2022-ci il noyabrın 9-u səhər saat 5-də vətəndaş Samir Adıgözəlov Daxili İşlər Nazirliyinin "102" xidmətinə zəng edərək, Lökbatan dairəsi yaxınlığında naməlum şəxsin qətlə yetirilməsi haqda məlumat verib.

Bundan 40 dəqiqə sonra Rəşad Dağlı kimi tanınan meyxanaçı, 1984-cü il təvəllüdlü Rəşad Əmirov Yasamal rayon Polis İdarəsinin növbətçi hissəsinə yaxınlaşaraq təslim olub. O, Qaradağ rayonu ərazisində aralarında baş vermiş mübahisə zamanı İskəndər adlı şəxsi öldürməsini bildirib.

Məlum olub ki, hadisə Bakı-Qazax magistral yolunun Qaradağ rayonu ərazisindən keçən hissəsində, Kənar dairəvi yolunun 8-ci km-də baş verib. Prokurorluq və polis əməkdaşlarının hadisə yerinə keçirdikləri baxış zamanı sel sularının axıntısı üçün nəzərdə tutulmuş beton örtüklü arxda üzü üstə uzanıqlı halda kişi meyiti aşkar ediblər.

Rəşad Əmirovun idarə etdiyi “Niva” markalı (10-VR-009) avtomobilə baxış keçirilərkən, saxlanc yerdə kütlə və salonun bəzi yerlərində damcı halında qan ləkələrinin olması müəyyən edilib.
Faktla bağlı Qaradağ rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Məhkəmə-tibbi ekspertizasının rəyinə görə, İskəndər Mehdiyevin bədən səthində 14 ədəd bıçaq xəsarəti, qanında isə narkotik vasitə heroin və amfetamin aşkar edilib.

Narkoloji Mərkəzdə keçirilmiş tibbi müayinə əsasən, Rəşad Əmirovun qanında hər hansı narkotik maddə aşkar edilməyib. Narkoloji Mərkəzdən göndərilən məktuba əsasən, İskəndər Mehdiyev 2018-ci ildə “asılılıq sindromu” diaqnozu ilə könüllü surətdə stasionar müalicədə olub.

İskəndər Mehdiyev Ağır Cinayətlərə dair İşlər üzrə AR Məhkəməsinin 2005-ci il tarixli hökmü ilə Cinayət Məcəlləsinin 181.2.1-ci (quldurluq, bir qrup şəxs tərəfindən törədildikdə), Yasamal rayon Məhkəməsinin 2014-cu və 2022-ci il tarixli hökmləri ilə 234.1-ci (satış məqsədi olmadan narkotik vasitələri əldə etmə və ya saxlama) maddəlləri ilə məhkum olunub.

Lent.az məlum qətl hadisəsinin istintaq materiallarını əldə edib.
İstintaqla müəyyən edilib ki, oktyabrın 28-dən etibarən İskəndər Mehdiyev Rəşad Əmirova zəng vuraraq, guya onun cinsi azlıq nümayəndəsi olması barədə söz-söhbət yayıldığını və bununla bağlı sübutların olduğunu iddia edib. Həmin məsələyə birdəfəlik son qoyulmasından ötrü israrla onu görüşə dəvət edib. Buna görə Rəşad Əmirov onunla görüşmək qərarına gəlib. Noyabrın 9-u səhər saat 4 radələrində idarə etdiyi “Niva” markalı (10-VR-009) avtomobillə Biləcəri qəsəbəsi, Sumqayıt şossesi, 4 ünvanında yerləşən mağazaya gəlib ümumi təyinatlı, soyuq silah hesab edilən qatlanmayan bıçaq alıb.

Sonra İskəndər Mehdiyevin yaşadığı Yasamal rayonu, V.Əliyev küçəsindəki 52 nömrəli evin qarşısına gəlib, telefonla əlaqə saxlayaraq onunla görüşüb. Mehdiyev ön sağ oturacağa əyləşdikdən sonra, avtomobili Qaradağ rayonunun Lökbatan qəsəbəsi istiqamətində idarə edib. Kənar dairəvi yolun 14-cü kilometrliyindəki dairədən Yasamal rayonu istiqamətində geri qayıdarkən İskəndər ünvanına nalayiq ifadələr işlətib. Onun “üzdən iraq” olmasını bildirən şəxsləri susdurmaq üçün 3.000 manat pul tələb edib. Bundan hiddətlənən Rəşad Əmirov üzərindəki bıçaqla döş qəfəsinə, kürəyinə və belinə çoxsaylı zərbələr vuraraq, İskəndər Mehdiyevi öldürüb.

