Onlayn ictimai-siyasi qəzet
Millətçi yəhudilər “ərəblərə ölüm” şüarları ilə yürüş etdilər
Mayın 26-da minlərlə israilli millətçi Qüdsün (Yerusəlim) müsəlman məhəllələrinə yürüş edərək şəhərin şərq hissəsinə İsrailin nəzarətini qeyd edən mitinq keçiriblər.
Musavat.com xarici mediaya istinadla xəbər verir ki, tədbir “Ərəblərə ölüm” və “Qoy sənin kəndin yansın” daxil olmaqla, ərəblərin əleyhinə şüarların səsləndirilməsi ilə müşayiət olunub.
Yürüş ənənəvi olaraq 1967-ci il “Altı günlük müharibə” nəticəsində şəhərin şərq hissəsinin, o cümlədən yəhudilik, xristianlıq və İslamın müqəddəs yerləri olan içəri şəhərin İsrailin nəzarətinə keçməsini qeyd edən “Qüds günü”ndə keçirilib.
Tədbiri “Bayraqların rəqsi” adlandıran polis bir neçə nəfərin saxlandığını bildirib və “zorakılığın, toqquşmaların və təxribatların qarşısını almaq üçün cəld hərəkətə keçdiklərini” qeyd edib.
Baş nazir Benyamin Netanyahu Şərqi Qüdsdə, Fələstin məhəlləsində yerləşən arxeoloji parkda çıxış edərək, "vahid, toxunulmaz Qüdsü və İsrailin suverenliyini qoruyub saxlayacağına" söz verib. O, həmçinin qeyd edib ki, hökumət xarici səfirlikləri Qüdsü İsrailin paytaxtı kimi tanımağa çağırır və şəhərin inkişafına əhəmiyyətli vəsaitlər yatırmaq niyyətindədir.
Qüdsdə fələstinlilərlə işləyən sülhməramlı təşkilatın və “Azad Qüds” kollektivinin könüllüləri gərginliyin qarşısını almaq üçün yürüş iştirakçıları ilə yerli sakinlər arasında dayanmağa çalışıblar. Bir mağaza sahibinin yürüş iştirakçıları tərəfindən səpələnmiş dəfnə yarpaqlarını yığışdırması və bir qrup gənc israillinin fələstinli qadını təqib etməsi, onun ünvanına “charmuta” (ərəb söyüş sözü) daxil olmaqla, təhqirlər səsləndirməsi ilə bağlı şiddətli davranışlar barədə məlumatlar var.
Qüdsün statusu İsrail-Fələstin münaqişəsində ən aktual və mürəkkəb məsələlərdən biridir. İsrail bütün şəhərə özünün əbədi və bölünməz paytaxtı kimi baxır, lakin Şərqi Qüdsün ilhaqı beynəlxalq səviyyədə tanınmayıb. Fələstinlilər isə öz növbəsində paytaxtı Şərqi Qüds olan müstəqil dövlət yaratmağa çalışırlar.
Musavat.com
XƏBƏR LENTİ
30 May 2025
ŞƏRHLƏRŞƏRH YAZ