Onlayn ictimai-siyasi qəzet
Özünü Məleykə Abbaszadənin qohumu kimi təqdim edən şəxsdən xəbər var- Həbsdədir
Özünü Dövlət İmtahan Mərkəzinin İdarə Heyətinin sədri Məleykə Abbaszadənin qohumu kimi təqdim edərək külli miqdarda dələduzlquda ittiham olunan şəxs növbəti dəfə hakim qarşısına çıxarılıb. O, anasının Məleykə Abbaszadə ilə xalaqızı olduğunu deyirmiş.
Musavat.com xəbər verir ki, təqsirləndirilən şəxs 1984-cü il təvəllüdlü Xəyal Abdıyevdir.
O, özünü yüksəkvəzifəli şəxs kimi təqdim edərək bir neçə vətəndaşı aldadıb və onlardan külli miqdarda pul alıb. Onun barəsində Cinayət Məcəlləsinin 178.3.2-ci (külli miqdarda dələduzluq) maddəsi ilə iş açılıb.
Maraqlıdır ki, X.Abdıyev taksi kimi sürdüyü maşına müştəri qismində əyləşmiş xanıma özünü SOCAR-ın Səngəçalda yerləşən terminalının direktoru kimi təqdim edib. Sonra Abdıyev həmin qadınla ailəvi münasibət qurub. Onun həyat yoldaşını SOCAR-da sürücü kimi işə düzəldəcəyini, iki qohumunu gəmidə aşpaz vəzifəsinə təyin etdirəcəyini, Nuranənin əri ilə Salyanda üzüm bağı salaraq böyük gəlir əldə edəcəklərini və sair vədlər verərək qadının özündən və bir neçə qohumundan külli miqdarda pul alıb. O, təkcə üzüm bağı salmaq adı ilə qarşı tərəfdən 60 min manat pul alaraq ələ keçirib.
X.Abdıyev daha iki nəfəri aldadaraq onları məktəbə müəllim kimi işə düzəldəcəyi və ali məktəbə qəbul olmaq üçün balını süni şəkildə artıracağına vəd verərək hər birindən 10 min manat alıb.
Aldadıldığını bilən zərərçəkmiş şəxslər taksi sürücüsündən polisə şikayət ediblər və onun barəsində cinayət işi açılaraq həbs edilib. Onlar ifadələrində X.Abdıyevin inandırıcı danışdığını və vədlərinə inandıqlarını deyiblər. X.Abdıyevin daha əvvəl də dələduzluq əməlinə görə məhkum edilməsi üzə çıxıb.
Bakı Ağır Cinayətlər Məhkəməsinin hökmü ilə X.Abdıyevə 7 il həbs cəzası alan Abdıyev hökmdən narazı qalaraq apelyasiya şikayəti verib. Məhkəmə onun şikayətini təmin etməyib. Ali Məhkəməyə də üz tutan Abdıyev burada da nəticə ala bilməyib və cəzası qüvvədə saxlanılıb.
İ.Muradov
Musavat.com
ŞƏRHLƏRŞƏRH YAZ