Onlayn ictimai-siyasi qəzet
İspaniya Bakıda həbsdə olan ukraynalı eks-nazir müşavirinin ekstradisiyasını tələb edir
Bakı Ağır Cinayətlər Məhkəməsində Ukraynada nazir müşaviri olmuş Konstantin Kuçer və Azərbaycanda daha çox Oleq Bakinski kimi tanınan Oleq Andreyeviç Krapivinin cinayət işi üzrə məhkəmə prosesi davam etdiriləcək.
Musavat.com xəbər verir ki, cinayət işi hakim Elnur Nuriyevin sədrliyi ilə araşdırılır.
İş üzrə zərərçəkən statusunda isə ABŞ sanksiyaları altına düşən Rusiya Müdafiə Nazirliyi ilə əlaqəli “Aviazapchast” ASC-nin sahibi Valeriy Nikolayeviç Zaxarenkovdur.
Rusiya Federal Təhlükəsizlik Xidmətinin əməkdaşı olan Valeriy Zaxarenko Bakıya lisenziyası ləğv edilmiş “Günay Bank”dakı hesabda olan bir neçə milyon avro pulla bağlı gəlib. Lakin bank bağlandığından həmin pulları bankdan çıxarmaq problemi ilə üzləşib.
Bu problemi yoluna qoymaq üçün Oleq Bakinski, Konstantin Kuçer ilə Valeriy Zaxarenkonun görüşü təşkil olunub. Onların görüşü Xətai rayonunda yerləşən “Babək Plaza”da baş tutub. İttihama görə, görüş zamanı tərəflər ortaq məxrəcə gələ bilməyiblər və aralarında mübahisə düşüb. Oleq Bakinski şüşə butulka ilə Zaxarenkoya xəsarət yetirib.
Bundan sonra FTX zabiti Valeriy Zaxarenkoya tibbi yardım göstərmək üçün onu Yeni Klinikaya aparıblar.
Oleq Bakinski ittihamı qətiyyətlə rədd edir. Valeriy Zaxarenko ilə bəlli olan budur ki, onun rəhbərlik etdiyi “Aviazapchast” Açıq Səhmdar Cəmiyyəti (ASC) 2020-ci ildən ABŞ Dövlət Departamentinin sanksiyaları altına düşüb. Sanksiya tətbiqi şirkətin İran, Şimali Koreya və Suriyaya münasibətdə Kütləvi Qırğın Silahlarının (KQS) yayılmaması ilə bağlı Amerika qanunvericiliyini pozması ilə əsaslandırılıb.
Müttəhim Konstantin Kuçerə qarşı “Aviazapchast” Açıq Səhmdar Cəmiyyəti adından 1 milyon manat, “Promyshlennye Postavkı Kazakhstan” Məhdud Məsuliyyətli Cəmiyyəti isə 5 milyon 184 min manatlıq iddia qaldırıb.
Valeriy Zaxarenko Konstantin Kuçerlə yanaşı, Oleq Bakinskiyə qarşı da mülki iddia verib. Zərərçəkən onların hər birindən 50 min manat tələb edir.
Məhkəmə mülki iddiaları icraata qəbul edib. Hakim mülki iddialarla bağlı məhkəmənin sonunda qərar veriləcəyini açıqlayıb.
Konstantin Kuçer xuliqanlıq və dələduzluqda, Oleq Bakinski isə az ağır xəsarət yetirmə, xuliqanlıqda ittiham olunur. Konstantin Kuçer vaxtilə Ukrayna Müdafiə Nazirliyinin aviasiya məsələləri üzrə müşaviri olub. O, məhkəmədə tərcüməçinin xidmətindən istifadə edir. Oleq Bakinski isə Azərbaycan dilində sərbəst danışdığından tərcüməçi xidmətindən imtina edib.
Konstantin Kuçer də ittihamı qəbul etmir, özünü təqsirli bilmir.
Prosesdə Konstantin Kuçerin vəkili Elşad Əliyev vəsatət qaldırıb.
O bildirib ki, müvəkkilinin İspaniya Krallığına ekstradisiya olunması ilə bağlı məsələdə nəticəyə gəlinməsi üçün hazırkı cinayət işinin icraatının dayandırılmasını istəyib:
"Müvəkkilim hüquqi tələnin içindədir. Cinayət işinin icraatı dayandırılsın, ekstradisiya məsələsi aydınlaşdırılsın. Ondan sonra bu məsələ üzrə araşdırma aparılsın.
Müvəkkilim bilmir ki, onun barəsində hansısa yüngülləşdirici hallar olacaq, yoxsa İspaniyaya ekstradisiya olunacaq".
Dövlət ittihamçısı Tural Yaqubov bildirib ki, hazırkı cinayət işinin ekstradisiya olunması ilə bağlı işlə heç bir əlaqəsi yoxdur. O, vəsatətin təmin olunmamasını istəyib.
Qeyd edək ki, İspaniya Krallığı Konstantin Kuçer barəsində olan cinayət işi ilə bağlı axtarış elan edib və onun Azərbaycandan ekstradisiya olunması barədə vəsatət verib. Həmin vəsatət əsasında işə də Bakı Ağır Cinayətlər Məhkəməsində ayrıca icraatda baxılır. Yerində müşavirə keçirən hakimlər heyəti vəsatəti təmin etməyib.
