Onlayn ictimai-siyasi qəzet
Aİ və ABŞ ermənilərə bir neçə soyuq qışa hazırlaşmağı məsləhət görürlər - Lavrov
“Biz dəfələrlə erməni dostlarımıza çatdırmışıq ki, nə Vaşinqton, nə də Brüssel həqiqətən öz tərəfdaşlarının taleyi və maraqları barədə düşünmürlər”.
Musavat.com xəbər verir ki, bunu Rusiya xarici işlər naziri Sergey Lavrov mətbuat konfransında medianın suallarına cavab olaraq deyib.
O, İrəvanı Gürcüstandan dərs götürməyə çağırıb: “İrəvan ötən ilin sonunda Gürcüstanda baş verən hadisələrə diqqət yetirməyə bilməzdi. Yəqin ki, onlar Ermənistanda İrəvanın Moskvadan “ayrılması layihəsinin” avropalılar üçün “az baha başa gəlməsi” və erməni əhalisinə “bir neçə soyuq qışa hazırlaşmaq” məsləhəti ilə bağlı çox danışılan kinli bəyanatları eşitmişlər. Moskva İrəvanla qardaşlıq münasibətlərini həmişə yüksək qiymətləndirib və indi də dəyərləndirir. Biz Ermənistanı təbii strateji tərəfdaşlarımızdan və müttəfiqlərimizdən biri hesab edirik. Biz Ermənistanla ticarət-iqtisadi və hərbi-siyasi sahədə ikitərəfli səviyyədə və ümumi inteqrasiya birlikləri çərçivəsində rəsmiləşdirilmiş bütün sazişlərə sadiqik. Eyni zamanda Rusiyanın heç bir gizli gündəmi və ya həyata keçirilməsi Ermənistanın təhlükəsizliyinə və ya iqtisadi rifahına mənfi təsir göstərəcək “layihələri” yoxdur. Bunu ikitərəfli ticarət-iqtisadi əməkdaşlığın göstəriciləri də təsdiqləyir. Hesablamalar hələ tamamlanmayıb, lakin artıq demək olar ki, 2024-cü il üçün ticarət dövriyyəsi mütləq rekorda imza atıb. Yeri gəlmişkən, Ermənistanı Rusiya bazarından imtina etməyə çağıran Aİ və ABŞ ilə İrəvan arasında ticarətin həcmi xeyli azdır və azalmanın davam etdiyi müşahidə olunur”.
Lavrov bildirib ki, Rusiya Ermənistanın əsas ticarət və investisiya tərəfdaşı olaraq qalır: “Yerli təsərrüfat subyektləri büdcəyə vergi ödənişlərində daimi liderlər və ölkənin ən iri işəgötürənləridir. İkitərəfli İqtisadi Əməkdaşlıq üzrə Hökumətlərarası Komissiyanın növbəti iclası məhsuldar keçib. Biz 2024-cü ildə Ermənistanın Avrasiya İqtisadi İttifaqı orqanlarına sədrliyinin nəticələrini yüksək qiymətləndiririk. Şübhə yoxdur ki, Ermənistanın Avrasiya inteqrasiyasında iştirakı son illərdə onun ÜDM-nin sürətli artımını xeyli dərəcədə təmin edib. Eyni zamanda, bir daha vurğulamaq məcburiyyətindəyik: Avrasiya iqtisadi inteqrasiyası və Avropa İttifaqına üzvlük bir araya sığmır.
Ümid edirik ki, qarşıdan gələn ildə biz bir sıra mühüm layihələrin həyata keçirilməsində mühüm irəliləyiş əldə edə biləcəyik, eləcə də mədəni, humanitar və regionlararası mübadilələrin dinamikasını artıra biləcəyik”.
Musavat.com
XƏBƏR LENTİ
26 Yanvar 2025
ŞƏRHLƏRŞƏRH YAZ