Onlayn ictimai-siyasi qəzet
NATO-ya soyuq duş: ABŞ hərbi qüvvələrini Asiyaya köçürür
"ABŞ müdafiə naziri Pit Heqset NATO-dakı tərəfdaşlarını tənqid edərkən, Yaponiyanı etibarlı müttəfiq adlandırıb".
Bu barədə Musavat.com-a açıqlamasında politoloq Elxan Şahinoğlu deyib.
Politoloq qeyd edir ki, ABŞ Avropadakı hərbi qüvvələrin sayını azaltmaq barədə düşünərkən, Yaponiyadakı hərbi qüvvələri azaltmağı planlaşdırmır:
"Bu o deməkdir ki, Ağ Ev administrasiyasının təhlükəsizlik prioritetləri Qərbdən Şərqə yönlənib. Bu mənada Pentaqon başçısı mart ayında işçilərinə verdiyi təlimatda Tayvanın müdafiəsinə diqqətin artırılması və adanın Çindən qorunması vacibliyini bildirib. Halbuki Ağ Ev administrasiyası Ukraynanın qorunması və təhlükəsizliyini Avropaya yükləmək istəyir.
“The Wall Street Journal” dərgisində yayımlanan məqalədə, Pentaqon rəhbəri ABŞ hərbi qüvvələrinin köhnə qitədə azaldılacağı barədə avropalı həmkarlarını xəbərdar edib. Pit Heqset mart ayında Tokioya səfəri zamanı isə əksinə, ölkəsinin Yaponiya ilə hərbi sahədə əməkdaşlığından məmnun qaldığını bildirib. O Yaponiyanı Çin Kommunist Partiyasının artan hərbi aqressiyasının qarşısını almaqda əvəzolunmaz tərəfdaş adlandırıb. Pit Heqset yaponiyalı həmkarı Qen Nakatani ilə görüşdə Çinin artan hərbi fəaliyyəti və Tayvan ətrafında mümkün fövqəladə vəziyyət fonunda ABŞ-ın Yaponiya ilə hərbi potensiallarını daha sürətli şəkildə gücləndirməsi vaciblidiyini söyləyib. ABŞ Yaponiya ilə birgə silah istehsalını, o cümlədən “hava-hava” raketlərinin təkmilləşdirilmiş planlaşdırır. Bundan başqa, ABŞ hərbi gəmilərinin və təyyarələrinin Yaponiyada texniki baxış və təmir prosesinin sürətləndirilməsi barədə razılıq var. Vaşinqton Yaponiya ilə bağlı başqa vacib qərar da verib: ABŞ-nin Yaponiyadakı hərbi komandanlığının statusu yüksəldilib. Yeni komandan həm Yaponiyadakı amerikalı qüvvələrə rəhbərlik edəcək, həm də yapon həmkarı ilə koordinasiyanı təmin edəcək. Əslində Yaponiya ilə hərbi sahədə əməkdaşlığın genişləndirilməsi siyasəti keçmiş Co Bayden administrasiyası dönəmində başlamışdı, Donald Tramp bu siyasəti davam etdirmək əzmindədir. ABŞ-ın Yaponiyada hərbçilərinin sayı 50 minə yaxındır".
Elxan Şahinoğlu qeyd edir ki, ABŞ-la hərbi əməkdaşlığın genişləndirilməsi Yaponiya üçün son dərəcə vacibdir:
"Çinin Tayvanla yanaşı Yaponiyanın bir neçə adasında da iddiası var. Çin Rusiya ilə birgə Yaponiya sahillərinə yaxın sularda birgə hərbi təlimlər keçirir. Yaponiya Çin-Rusiya ittifaqına qarşı ABŞ-ın dəstəyinə arxayındır".
Xalidə Gəray
Musavat.com
XƏBƏR LENTİ
06 Aprel 2025
ŞƏRHLƏRŞƏRH YAZ