Onlayn ictimai-siyasi qəzet
Bunlar həzm prosesini poza bilər - Qastroenteroloq AÇIQLADI
“Həzm sistemi ilə əlaqəli ən çox rast gəlinən simptomlara mədə narahatlığı və ağrı, daimi doluluq hissi, şişkinlik, qarın ağrısı, qəbizlik və ishal daxildir. Bəzən mədə yanması və bulantı da bu problemlərin əlaməti ola bilər. Bu simptomlar, adətən, qeyri-sağlam qidalanma, sürətli yemək, stress və bəzən də həssaslıq səbəbindən yaranır”.
Musavat.com xəbər verir ki, bu fikirləri 93 FM dalğasında yayımlanan “Sağlam radio”da Səhiyyə Nazirliyinin mütəxəssis-eksperti, qastroenteroloq Emin Məmmədov açıqlayıb.
Onun sözlərinə görə, tələsik qida qəbulu, yemək zamanı televizora və ya telefona baxmaq, danışmaq həzm prosesini poza bilər:
“Yemək zamanı əsas fikir qidaya olmalı və zövq alınmalıdır. Bu zaman həzm fermentləri daha yaxşı və tez ifraz olunur. Sağlam və düzgün qidalanma isə bu cür problemlərin qarşısını almaqda mühüm rol oynayır.
Məsələn, zəngin lifli qidalar – təzə meyvə, tərəvəz və tam taxıllı məhsullar – bağırsaq hərəkətlərini tənzimləyərək qəbizliyi aradan qaldırmağa kömək edir. Eyni zamanda, balanslı bir menyu mədənin həddindən artıq yüklənməsinin qarşısını alır və həzm prosesini daha səmərəli edir”.
Mütəxəssis-ekspert qeyd edib ki, qarışıq və fasiləsiz qidalanma həzm fermetlərinin limitini sonlandıra bilir və orqana istirahətinə, öz işini bərpasına imkan vermir:
“Məsələn, çəkilmiş ətdən hazırlanan qidalarla soyuq qazlı içkilərin istifadəsi, yeməkdən çox çörəyin qəbulu məhz şişkinlik və köp kimi əlamətlərin əsas səbəbidir. Bəzi qidaların qəbulundan sonra mədədə qıcqırma, yanma hissi artan turşuluq səviyyəsinə bağlı ola bilir. Xüsusilə qəhvə, acılı qidalar, süd, bal, soğan, sarımsaq mədə üçün provakativ qidalar hesab olunur”.
E.Məmmədov sonda bildirib ki, əgər həzm şikayətləri sağlam qidalanma ilə də rahatlamırsa, mütləq həkimə müraciət etmək və müayinə olunmaq lazımdır.
XƏBƏR LENTİ
12 Mart 2025
11 Mart 2025
ŞƏRHLƏRŞƏRH YAZ