İş üzrə dindirilmiş Rəşad Əmirov bildirib ki, İskəndər Mehdiyevlə Yasamalda bir həyətdə böyüyüb, əvvəllər aralarında hər hansı ədavət olmayıb. İskəndər meyxanaçı Ələkbər Yasamallı ilə dayı oğlu – bibi oğlu olub:

“Son 4 il ərzində onu görməmişdim. Meyxana ustası olduğumdan, mütəmadi toy məclislərinə dəvətlər alırdım. Məclislərə dəvətləri birbaşa özüm qəbul etmirdim, danışıqları qardaşım Ağamalı Əmirov aparırdı. Oktyabrın axırlarında Ağamalı zəng vuraraq, İskəndər Mehdiyevin məni axtardığını dedi. Bunu ciddiyə almadım. Bilirdim ki, o, narkotik maddələrin satışı ilə məşğuldur və dəfələrlə məhkumluq həyatı yaşayıb. Bir neçə gündən sonra Ağamalı mənə yenə, İskəndərin dəfələrlə zəng vurub, onu bezdirdiyini dedi. Buna görə, məcbur qalıb ona zəng etdim. İskəndər bildirdi ki, mənimlə “ciddi” söhbəti var, ona görə də, üzbəüz görüşməliyik”.

Rəşad Dağlı

O, razılaşıb. İskəndərin yaşadığı ünvana istifadəsində olan “Niva” markalı (10-VR-009) avtomobillə gedib:

“Maşınıma əyləşən tanışımdan məni axtarmasının səbəbini soruşdum. İskəndər, cəzaçəkmə müəssisəsində olanda, bir nəfərin mənim “üzdən iraq” olduğumu söylədiyini dedi. Cavab olaraq ona bildirdim ki, bu yaxşı söhbət deyil, ona görə həmin adamın kimliyini mənə desin və nömrəsini versin. İskəndər dedi ki, həmin şəxslə görüşməyim məsləhət deyil, özü bu günlərdə onunla görüşüb bu məsələni yoluna qoyacaq. Sağollaşaraq, ayrıldıq. Telefonumu söndürdüm. 4-5 gündən sonra telefonu yandıranda İskəndər Mehdiyevdən mənə ismarıclar gəldiyini gördüm. İskəndər yazıb ki, “deyəsən sən məsələ ilə razılaşırsan, bu bizim adımıza ləkədir, üzə çıxmağa utanırsan, bu məsələni yoluna qoymaq lazımdır, üzə çıxmırsansa Yasamaldan 1-2 uşaq götürüb, söhbəti özümüz həll edək”. Sms-ləri oxuduqdan sonra bu haqda düşünməyə başladım. Məsələnin üstündən keçməyə çalışdım, beynimdə bunu götür-qoy etdim. Düşündüm ki, hər bir halda bu söhbət yayılsa xoşa gəlməyən vəziyyət yaranacaq. Odur ki, məsələni aydınlaşdırmaq üçün İskəndərə zəng vurmaq qərarına gəldim. Noyabrın 8-də “Monte Carlo” şadlıq sarayında el məclisində iştirak etdim. Ordan gecə saat 1 radələrində çıxdım. Avtomobili idarə edərkən həmin məsələni düşünürdüm. Qərara gəldim ki, İskəndər əsassız təhdidlə məndən pul almaq istəyir. Noyabrın 9-u gecə saat 3 radələrində zəng vurub ondan harda olduğunu soruşdum və evinin qarşısına yollandım. İskəndər gəlib avtomobilimə əyləşdi və dedi ki, məhəllədə dayanmayaq, ora söhbət yeri deyil. Şərifzadə küçəsində yerləşən “Asan xidmət”in inzibati binasının arxasından, Kənar Dairəvi yola çıxdım. “Binə” Ticarət Mərkəzi istiqamətində hərəkət etdim. Yol boyu dəfələrlə İskəndərə dedim ki, məsələni bağlayaq, olmayan söhbəti uzatmağın mənası yoxdur. Lakin İskəndər söhbəti uzatdı və danışığından belə çıxdı ki, guya mən “üzdən irağam”. O dedi ki, bu söhbəti edən adamın maddi problemi var, həmin şəxsə 6.000 manat pul lazımdır. 3000 manatını düzəldib, mən də 3.000 manat verim və bu söhbət bağlansın. Bu an, dəqiq bildim ki, bu söhbət məndən pul almaq üçün ortaya atılıb. İskəndərə sual verdim ki, əgər pul versəm onda “üzdən iraq” olmayacam, amma verməsəm olacam?! Cavab olaraq tanışım “bunu eləmisən, deməli verməlisən!” bildirdi. Aramızdakı mübahisə kəskinləşdi. İskəndər məni el-obaya üz qarası olmaqda ittiham edərək, söyüşlə danışmağa başladı. Ona tərəf çevriləndə əlində bıçaq gördüm. Onun söyüşlərinə söyüşlə cavab verdim”.

