Onlayn ictimai-siyasi qəzet
Deputat Elgün İbrahimovun ölümündən danışdı
Milli Məclisin hazırda davam edən plenar iclasında çıxış edən deputat Elnarə Akimova son günlər ölkəni silkələyən cinayət hadisəsindən, Gəncədə müəmmalı şəkildə dünyasını dəyişən 17 yaşlı məktəbli Elgün İbrahimovdan danışıb.
Musavat.com-un xəbərinə görə, Elgün İbrahimovun ölümünün bütövlükdə cəmiyyəti sarsıtdığını deyən deputat üç il öncə baş verən digər hadisədən də bəhs edib:
“Xatırlayırsınızsa, 2022-ci ilin noyabrında da Şağan Olimpiya Kompleksində Turan Rüstəmov adlı 16 yaşlı bir gənc öldürülmüşdü. Hər dəfə belə qətllər ardınca böyük müzakirə dalğası gətirir, səbəblər üzərində düşünməyə başlayırıq, çünki doğrudan da büyük bir mənəvi zərbə alırıq. Bu ağrını hamımız canımızda hiss edirik. Niyə belə olur, gələcək faciələrin qarşısını almaq üçün nə etmək olar?
Burada biz nə etsək də, bütün problemlərimizin kökü ilk növbədə təhsilə gedib çıxır”.
E.Akimova vəziyyətlə bağlı təklif səsləndirib:
“Düşünürəm ki, bu gün məktəblərdə psixologiya fənninin dərinləşməsinə diqqət yetirilməlidir. Psixoloqlarımızın məktəblərə cəlb olunmasına və onlara ayrılmış zaman çərçivəsində həqiqətən də məktəblilərlə psixoloji təlimlər keçilməsinə, psixoloji hazırlıqlara rəvac verilməsinə çox böyük ehtiyac var.
O qədər ciddi şəkildə yanaşılmalıdır ki, psixologiya peşəsinə sahib olanlar bura cəlb olunmalıdırlar. Yəni kimya müəllimi, fizika, texnologiya, yaxud biologiya müəllimi gəlib psixologiya fənini tədris eləməməlidir. Əks təqdirdə bu, heç bir nəticə verməyəcək.
Unutmayaq ki, bu günün məktəblisi təkcə riyaziyyat testini yox, boşanmış ailə mühitini, depressiyanı, zorakılığı, özünü ifadə edə bilməmək ağrısını, ailə gözləntilərini, kiber zorakılığı və özgüvən çatışmazlığını da daşıyır.
Bu işə doğrudan da işin peşəkarları, bu ixtisası daşıyanlar cəlb olunmalıdır ki, məlum yükü daşımağa həm səlahiyyəti, həm də qüdrəti çatsın”.
Deputat ardınca bildirib:
“Bu gün aydın məsələdir ki, məktəblərimizdə mütaliəsiz bir nəsil yetişir. Dil çevrəsi qapanmış, xəyal dünyası daralmış, beyinləri kilidlənmiş, ədəbiyyatdan uzaq düşən bir nəsil yetişir və bu, artıq böyük bir problemə çevrilməkdədir.
Mən dəfələrlə bu məsələni aktuallandırmışam ki, təhsilimizdə, dərsliklərimizdə ədəbiyyatımıza diqqət bir başqa olmalıdır. Çünki ədəbiyyat daha çox mənəviyata toxunan bir sahədir, mənəviyata xidmət edən bir sahədir. Amma baxaq görək, dərs yükünün ağırlığı uşaqlara mütaliə üçün imkan verirmi?
Heç təsadüfi deyil ki, Prezident İlham Əliyev bu ayın 10-da Ağdamda Kəngərli sakinləri ilə görüşdə qalib olmağımıza əsas səbəb kimi bizim mənəviyyatımızı, ədəbiyyatımızı, mədəniyyətimizi, ailə və məktəbi göstərdi. Bu mənəviyyat, mədəniyyət təməllərini qorumaq lazımdır.
Baxın, Prezident Qarabağda sıfırdan başlayaraq necə böyük işlər görür. Bizim axı bu gün bütün sahələrdə yaxşı ənənəmiz var, bizim ədəbiyyət ənənəmiz var, bizim mədəniyyət ənənəmiz var, sadəcə o təməlllərin laxlamasına imkan verməməliyik. Yaranmış boşluqlarımıza diqqət yönəltməliyik. Məsələn, məktəblərdə bizim şagirdlərin saç düzümü, geyimi, yəni bunlar diqqət mərkəzində olmalıdır.
Məktəb yalnız sertifikasiya imtahanları üçün sınaq meydanı deyil. Məktəb əxlaqı, dünyagörüş və yüksək mənəviyyatı formalaşdıran bir ocaqdır. Ona görə bu qism məsələlərdə həssas davranmalı, gecikməməliyik.
Gecikəndə, bax belə adda-budda da olsa neqativləri çıxır və bu neqativlərin böyük bir dalğaya çevrilməməsi üçün düşünürəm ki, bir cəmiyyət olaraq doğrudan da narahat olmalı və işlər görməliyik. Biz bu yolla uşaqlarımızı böyük bəla olan narkomaniyadan da uzaqlaşdıra bilərik”.
E.Akimova qeyd edib ki, psixoloji durumu yerində olmayan yeniyetməni narkotiklərə öyrəşdirmək daha asandır:
“Bu mənada psixoloqların üzərinə böyük iş düşür. Bu məsələ inzibati yox, strategiya məsələsidir. Elm və Təhsil Nazirliyi və dövlət bu sahəni sıradan bir kadr problemi kimi deyil, uşaq hüquqları və cəmiyyətin gələcəyi kimi görməlidir. Elə məsələlər var ki, onların müzakirəsi hansısa bir cariliyə, gündəm müzakirəsinə bağlıdır. Gəlir, müzakirə olunur və keçib gedir. Bir mövzu isə hər bir zaman prioritet olmalıdır hər bir xalqın, dövlətin qarşısında. Bu da maarifçilikdir.
XX əsrin əvvəllərində Ömər Faiq Nemanzadə deyirdi ki, işığımız sönməyəcək. Deyirdi və bunun üçün addımlar atırdı. Biz də o işığı qorumalıyıq ki, gələcək faciələrin, gənclərin ölümlərinin qarşısını ala bilək”.
E.Paşasoy,
Musavat.com
XƏBƏR LENTİ
23 May 2025
ŞƏRHLƏRŞƏRH YAZ