanadına bağlı 493-cü və 495-ci qırıcı eskadrilyaları yerləşir. Hər iki bölmə yüksək hazırlıqlı F-35A qırıcıları ilə təchiz olunub və bu silah sistemləri ilə operativ şəkildə hərəkətə gətirilə bilər.
ABŞ-ın bu addımı həm Rusiyanın son aylarda nüvə ritorikasını artırması, həm də Avropada artan təhlükəsizlik riskləri ilə əlaqələndirilir. Xüsusilə Rusiyanın Belarusda taktiki nüvə başlıqları yerləşdirməsi, Ukraynaya qarşı müharibədə eskalasiya ehtimalları və Baltik-Qara dəniz bölgəsində artan hərbi fəallıq Qərb üçün yeni deterrens mexanizmlərini aktivləşdirməyə səbəb olub.
Eyni zamanda, bu yerləşdirmə ABŞ-ın NATO çərçivəsindəki öhdəliklərini gücləndirdiyini və Avropa müttəfiqlərinin təhlükəsizliyinə verdiyi önəmi göstərir. ABŞ administrasiyasına yaxın dairələr bu addımı “caydırıcılığın bərpası” kimi xarakterizə edir.
Musavat.com
XƏBƏR LENTİ
21 Iyul 2025
ŞƏRHLƏRŞƏRH YAZ