Onlayn ictimai-siyasi qəzet
Aprel döyüşlərindən 9 il ötür
Azərbaycan Ordusunun tarixi qələbələrindən biri olan Aprel döyüşlərinin 9-cu ildönümü qeyd olunur.
Musavat.com xəbər verir ki, 2016-cı il aprelin 2-də Ermənistan silahlı qüvvələrinin növbəti təxribatlarına cavab olaraq, Azərbaycan Ordusu sürətli və uğurlu əks-hücum əməliyyatı həyata keçirərək düşməni ağır məğlubiyyətə uğratdı. Füzuli, Cəbrayıl və Ağdərə rayonlarının işğal altında olan 2000 hektardan çox ərazisi azad edildi. Bununla yanaşı, minlərlə hektar ərazi ordumuzun tam nəzarətinə keçdi.
Dördgünlük döyüşlər nəticəsində Azərbaycan xalqı 23 ildən sonra yenidən qələbə sevincini yaşadı. Əməliyyatın əsas məqsədi düşmənin təmas xəttinə yaxın yaşayış məntəqələrinə yaratdığı təhlükəni aradan qaldırmaq idi. Belə ki, 2016-cı ilin mart ayından etibarən Ermənistan silahlı qüvvələri cəbhəboyu zonadakı yaşayış məntəqələrini intensiv atəşə tutmağa başlamışdı. Aprelin 2-nə keçən gecə düşmən həm ordumuzun mövqelərini, həm də mülki əhalini atəşə məruz qoydu. Buna cavab olaraq, Azərbaycan Silahlı Qüvvələri qəti tədbirlər gördü, düşmənin müdafiə xətti yarıldı və Ermənistan ordusunun canlı qüvvəsi və hərbi texnikası darmadağın edildi.
Aprel döyüşlərində ən şiddətli toqquşmalar Ağdərə-Tərtər-Ağdam və Füzuli istiqamətlərində baş verdi. Azərbaycan Ordusunun bölmələri qısa müddət ərzində düşmənin cəbhə xəttində və dərinlikdə yerləşən qüvvələrini müəyyənləşdirərək qətiyyətli zərbələrlə onları məhv etdi. Əməliyyat nəticəsində Naftalan şəhərinə təhlükə yaradan Talış kəndi istiqamətindəki yüksəkliklər düşməndən təmizləndi. Həmçinin Füzuli rayonu istiqamətində yerləşən və strateji əhəmiyyət daşıyan Lələtəpə yüksəkliyi azad olundu. Bu qələbə Horadiz şəhərinin müdafiəsini daha da möhkəmləndirdi.
Azərbaycan Ordusunun güclü əks-həmləsi nəticəsində düşmənin 30-a yaxın tankı, 25-dən çox artilleriya qurğusu və digər hərbi texnikası məhv edildi. 320 düşmən hərbçisi öldürüldü, 500-dən çoxu yaralandı. Ağdərə-Suqovuşan istiqamətində yolların tam nəzarətə götürülməsi təmin edildi.
Aprel döyüşləri ilə illərlə formalaşdırılan "məğlubedilməz erməni ordusu" mifi darmadağın edildi və erməni cəmiyyəti işğalçılıq siyasətinin iflasa uğradığını anladı. Bu tarixi qələbə Azərbaycan əsgərinin döyüş ruhunu, xalq və ordu birliyini nümayiş etdirdi.
Döyüşlərdən sonra Ermənistanın işğalçılıq siyasəti növbəti dəfə danılmaz faktlarla sübut olundu. Belə ki, məhv edilən hərbçilərin böyük hissəsinin Ermənistan vətəndaşı olması, onların Ermənistan hökuməti tərəfindən mükafatlandırılması və yaralıların Ermənistanın xəstəxanalarında müalicə alması bu faktı açıq şəkildə ortaya qoyurdu. Ermənistan hökuməti işğal altında saxladığı ərazilərə könüllü adı altında yeni qüvvələr göndərərək itkilərini bərpa etməyə çalışırdı.
Düşmən təxribatları nəticəsində mülki əhali arasında da itkilər oldu, yaşayış məntəqələrimizə ciddi ziyan dəydi.
Azərbaycan Respublikasının ərazi bütövlüyünü qorumaq, düşmən təxribatlarının qarşısını almaq və dinc əhaliyə hücumları dəf etmək uğrunda göstərdikləri qəhrəmanlıq və şücaətə görə Azərbaycan hərbçilərinin bir qismi 2016-cı il aprelin 19-da ölkə rəhbərliyi tərəfindən yüksək fəxri adlara layiq görüldü, orden və medallarla təltif edildi.
Döyüşlərdə fərqlənən igidlər arasında "Azərbaycanın Milli Qəhrəmanı" fəxri adına, "Azərbaycan Bayrağı" və "Vətənə xidmətə görə" ordenlərinə, eləcə də "Vətən uğrunda", "İgidliyə görə" və "Hərbi xidmətlərə görə" medallarına layiq görülənlər var.
Uğurlu Aprel döyüşləri Azərbaycan Ordusunun gücünü və qətiyyətini bütün dünyaya göstərdi. Bu zəfərin məntiqi davamı kimi, 2020-ci il sentyabrın 27-də başlanan 44 günlük Vətən müharibəsində Azərbaycan öz torpaqlarını işğaldan tam azad etdi və Ermənistan kapitulyasiya aktına imza atmağa məcbur oldu.
ƏLAQƏLİ XƏBƏRLƏR
XƏBƏR LENTİ
03 Aprel 2025
02 Aprel 2025
ŞƏRHLƏRŞƏRH YAZ