Onlayn ictimai-siyasi qəzet
Bu avtomobillərin satışı kəskin azalıb
Avqustda Avropa İttifaqında avtomobil satışları illik müqayisədə 18,3 faiz azalıb.
Musavat.com xəbər verir ki, bu məlumatı Avropa Avtomobil İstehsalçıları Assosiasiyası (ACEA) açıqlayıb. Qurumun məlumatına görə, azalma bütün əsas Avropa avtomobil bazarlarında satışlarda qeydə alınıb.
Konkret rəqəmlərə gəlincə, ötən ay Aİ-də ümumilikdə 643,6 min avtomobil satılıb. Bu zaman Almaniyada satışlar 27,8 faiz, Fransada 24,3 faiz, İtaliyada 13,4 faiz, İspaniyada 6,5 faiz azalıb.
Bütövlükdə Avropada satılan yeni avtomobillərin sayı (Aİ ölkələri üstəgəl İslandiya, Norveç, İsveçrə və Böyük Britaniya) ötən ay 16,5 faiz azalaraq 755,7 min ədəd olub.
Avqustda Avropa İttifaqında elektromobillərin satışı 43,9 faiz azalaraq 92,6 min ədəd təşkil edib, o cümlədən Almaniyada elektriklə işləyən avtomobillərin satışı 68,8 faiz azalıb. Aİ bazarında elektriklə işləyən avtomobillərin ümumi satışdakı payı bir il əvvəlki 21 faizdən 14,4 faizə düşüb.
Avqustda Aİ-də Volkswagen qrupunun (o cümlədən Skoda, Audi, Seat, Porsche və s.) satışları 14,8 faiz, Stellantis (birləşmiş Fiat Chrysler və PSA Group) - 29,5 faiz, Renault - 13,9 faiz azalıb.
Alman lüks avtomobil istehsalçısı Bayerische Motoren Werke AG-nin satışları 15,6 faiz, rəqib Mercedes-Benz isə 12,7 faiz azalıb.
Cənubi Koreyanın “Hyundai Group”u satışları 14,5 faiz, Yaponiyanın “Toyota Group”u isə 4,3 faiz azaldıb.
Amerikanın elektrikli avtomobil istehsalçısı Tesla ötən ay Avropa İttifaqında 15,5 min avtomobil satıb ki, bu da keçən ilin avqust ayı ilə müqayisədə demək olar ki, 1,5 dəfə azdır.
Bütün məşhur avtomobil markaları arasında Skoda Avropada satışlarında cüzi artım (illik 0,2 faiz), Yaponiyanın lüks brendi Lexus və İsveçin Volvo avtomobilləri tərəfindən əhəmiyyətli artım (təxminən 25 faiz) qeydə alınıb.
Bu ilin səkkiz ayında Aİ-də avtomobil satışı 1,4 faiz artaraq, demək olar ki, 7,2 milyon ədəd təşkil edib, o cümlədən İspaniyada bu rəqəm 4,5 faiz, İtaliyada 3,8 faiz artıb, Fransa və Almaniyada isə müvafiq olaraq 0,3 faiz və 0,5 faiz azalma müşahidə olunub.
Yanvar-avqust aylarında Avropa İttifaqında elektriklə işləyən avtomobillərin satışı 8,3 faiz azalaraq 902 min ədəd təşkil edib.
Musavat.com
XƏBƏR LENTİ
21 Noyabr 2024
ŞƏRHLƏRŞƏRH YAZ