Onlayn ictimai-siyasi qəzet
“Müqavilənin imzalanmasına mane olan əsas amil həddindən artıq geosiyasi qeyri-müəyyənliklə bağlıdır. Bakı beynəlxalq arenada hadisələrin inkişafını nəzərə alaraq fasilə verib.
Donald Trampın ABŞ-da hakimiyyətə qayıdışı, Ukraynada davam edən münaqişə və Rusiyanın regiona təsirində mümkün dəyişikliklər Azərbaycan üçün qeyri-müəyyənlik yaradır.
Bakı sazişdən maksimum qazanc əldə etməyə imkan verəcək şərtləri üçün münbit şəraitin yaranmasını istəyir. Məsələn, Azərbaycan ümid edə bilər ki, Qərbin regiona diqqətinin azalması və ya Rusiyanın mövqelərinin güclənməsi ona Ermənistan üzərində əlavə təsir rıçaqları verə bilər”.
Armine Martirosyan “jam-news.net” saytında belə yazır.
Məncə də geosiyasi qeyri-müəyyənlik Azərbaycan-Ermənistan danışıqlarına birbaşa təsir edir. Məsələn, Donald Tramp və onun administrasiyası hələ ki, Azərbaycan-Ermənistan danışıqları barədə ortaya konkret mövqe qoymayıb.
Trampın əsas hədəfi Ukraynadır. Ukrayna probleminin hansı şəkildə həll olunması Azərbaycan-Ermənistan danışıqlarına da ciddi təsir edəcək.
Azərbaycan tərəfi haqlı olaraq güman edir ki, Donald Tramp bu məsələdə Azərbaycanın maraqlarının təmin olunmasına daha çox üstünlük verəcək. Ən azı ona görə ki, Amerikadakı prezident seçkisinin ən qızğın çağında İlham Əliyev Trampa açıq və birmənalı şəkildə dəstək verib. O da bəllidir ki, 44 günlük müharibə məhz Donald Trampın birinci prezidentliyi dönəminin sonuna təsadüf etdi. Və Tramp II Qarabağ müharibəsinin gedişinə qətiyyən müdaxilə etmədi.
Bu dəfə də belə ola bilərmi? Hər halda bu ehtimal son dərəcə yüksəkdir. Belə olduqda isə Azərbaycan Ermənistan qarşısında olan üstünlükləri sülh müqaviləsində inikas etdirə bilər...
03 Mart 2025
ŞƏRHLƏRŞƏRH YAZ