Rəşad ehtiyat edib ki, birdən qəflətən onu bıçaqla vurar. Avtomobilin sürətini azaldıb. Sağa əyilərək anidən bıçağı əlindən alıb:

“İskəndər ailəmi söydü, bıçağı geri almağa çalışanda, onun sinəsinə zərbə endirdim və sonra nə baş verdiyini xatırlamıram. İskəndərin hərəkətsiz vəziyyətdə qalmasından onun öldüyünü başa düşdüm. Avtomobildən düşüb, sərnişin qapısına yaxınlaşdım. Meyiti yolun kənarına atmaq qərarına gəldim. Arxadan avtomobillərin gəldiyini görüb, onların keçməsini gözlədim. Yol boşalan kimi qapını açdım. Cəsədin qolundan tutub, dartaraq onu salondan çıxartdım və digər əlimlə arxasından itələyib, yerə atdım. Həmin vaxt yanımdan “Toyota Prius” markalı, açıq yaşıl rəngli avtomobil keçdi. Maşından bıçağı götürdüm, onu da meyitin yanına tulladım. Bundan sonra avtomobilimə minib, Yasamal rayonunda yerləşən atamın yaşadığı evin qarşısına gəldim. Qardaşıma zəng vurub, İskəndəri bıçaqla vurduğumu və məni polisə aparmasını dedim. 5-10 dəqiqə sonra Ağamalı yanıma çatdı, gödəkçəm qana bulaşdığı üçün evə çıxmadım. Ağamalının avtomobili ilə Yasamal rayon Polis İdarəsinə getdim və hadisə barədə məlumat verərək, könüllü təslim oldum. Bir azdan Qaradağ rayon Polis İdarəsindən gələn əməkdaşları məni 10-cu bölməyə apardılar”.

İskəndər Mehdiyev

Əlavə dindirmə zamanı Rəşad Əmirov bildirib ki, Bakı-Sumqayıt yolu ilə hərəkət edərkən siqaret almaq üçün mağazaya girib. Siqaret alanda görüb ki, kassa olan masanın üstündə bıçaqlar var. İskəndərin “boş gəlmə” sözü yadına düşüb. Maşına əyləşib, bıçağı avtomobilin sürət qutusunun qolunun yanına qoyub və İskəndərin yaşadığı evin qarşısına gəlib. Yolda aralarında söhbət kəskinləşəndə İskəndər bıçağı həmin yerdən götürüb və əlində oynatmağa başlayıb. Birinci ifadəsində göstərdiyi kimi, İskəndər ondan həmin söhbətə görə pul ala bilməyəcəyini başa düşəndə, ağır söyüşlər söyməyə başlayıb. Ehtimal edir ki, bundan sonra o bıçağı İskəndərin əlindən alıb. Onun əvvəlcədən, həmçinin hadisə günü tanışına xəsarət yetirmək niyyəti yox imiş. Avtomobildə onunla İskəndərdən başqa heç kim olmayıb. Özü sol bilək nahiyəsindən xəsarət alıb, bunu hadisədən sonra görüb. İstifadəsindəki mobil telefonda SMS-ləri oxuduqdan dərhal sonra silib. Çünki onları görəndə əsəbləşib, həm də ehtiyat edib ki, birdən kimsə ismarıcları görər. Baxmayaraq ki, Mehdiyev göndərdiyi ismarıclarda onu kiminləsə söhbətə dəvət etsə də, hadisə günü bu söhbətləri yayanın adını çəkməyib. Avtomobildə dəfələrlə soruşsa da, ona ad deməyib. Pul verməyə etiraz edərək, İskəndərə deyib ki, “gedək bu sözü deyənlər mənə bunu sübut etsin”.

