Onlayn ictimai-siyasi qəzet
“Burada kişi kimi bir bu adamı gördüm” – Ağadadaş Ağayev məhkəmədə barışıqdan danışdı
Bu gün, yanvarın 16-da Binəqədi Rayon Məhkəməsində Xalq artisti Ağadadaş Ağayevin tərəf olduğu 3 iş üzrə proses var. Həmin proseslərdən ikisi cinayət işi, digəri biri isə mülki xarakterli olub.
Musavat.com xəbər verir ki, artıq işlərdən ikisi üzrə məhkəmə baxışı baş tutub. Xəbər verdiyimiz kimi Ağadadaş Ağayev “MedEra Hospital” mənəvi zərərin ödənilməsi tələbi ilə, “MedEra Hospital”ın rəhbəri Qaraxan Əliyev Ağadadaş Ağayevə qarşılıqlı mülki iddia qaldırmışdı. Xalq artisti mənəvi ziyana görə klinikadan 450 min manat, hospital rəhbəri isə Ağadadaş Ağayevdən 500 min manat pul tələb edirdi. Bu gün hakim Etibar Mustafayevin sədrliyi ilə keçirilən prosesdə tərəflər məhkəməyə barışıq sazişi təqdim ediblər. Məhkəmə barışıq sazişini nəzərə alaraq icraata xitam verib.
1 saatlıq fasilədən sonra Ağadadaş Ağayevin tərəf olduğu daha bir cinayət işi üzrə proses hakim Elçin Ağayevin sədrliyi ilə davam etdirilib. Bu prosesdə Xalq artisti ilə insident yaşayan “MedEra” Hospitalın mühafizəçisi Nurəddin Cəlilovun müttəhim statusundadır.
Musavat.com xəbər verir ki, hakim Elçin Ağayev prosesdə Ağadadaş Ağayevdən məhkəməyə müraciət daxil olduğunu elan edib. 44 saylı Notariat Kontorunda imzalanan sənəddə Ağadadaş Ağayev balta atdığı mühafizəçi Nurəddin Cəlilovla barışdıqlarını, ona qarşı hər hansı bir tələbinin olmadığını, mühafizəçi barəsindəki cinayət işinə işinə xitam verilməsini xahiş edib.
Bundan sonra prosesdə şahidlər dindirilib. Şahid Zaur Rüstəmov taksi sürücüsüdür. Sərbəst ifadəsindən məlum olub ki, insident yaşanan ərazidə taksi fəaliyyəti ilə məşğuldur. Amma o, hadisə baş verən gün səhər ərazidə olmadığından müvafiq olaraq baş verənləri də biləvasitə görməyib:
“Mən hospital ətrafında taksi sürücüsü kimi fəaliyyət göstərirəm. Hadisə zamanı orada olmamışam. Bu barədə eşitmişəm və videogörüntüləri izləmişəm. Həmin zaman müştərim olub deyə ərazidə olmamışam”.
Növbəti şahid Firdovsi Səfərov da taksi sürücüsüdür. Şahid qismində ifadəsində iddia edib ki, Ağadadaş Ağayevin əlində baltanı görməyib. Həmin gün səhər eşidib ki, ətrafdan söyüş səsləri gəlir: “Ətrafa nəzər saldıqda gördüm ki, Nurəddin söyüş söyür. Söyüşlər qarşılıqlı idi. Ondan kimi söydüyünü soruşdum. O, barmağı ilə istiqamət göstərdi. Həmin istiqamətə baxanda Ağadadaş Ağayevi gördüm. Nurəddinə onun həm yaşca böyük, həm də ağsaqqal olduğunu deyib irad bildirdim. Sonra gördüm ki, bunlar dalaşır. Onları ayırmağa çalışdım”.
Şahid israr edib ki, Ağadadaş Ağayevin əlində balta olmasını, Nurəddin Cəlilova balta atmasını videogörüntülərdən görüb.
Nurəddin Cəlilov onu yalan danışmaqda ittiham edib: “Yalan danışırsan. Gördüklərini de”.
Hakim və dövlət ittihamçısı da şahidə bir neçə sual veriblər. Şahid Ağadadaş Ağayevin əlində balta görmədiyini, yalnız videogörüntülərə baxanda əlində balta olmasını gördüyünü israrla bildirib.
Şahidin ifadəsi Ağadadaş Ağayevin xoşuna gəlib, ona təşəkkür edib: “Bir kişi bunu gördüm. Mən yalan danışmağı xoşlamıram, yalan danışılan yerdə də oturmuram, oranı tərk edirəm. Burada ona görə qalıram ki, dövlət idarəsidir, qanun qarşısında boynum qıldan incədir”.
Hakim bildirib ki, iş üzrə daha 3 şahidin dindirilməsi vacibdir və həmin şahidlər prosesdə iştirak etmirlər. Buna görə də həmin şahidlər yenidən məhkəməyə dəvət ediləcəklər. Buna görə də proses yanvarın 23-nə kimi təxirə salınıb.
Xatırladaq ki, yaxın saatlarda Ağadadaş Ağayevin müttəhim statusunda olduğu daha bir cinayət işi üzrə məhkəmə prosesi keçiriləcək. Hakim Vüsal Tağıyevin sədrliyi ilə keçiriləcək prosesdə şahidlərin dindirilməsi mərhələsidir. Bu iş üzrə Ağadadaş Ağayevə yekun olaraq Cinayət Məcəlləsinin 221.3-cü (xuliqanlıq, silah qismində istifadə olunan əşyalardan istifadə etməklə törədildikdə) maddəsi ilə yekun ittiham elan edilib. İttiham təsdiqlənərsə, müttəhim 2 ildən 5 ilə kimi azadlıqdan məhrum edilə bilər. Ağadadaş Ağayev bu iş üzrə də Nurəddin Cəlilov və Nəzakət Paşayeva ilə barışıq sazişi imzalayıb. Həmin saziş ötən prosesdə məhkəməyə təqdim olunub.
E.MƏMMƏDƏLİYEV,
Musavat.com
XƏBƏR LENTİ
16 Yanvar 2025
ŞƏRHLƏRŞƏRH YAZ