Onlayn ictimai-siyasi qəzet
Zülfüqarovdan SƏRT İDDİA: “İstanbulda baş verənlər Ərdoğana qarşı beynəlxalq əməliyyatın tərkib hissəsidir”
Azərbaycanın sabiq xarici işlər naziri, tanınmış diplomat və ekspert Tofiq Zülfüqarov İstanbulda baş verən son gərginliklərlə bağlı sosial şəbəkədə səs-küylü paylaşım edib.
Musavat.com xəbər verir ki, sabiq nazirin fikrincə, İstanbul hadisələri, Suriyanın müxtəlif bölgələrində eyni vaxtda baş verən təxribatlarla birbaşa əlaqəlidir və bütün bu proseslər Ərdoğan hakimiyyətinə qarşı beynəlxalq miqyaslı koordinasiyalı təzyiq mexanizminin bir hissəsidir.
Zülfüqarov iddia edir ki, Suriyanın Latakiya vilayətində baş verən son hadisələr Rusiya hərbi bazalarının birbaşa nəzarəti altında həyata keçirilib:
“Bu əməliyyatlar zamanı Rusiya bazalarından birbaşa operativ idarəetmə aparılıb, təbliğat videoları hazırlanıb, silahlar paylanıb. Məqsəd Aralıq dənizi sahillərində nəzarəti ələ keçirmək olub”.
Ekspert qeyd edir ki, eyni vaxtda Suriyanın cənubunda İsraillə əməkdaşlıqda ittiham olunan sağ radikallar, şimal-şərqdə isə PKK-ya bağlı silahlı qruplar fəallaşıb. Onların məqsədi Dəməşq istiqamətində irəliləyərək Türkiyənin dəstəklədiyi müvəqqəti hökumətə zərbə vurmaqdır.
Zülfüqarov bu hadisələri birgə analiz edərək belə nəticəyə gəlir:
“Burada həm Rusiya-İran cütlüyü, həm də bəzi Qərb oyunçuları eyni məqsədlə – protürk siyasi qüvvələri zəiflətmək üçün koordinasiyalı hərəkət edirlər. İstanbul hadisəsi də bu kontekstdə təsadüfi deyil, Ərdoğana qarşı təzyiqin davamıdır”.
O, hadisələrin yaxın 3 ildən sonra keçiriləcək prezident seçkiləri ilə əlaqələndirilməsini yanlış hesab edir:
“Ərdoğanın seçkilərdə iştirak etməyəcəyi bəllidir. Bu hadisələri seçkilərlə bağlamaq ictimaiyyəti yanlış istiqamətə yönəltmək cəhdidir”.
Zülfüqarovun bu fikirləri bölgədəki geopolitik gərginliyin yeni və daha təhlükəli mərhələyə keçdiyini göstərir. Onun paylaşımı Türkiyə və regionda baş verənlərin arxasında görünməyən böyük oyunların dayandığını sübut edən səsli xəbərdarlıq kimi dəyərləndirilir.
Musavat.com
XƏBƏR LENTİ
22 Mart 2025
21 Mart 2025
ŞƏRHLƏRŞƏRH YAZ