Zərərçəkmiş şəxsin hüquqi varisi Etibar Mehdiyev ifadəsində göstərib ki, qardaşı İskəndər evli olmayıb. İskəndər uşaq olanda başına dəmir darvaza aşıb, aldığı travma ilə əlaqədar onda psixi pozuntu yaranıb:

“Qardaşım narkotik vasitələrin istifadəçisi olub, 3 dəfə Cinayət Məcəlləsinin 234-cü maddəsi ilə məhkum olunub. Rəşad Əmirovun baba-nənəsi bizimlə qonşuluqda yaşayır. Rəşadı uşaq yaşlarından tanıyıram, münasibətimiz yaxşı olub. Axırıncı dəfə 10 ay əvvəl məhkum olunan İskəndər oktyabrın 26-da azadlığa buraxılıb. Qardaşımla bir evdə yaşamağıma baxmayaraq, Rəşadla arasında mövcud olan söhbətlər haqda məlumatım yox idi. Azadlığa çıxdıqdan 1-2 gün sonra İskəndər Rəşadı axtarmağa başlasa da, onu tapa bilməmişdi. Sonra tanışlarının vasitəsi ilə Əmirovun yeni telefon nömrəsini tapıb, onunla əlaqə yarada bilib. İskəndərin Rəşadı nəyə görə axtardığını hadisə gününə qədər bilmədim. Noyabrın 8-də gecə evdə idik. Ayın 9-u səhər saat 4 radələrində
qardaşım mənə Rəşadın evlərinə gələcəyini dedi. Əmirov əvvəllər bizə gəlib-gedən adam olsa da, son illər, demək olar ki, gəlməmişdi. Təxminən saat 4:30-da Rəşad İskəndərə zəng edib. Telefon danışığından sonra İskəndər aqresivləşib. Nə baş verdiyini soruşanda, qardaşım bildirdi ki, Rəşad barədə xoşa gəlməz söhbət var və buna görə, onlar harasa getməlidirlər”.

Nə məsələ olmasını təkrar soruşduqda, İskəndər bir kəlmə deyib ki, “Rəşad çaşsa, onu “vuracaq”:

“Sözlərindən elə başa düşdüm ki, söhbəti həll etmək, kimisə susdurmaq üçün pul vermək lazımdır. Sonra hazırlaşaraq, evdən çıxdı. Bıçaq və ya digər alət götürməmişdi. Hara gedəcəklərini soruşmadım. Münasibətlərinin mehriban olduğunu bildiyim üçün qardaşımın Əmirovu bıçaqla vuracağını ciddi qəbul etmədim. Saat 8 radələrində qohumlarım zəng vurub İskəndərin öldürülüldüyünü xəbər verdilər”.

Etibar Mehdiyev əlavə edib ki, qardaşının Rəşad Əmirovun “cinsi azlıq” olması ilə bağlı məlumatı hardan aldığını, bunun mənbəyini bilmir.

Şahid qismində dindirilmiş Ağamalı Əmirov bildirib ki, gecə saatlarında Rəşad zəng edərək, onu yanına çağırıb. Gödəkcəsi yaş olduğuna görə ondan yeni gödəkcə gətirməsini istəyib:

“Mənzilə qalxıb, qayıdanda onun həyətdə olmadığını gördüm. Rəşadın gözləri zəif olduğuna görə qaranlıqda avtomobil idarə edəndə əziyyət çəkirdi. Rəşadın həyətdə olmadığını gördükdə narahat oldum. Telefon zənglərinə cavab vermədi. Bundan bir saat sonra Rəşad zəng edərək, gəlib onu polisə aparmağımı bildirdi. Daha sonra birlikdə Yasamal rayon Polis İdarəsinə getdik. Yolda hadisə ilə bağlı sorğu-sual edəndə, o, şok vəziyyətində olduğundan açıqlama vermədi. İskəndər Mehdiyevi şəxsən yox, sadəcə meyxana ustası Ələkbərin qohumu kimi tanımışam. Hadisədən sonra internet portallarda şəklini görmüşəm. Menecer kimi qardaşımın işlərini gördüyümdən, hadisədən əvvəl İskəndər bir neçə dəfə mənimlə əlaqə saxlayaraq, Rəşadı soruşmuşdu. Toylarla əlaqədar mənə çox zəng gəldiyinə görə, İskəndərin zənglərini ciddi bir hal kimi qarşılamadım. Mehdiyev təkidlə yığaraq Rəşadla görüşmək istədiyini, onun özünə çatdırmalı sözü olduğunu bildirdi. Axrıncı dəfə, noyabrın 2-də İsgəndər zəng edəndə cavab vermədim. Ardınca yazdığı mesajda təcili Rəşadla danışmalı olduğunu yoxsa gec olacağını dedi. Bu barədə Rəşada məlumat verdikdə, qardaşım mənə İskəndərin nömrəsini bloka atmağımı dedi. Ələkbər Yasamallı xaricdə olduğundan İskəndər Rəşadla mənim vasitəmlə əlaqə saxlamağa çalışıdı. Qardaşım üzərində heç vaxt bıçaq gəzdirməzdi”.
Şahid Azər Quliyev ifadəsində göstərib ki, bibisi oğlu İskəndər Mehdiyevlə ancaq qohum kimi məclislərdə görüşüb. Rəşad Əmirov tez-tez onlara gəlib-gedib, Yasamalda məhəllə uşaqları olublar:

“İskəndər Mehdiyev əsəbi, xassiyətcə davaya meyli insan idi. Onun anası 2022-ci ilin oktyabr ayında vəfat edib. Cümə axşamı məclisində olanda, İskəndər telefonunda kontur olmadığını deyib, telefonumu istədi. Zəng vurduğu adam cavab vermədiyindən, telefonu qaytardı və bildirdi ki, əgər həmin nömrədən geri zəng gəlsə ona deyim. Sonra onun diktəsi ilə həmin nömrəyə “mənəm İskəndərdi, məni yığ” sözlərini yazıb göndərdim. SMS yazandan bir neçə saniyə sonra həmin nömrədən zəng gələndə, telefonu İskəndərə verdim.

Həmin şəxsə “səninlə işim var, telefon söhbəti deyil, görüşməliyik” sözlərini söylədi. Bundan sonra sağollaşdıq və bibim oğlu telefonu qaytarıb mənə təşəkkür etdi. Kiminlə danışdığını soruşmasam da, İskəndər özü dedi ki, danışdığı şəxs Rəşad Dağlıdır. Sonra otaqdan çıxdım və məclisə gələn insanlara qulluq etdim. İsmarıcı həmin gün telefonundan sildim. Noyarbın 9-da qohumlarımdan eşitdim ki, Rəşad İskəndəri öldürüb”.

Şahid Samid Adıgözəlov bildirib ki, əvvəllər fərdi qaydada taksi fəaliyyəti ilə məşğul olub. Xətai rayonunda yaşayır:

“Noyabrın 8-i saat 18 radələrində dostum Rüfətlə məhəllədə yerləşən çayxanada olanda, Rüfət dedi ki, səhər saat 8-də Lənkəran şəhərində işdə olmalıdır və onu Lökbatan dairəsinə aparmağımıı xahiş etdi. Ayın 9-na keçən gecə, saat 3:50-də yuxudan oyanaraq, evdən çıxdım və Rüfəti götürüb, “Toyota Prius” markalı avtomobillə Lökbatan istiqamətində hərəkət etdim. Gecə saatları olduğundan yolda avtomaşın az idi, bu səbəbdən saat 4:50-də deyilən yerdə Rüfəti düşürdüm. Yanacaq doldurmaq üçün Lökbatan dairəsindən Qazax-Bakı magistral yoluna çıxdım və təxminən 3-4 km hərəkət etdikdən sonra qarşıda, yolun sağ tərəfində qara rəngli “Niva” markalı avtomobilin dayandığını, bir nəfərin qapını açıb, oturacaqdan digər şəxsi dartıb, aşağı saldığını və beton örtüklü arxın yanına qoyduğunu gördüm. Bu an artıq “Niva”ya tam yaxınlaşdım. Dayanmadan avtomobili bir qədər qarşıya sürüb yolun sağında saxladım və işıqlarını söndürdüm. Düşündüm ki, maşından çıxarılan şəxs qadındır və aralarında narazılıq yaranıb deyə həmin şəxs qadını orda qoyub gedəcək. Ona görə də, gözləmək və qadını ordan götürüb, evlərinə çatdırmaq qərarına gəldim. 1-2 dəqiqədən sonra “Niva”nın sürətlə keçdiyini görüb, avtomobili arxaya, geriyə hərəkət etdirərək, həmin yerə getdim. Maşından düşmədən gördüm ki, bir nəfər kişi cinsli şəxs uzanıqlı vəziyyətdədir, paltarları qana bulaşıb, tərpənmədiyindən, öldüyünü başa düşdüm. Mühərriki işə salıb, “Niva”ya çatmaqdan ötrü sürətlə hərəkət etdim və telefonla “102” Çağrı mərkəzinə zəng edərək hadisə barədə məlumat verdim.