Daha sonra sənədlərin tədqiqi mərhələsi başlayıb. Məhkəmə iclasında məlum olub ki, Konstantin Kuçerlə zərərçəkmiş şəxslər arasında heç bir barışıq əldə olunmayıb. Bununla bağlı hakimin suallarına cavab olaraq zərərçəkmiş şəxsin vəkili Samir İsayev bildirib.
Təqsirləndirilən şəxsin də vəkili tərəflər arasında qarışığın olmadığını deyib. Daha sonra Oleq Bakinskinin vəkili vəsatət verib.
O bildirib ki, müvəkkilin sağlamlığında ciddi problemlər var:
"Həbs olunmamışdan əvvəl Almaniyada müalicə olunub. Hazırda saxlanma yerində müalicəsinin aparılması üçün şərait yoxdur. Buna görə də onun barəsində seçilmiş həbs qətimkan tədbirinin ev dustaqlığı ilə əvəz olunmasını istəyirik. Həm yaşını, həm də xəstəliyinin nəzərə alınmasını xahiş edirik".
Dövlət ittihamçısı deyib ki, qətimkan tədbirinin dəyişdirilməsi ilə bağlı hər proses vəsatət verilir. O, vəsatətin təmin olunmamasını istəyib.
Müşavirə keçirən hakimlər qərar elan edib. Qərara görə, vəsatət təmin olunmayıb.
Rusiya-Ukrayna müharibəsindən əvvəl Oleq Bakinski Ukraynada Azərbaycan diasporunun ən parlaq üzvlərindən olub. O, Kiyev Azərbaycanlıları Konqresinə rəhbərlik edib. Oleq Bakinski 1960-cı il sentyabrın 29-da Şamaxı rayonunun Şəhriyar qəsəbəsində anadan olub. 1966-cı ildə ailəsi ilə birlikdə Bakıya köçüb. İlk təhsilini Sabunçu qəsəbəsi, 68 saylı orta məktəbdə alsa da, sonra təhsilini Bakıxanov qəsəbəsində yerləşən idman təmayüllü internat məktəbində davam etdirib. 2007-ci ildə Türkiyənin İstanbul şəhərində veteranlar arasında keçirilən yarışda sərbəst güləş üzrə dünya çempionu adını qazanıb.
Adı Bakı ilə bağlı olsa da, o, 1989-cu ildən Kiyev şəhərində yaşayıb. 30 ilə yaxın Ukraynada yaşadığı dövrdə Kiyevdə “Bakines” adlı güləş klubu yaradıb.
Azərbaycanla sıx əlaqələrinə görə Şamaxıda güləş məktəbi açıb. Şamaxıda onun şərəfinə güləş turniri də keçirilib. Son illər Ukraynaya girişi qadağan edilmişdi və Bakıda yaşayırdı. Oleq Bakinski milliyyətcə rus olsa da, özünü həmişə azərbaycanlı hesab edib.
Müsahibələrində toyunu belə Azərbaycan adət-ənənələrinə uyğun keçirdiyini açıqlayıb.
“Uşaqlığımın ən gözəl illəri həm də Sabunçu ilə bağlıdır. Böyüdüyüm məhəllənin küçələri, tinləri, insanları hələ də gözümün önündə canlanır. Güləşə olan marağım isə məni bu idman növü ilə daha peşəkar şəkildə məşğul olmağa vadar etdi. Buna görə də oxuduğum 68 nömrəli məktəbdə təhsilimi yarımçıq qoyub, “Razin”dəki idman təmayüllü internat məktəbinə getdim. Beləcə həyatımın ayrılmaz hissəsi olan güləşçi karyeram başladı”, - deyə Oleq Bakinski müsahibələrindən birində qeyd etmişdi.
Rusiyanın Ukraynaya qarşı elan edilməmiş müharibə başlatdığı gün Oleq Krapivin həmyerlilərimizə dəstək verən tək-tük şəxslərdən biri olub. Azərbaycanın Ukraynadakı səfirinin biabırçı qaçışı fonunda Oleq Krapivin qısa müddətdə həmyerlilərimizi bomba yağışı altından çıxarıb Azərbaycana göndərilməsində də fəal iştirak edib. Onun Azərbaycan adına və həmyerlilərimizə verdiyi dəstək saymaqla bitməz. Maraqlı qüvvələrin səyi nəticəsində 2022-ci il iyunun 26-dan Oleq Krapivinin Ukraynada yaşama izni ləğv olunub. Həmçinin onun hər hansı formada Ukrayna ərazisinə girişinə də qadağa qoyulub. Bundan başqa, Ukrayna hüquq-mühafizə orqanlarının təqdimatı əsasında 27 yanvar 2023-cü ildə keçirilən məhkəmədə Oleq Krapivinin oğlu Sultanbəy haqda cinayət işi başlanıb, qanunsuz olaraq ölkəni tərk etdiyi üçün axtarışa verilib.
Növbəti proses mayın 2-də davam edəcək.
E.MƏMMƏDƏLİYEV,
Musavat.com
XƏBƏR LENTİ
26 Aprel 2025
ŞƏRHLƏRŞƏRH YAZ