Onlayn ictimai-siyasi qəzet
“Yetim Sabir”in adamları Bakıda tutuldu- Əməliyyatda 15 nəfər saxlanılıb
Kriminal avtoritet “Yetim Sabir”in adamları Bakıda saxlanılıb. Onlar külli miqdarda narkotik vasitə satışı və istifadəsi ittihamı ilə həbs ediliblər. Onlardan biri saxlanılmadan bir həftə əvvəl Türkiyədə “Yetim Sabir”lə görüşdə olub.
Musavat.com xəbər verir ki, həmin şəxs 21 yaşlı Hüseyn Əliyevdir. Naxçıvanda, Babək rayonunda anadan olan Hüseyn Əliyev Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən keçirilən əməliyyat-axtarış tədbiri nəticəsində saxlanılıb.
İttihama görə onun üzərindən psixotrop maddə metamfetamin aşkar edilib. Həmin gün Hüseyn Əliyevlə yanaşı daha 14 nəfər saxlanılıb. Daha sonra onlardan bir neçəsinin də üzərindən narkotik vasitə aşkar edildiyindən barələrində müvafiq maddələrlə ittiham irəli sürülüb. Saxlanılan şəxslərin də “Yetim Sabir”ə yaxınlığı olduğu bildirilir.
Foto: "Yetim Sabir"
Hüseyn Əliyevin işi ayrıca icraata verilib. Onun sözlərinə görə hadisədən bir həftə əvvəl Türkiyədə olub. O, dostu Kamranın dəvəti ilə Türkiyəyə istirahət üçün getdiyini, “Yetim Sabir”lə də görüşdüyünü etiraf edib.
Onun ifadəsindən məlum olub ki, saxlanılanlardan 7 nəfərin üzərindən narkotik vasitə aşkar edilərək götürülüb. O da həmin şəxslərin üzərinə baxış keçirilən zaman orada olub.
İttihamla özünü təqsirli bilməyən Hüseyn Əliyev 3 il müddətinə azadlıqdan məhrum edilib.
Qeyd edək ki, “Yetim Sabir” kimi tanınan kriminal avtoritet mərhum Lotu Qulinin (Nadir Səlifov) tərəfdarlarından sayılır. Onun Gürcüstanda saxlanılaraq Azərbaycana gətirilməsi ilə bağlı xəbərlər yayılsa da öz təsdiqini tapmadı. “Yetim Sabir”in Türkiyədə olması ilə bağlı məlumatlar var.
“Yetim Sabir” son olaraq kriminal aləmdə “Gəncəli Firdovsi” kimi tanınan Firdovsi Mustafayevlə mübahisəsi ilə gündəmə gəlmişdi. Hətta “Yetim Sabir”in “Gəncəli Firdovsi” tərəfindən bıçaqlandığı bildirilirdi.
İlkin Muradov
Musavat.com
XƏBƏR LENTİ
03 Fevral 2025
ŞƏRHLƏRŞƏRH YAZ