Onlayn ictimai-siyasi qəzet
Bakı-Tehran münasibətlərində yeni mərhələ: təmaslar artıb, qarşılıqlı razılaşma gözləntiləri
Son aylarda Azərbaycan və İran arasında qarşılıqlı təmaslar artıb.
Aprelin 1-də Azərbaycan Respublikasının Prezidenti İlham Əliyev İran İslam Respublikası Prezidentinin siyasi məsələlər üzrə müşaviri Mehdi Sənayini qəbul edib.
Prezident İlham Əliyev Mehdi Sənayinin Azərbaycana səfərinin ikitərəfli gündəliklə bağlı məsələlərin müzakirəsi üçün yaxşı imkan yaradacağına ümidvarlığını ifadə edib.
Görüşdə ölkələrimiz arasında nəqliyyat, xüsusilə Şimal-Cənub nəqliyyat dəhlizinin inkişafı, iqtisadi-ticari, enerji və digər sahələrdə əməkdaşlıq məsələlərinə dair müzakirələr aparılıb, hökumətlərarası komissiyanın fəaliyyətinə toxunulub.
Səfər çərçivəsində Azərbaycan Respublikasının xarici işlər naziri Ceyhun Bayramov da Mehdi Sənayini qəbul edib. Görüş zamanı Azərbaycan və İran arasında mövcud ikitərəfli və çoxtərəfli əməkdaşlıq gündəliyinin müxtəlif aspektləri, habelə regional və beynəlxalq təhlükəsizlik məsələləri müzakirə olunub.
Azərbaycan-İran münasibətlərinin inkişafında qarşılıqlı səfərlər və təmasların, o cümlədən mövcud siyasi dialoqun vacibliyi vurğulanıb, ümumi maraq kəsb edən məsələlərin müzakirəsinin əməkdaşlığın genişləndirilməsinə töhfə verdiyi qeyd olunub.
İki ölkə arasında bir sıra, o cümlədən siyasi, iqtisadi, ticarət, enerji təhlükəsizliyi, nəqliyyat və kommunikasiyalar sahələri üzrə əməkdaşlığın perspektivlərini müzakirə edən tərəflər, xüsusilə Azərbaycan və İran tərəfindən birgə icra olunan bir sıra layihələrin regionumuzdan keçən nəqliyyat dəhlizlərinin inkişafında mühüm rol oynadığını qeyd ediblər.
Elə həmin gün İran prezidenti Məsud Pezeşkianın Azərbaycana səfər edəcəyi barədə xəbər yayılıb. Məlumata görə, səfər bu ay reallaşa bilər.
Yaxın Şərq üzrə ekspert Vüqar Zifəroğlunun fikrincə, İran prezidenti Məsud Pezeşkianın Azərbaycana gözlənilən səfəri iki ölkə arasında münasibətlərin inkişafında mühüm rol oynayacaq.
Ekspert Musavat.com-a şərhində sözügedən səfəri bir neçə aspektdən dəyərləndirib:
“İlk növbədə vurğulamaq lazımdır ki, Azərbaycan və İran arasında yüksək səviyyəli qarşılıqlı səfərlər dövlətlərarası dialoqun intensivliyini artırmış olar və siyasi münasibətlərin daha da güclənməsinə töhfə verir. Son dövrlərdə iki ölkə arasında bəzi gərginliklər müşahidə olunsa da, belə görüşlər problemlərin həlli üçün dialoq imkanlarını genişləndirir. Əgər səfər uğurla keçərsə, gələcəkdə daha sıx siyasi təmaslar mümkündür.
Bildiyiniz kimi, səfər çərçivəsində ticarət, enerji, nəqliyyat və digər sahələrdə əməkdaşlığın inkişafı üçün yeni müqavilələrin imzalanması və layihələrin müzakirəsi gözlənilir. Bu, hər iki ölkənin iqtisadiyyatına müsbət təsir göstərə bilər ki, bu da önəmli məqamdır. İran və Azərbaycan ticarət mübadiləsinin artırılması və yüklərin daşınmasının asanlaşdırılmasından tutmuş enerji sektorunda əməkdaşlığa qədər, eyni zamanda tranzit yolları, enerji layihələri və qarşılıqlı investisiyalar baxımından vacib tərəfdaş ola bilər. Xüsusilə Zəngəzur dəhlizi və digər nəqliyyat layihələrinin müzakirəsi və İran tərəfinin adekvat reaksiyası ikitərəfli münasibətləri daha da möhkəmlədə bilər. Habelə, Şimal-Cənub Dəhlizi və dəmir yolu layihələri kimi tranzit marşrutlarının inkişaf etdirilməsi də səfərin gündəliyində ola bilər”.
Vüqar Zifəroğlu regional təhlükəsizlik və sabitlik faktoruna diqqət çəkərək qeyd edib ki, prezidentlərin görüşü zamanı təhlükəsizlik sahəsində əməkdaşlıq məsələlərinin də müzakirə olunması mümkündür:
“İranın Ermənistanla münasibətlərini balanslı şəkildə tənzimləməsi Bakı-Tehran əlaqələrinə müsbət təsir edə bilər. Ümumilikdə, İran prezidentinin Azərbaycana səfəri ikitərəfli münasibətlərin daha da inkişafına və müxtəlif sahələrdə əməkdaşlığın dərinləşməsinə zəmin yaradır.
Əgər səfər zamanı konkret razılaşmalar əldə olunarsa və hər iki tərəf qarşılıqlı etimadı artıran addımlar atarsa, İran-Azərbaycan münasibətlərində yeni bir mərhələyə qədəm qoymaq mümkündür. Lakin bu prosesin nə qədər uğurlu olacağı xüsusilə İranın gələcəkdə atacağı addımlardan asılı olacaq”.
Nigar HƏSƏNLİ,
Musavat.com
ƏLAQƏLİ XƏBƏRLƏR
XƏBƏR LENTİ
04 Aprel 2025
ŞƏRHLƏRŞƏRH YAZ