Onlayn ictimai-siyasi qəzet
"100 min sərmayə qoydum, bir neçə aya 1 milyon 300 min oldu" - eks məmurun oğlu aldadıldığını iddia edir
Bakı Ağır Cinayətlər Məhkəməsində hakim Aytən Əliyevanın sədrliyi ilə AzTV-nin sabiq sədri Arif Alışanovun qardaşı oğlu Nizami Akif oğlu Alışanın cinayət işi üzrə məhkəmə prosesi davam edir.
Musavat.com xəbər verir ki, Nizami Alışan investisiya fəaliyyəti ilə məşğul olan platformada valyuta alqı-satqısı ilə gəlir əldə etmək istəyən 3 şəxsə qarşı külli miqdarda dələduzluqda ittiham olunur.
Prosesdə zərərçəkmiş qismində Babək Məmmədzadə ifadə verib. Babək Məmmədzadə “Aztelekom” MMC-nin sabiq baş direktoru Məhəmməd Məmmədovun oğludur.
Məhkəmədə deyib ki, ixtisasca diplomatdır, xeyli vaxtdır Türkiyədə yaşayır, tikinti işi üzrə sahibkardır.
Babək Məmmədzadənin sözlərinə görə, Nizami Alişanla 20 ildən çoxdur tanışlıq münasibətləri var: "Nizami ilə orta məktəbdə bir sinifdə oxumuşam. Birja işlərində bacarıqlı olduğunu bilirdim, bu səbəbdən onunla iş görmək istədim. 2021-ci ilin əvvəlindən birlikdə işləməyə başladıq. Dedi ki, yaxşı fürsətlər var, pul qoy-pul götür. Mən də razılaşdım. Əvvəlcə 100 min manat sərmayə qoydum. Bir neçə aya 1 milyon 300 min manat etdi. Amma o pulu götürə bilmədim".
Babək Məmmədzadənin bildirdiyinə görə, 2023-cü ilin əvvəlində Nizaminin onu aldatmasından şübhələnməyə başlayıb: "Getdikcə Nizamiyə qarşı şübhələrim artmağa başladı. Onun müxtəlif bəhanələr gətirdiyini, məni aldatdığını gördüm. Mənə gah saxta elektron hesablar göndərir, gah da deyirdi ki, pulu başqa şirkətə köçürüb. Onun bu bəhanələrindən sonra şikayət etmək məcburiyyətindən qaldım. Şikayətimdən sonra Nizami mənimlə görüşəcəyini vəd etdi. Birlikdə görüşəcəyimiz gün onu həbs etdilər. Heç vaxt düşünməzdim ki, məni aldadar".
Hakim Vüqar Quliyev Babək Məmmədzadədən investisiya şirkətinə qoyduğu pulları necə qazanması ilə maraqlanıb. Zərərçəkmiş bildirib ki, həmin pulları dostlarından götürüb, şəxsi avtomobilini Nizami Alişana verib.
Təqsirləndirilən şəxsin vəkili Samir İsayev Babək Məmmədzadədən müvəkkili ilə hansı şərtlə razılaşdığını soruşub. Zərərçəkmiş bildirib ki, Nizami Alişan qoyulmuş sərmayədən gələn aylıq qazancın yarısını alacağına vəd edib:
"Əvvəl təklif etdi ki, istəyirsən daha yüksək faizlə riskli yatırım edək. Mən razılaşmadım. Dedim ki, az olsun, amma riskə atmayaq”.
Məhkəmədə Nizami Alişan zərərçəkmiş Babək Məmmədzadənin aldadılması epizod üzrə sərbəst ifadə verib. Deyib ki, Babək Məmmədzadə düzgün danışmır, onun pullarını özünə qaytarıb.
İttihama görə, investisiya fəaliyyəti ilə məşğul olan platformada valyuta alqı-satqısı həyata keçirməklə gəlir əldə etmək istəyən 3 nəfərin 3 milyon dollara yaxın pulu ələ keçirilib.
Alışan Nizami Akif oğlu asan pul qazanmaq istəyən şəxslərə özünü səhm və valyuta alqı-satqısı ilə məşğul olan mütəxəssis kimi təqdim edib. Alışanı sosial şəbəkədən tanıyıb ona aldananlar isə Zeynal Mütəllim oğlu Usubov, Babək Məhəmməd oğlu Məmmədzadə və Yadigar Şibi oğlu İsrafilovdur.
İstintaqın qənaətinə görə Nizami Alışan Babək Məmmədzadənin 1 milyon 300 min, Zeynal Usubovun 945 min, Yadigar İsrafilovun isə 200 min dollar pulunu yuxarıda qeyd edilən vasitə ilə dələduzluq edərək ələ keçirib. Hazırda fərdi sahibkar kimi fəaliyyət göstərən zərərçəkənlərə dəymiş ziyan ümumilikdə 2 milyon 445 min dollar edir. Bu cinayətin üstü Daxili İşlər Nazirliyinin (DİN) Kibercinayətkarlıqla Mübarizə Baş İdarəsi tərəfindən açılıb.
Müştərilərinin xüsusilə külli miqdarda pulunu ələ keçirən Nizami Akif oğlu Alışan cinayət məsuliyyətinə cəlb edilib. Bir müddət əvvəl həbs qətimkan tədbiri seçilib. İbtidai istintaq dövründə zərərçəkmişlərin hər biri Nizami Alışanla üzləşdirilib, əməlini üzünə deyiblər. Zərərçəkmişlərdən Babək Məmmədzadə “Aztelekom” MMC-nin sabiq baş direktoru Məhəmməd Məmmədovun oğludur. Zeynal Usubov əvvəllər prokurorluq orqanlarında işləyib, Nərimanov rayon prokurorunun müavini olub. O, 2023-ci aprelində prokurorluq orqanlarından xaric edilib. Yadigar İsrafilovun adı isə bu cinayət işindən dolayı ictimaiyyətin diqqət mərkəzinə gəlib.
Xatırladaq ki, ötən ilin yayında Zeynal Usubovun Bakıda yerləşən "Hollivud" restoranında bıçaqlanması barədə məlumatlar yayılmışdı. Zeynal Usubov məsələ ilə bağlı verdiyi açıqlamada həmin xəbərlərin yalan olduğunu bildirmişdi.
Qeyd edək ki, Nizami Alışan AzTV-nin keçmiş sədri Arif Alışanovun qardaşı oğludur.
Onun 4 il əvvəl vəfat etmiş atası Akif Alışanov da yüksək vəzifələrdə çalışıb. O, uzun illər polkovnik rütbəsi ilə Sumqayıt Mühafizə İdarəsinin rəisi işləyib. Sonuncu dəfə isə Müdafiə Sənayesi Nazirliyinin Mühafizə və təhlükəsizlik şöbəsinin rəisi kimi fəaliyyət göstərib. Nizaminin qayınatası isə hazırda Amerikada yaşayan müğənni Elariz Məmmədoğludur. O, 2014-cü ildə müğəninin qızı Günellə evlənib.
Proses mayın 12-də davam edəcək.
E.MƏMMƏDƏLIYEV,
Musavat.com
ƏLAQƏLİ XƏBƏRLƏR
XƏBƏR LENTİ
24 Aprel 2025
ŞƏRHLƏRŞƏRH YAZ