“Niva”ya çatıb, nömrəsinin 009 olduğunu gördüm. Ötmə əməliyyatı edib yanından keçəndə, gördüm ki, sürücü təkdir, ondan başqa maşında heç kim yoxdur. Onu tanımadım. Sürücü maşınını mənə tərəf baxmadan idarə edirdi. Yol ayrıcından geri dönərək, yenə Lökbatan dairəsinə tərəf getdim. Ora yaxınlaşanda mobil telefonuma zəng gəldi. Danışan şəxs özünü Qaradağ rayon Polis İdarəsinin əməkdaşı kimi təqdim edərək xidməti avtomobil ilə məni Lökbatan dairəsində gözlədiklərini dedi.

Ora çatıb, polis əməkdaşlarına işarə etdim ki, arxamca gəlsinlər. Onları hadisə yerinə apardım. Meyitin üzü üstə arxın içərisində uzanıqlı halda, ətrafın qan, yanında tiyəsi qana bulaşmış bıçaq olduğunu gördük. Hadisə yerinə prokurorluq əməkdaşları və əməliyyatçılar gəldilər. Sonra cəsəd müayinə üçün pataloji anatomiya şöbəsinə aparıldı”.

Hadisə yerində olduğu müddətdə polis əməkdaşlarının sözlərindən bilib ki, qətlə yetirilən şəxsin adı İskəndərdi və onu meyxanaçı Rəşad Dağlı öldürüb. Mobil telefonu ilə onun, meyiti avtomobildən dartıb, yerə salması anını video və və ya foto görüntüsünü çəkməyib. Rəşad Əmirovla şəxsi tanışlığı olmayıb, onu meyxanaçı kimi yalnız müxtəlif televiziya verilişlərində görüb.

Şahid Xankişi Cəfərquliyev ifadəsində göstərib ki, meyxanaçı Rəşad Dağlı noyabrın 8-i səhər saat 4 radələrində onun işlədiyi mağazaya gəlib, iki qutu siqaret və bir ədəd bıçaq alıb:

“Aldığı mallara görə təxminən 45 manat ödədi. Aldığı bıçağın tiyəsi gümüşü rəngli və dəri materialdan olan qabı vardı. Rəşad Əmirovdan aldığı bıçaq barədə heç nə soruşmadım”.

Quraşdırılmış kameradan görüb ki, o, qara rəngli “Niva” markalı avtomobilə minərək gedib.
Məhkəmə iclasında Rəşad Əmirov ibtidai istintaq dövründə verdiyi ifadəsini təsdiq edərək, heç vaxt soyuq silah gəzdirməməsi səbəbindən Cinayət Məcəlləsinin 228-ci maddəsi ilə elan edilmiş ittihamla razılaşmadığını bildirib.

Zərərçəkmiş şəxsin hüquqi varisi bildirib ki, təqsirləndirilən şəxslə barışıb və ona qarşı şikayəti yoxdur.

Məhkəmə təqsirləndirilən şəxsin himayəsində azyaşlı uşaqlarının olmasını, cinayəti zərərçəkmiş şəxsin qanunsuz hərəkətlərinin təsiri altında baş verməsini, könüllü gəlib təqsirini boynuna almasını və zərərçəkmiş şəxsin hüquq varisi ilə barışıq əldə etməsini yüngülləşdirici hallar kimi nəzərə alıb. Onun cəzasını ağırlaşdıran hallar müəyyən edilməyib.

Məhkəmə qənaətə gəlib ki, Rəşad Əmirov qanunsuz olaraq soyuq silah əldə edərək, İskəndər Mehdiyevi qəsdən öldürüb. Bununla da onun Cinayət Məcəlləsinin 120.1-ci (qəsdən adam öldürmə) və 228.4-cü (qanunsuz olaraq soyuq silahı əldə etmə, satma və ya gəzdirmə) maddələrində nəzərdə tutulmuş cinayət əməllərini törətməsi tam sübuta yetirilib.

Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə Rəşad Əmirov 9 il 6 ay müddətinə azadlıqdan məhrum olunub.