Onlayn ictimai-siyasi qəzet
ABŞ və Səudiyyə Ərəbistanı strateji pakt imzalamaq ərəfəsindədir: The Wall Street Journal detalları açdı
ABŞ və Səudiyyə Ərəbistanı müdafiə paktı bağlamağa yaxındır.
Musavat.com xəbər verir ki, bu barədə “The Wall Street Journal” rəsmilərə istinadən məlumat yayıb.
Onlar bildiriblər ki, diplomatik səylərin uğuru İsrailin “Fələstin dövlətinin yaradılmasına sadiqliyindən” və Qəzza zolağında müharibəyə son qoymasından asılıdır, baxmayaraq ki, münaqişəyə son qoyulması ilkin şərt deyil.
Nəşrin yazdığına görə, müdafiə sazişi Səudiyyə Ərəbistanının regional mövqeyini və Yaxın Şərqdə ABŞ-ın hərbi rolunu gücləndirəcək. Mənbələr göstərir ki, müqavilə layihəsi əsasən ABŞ-Yaponiya Təhlükəsizliyin Təminatı Müqaviləsi əsasında modelləşdirilib.
Aprelin 29-da ABŞ-ın dövlət katibi Entoni Blinken Ər-Riyadda keçirilən Dünya İqtisadi Forumunun xüsusi sessiyasında bildirib ki, ABŞ və Səudiyyə Ərəbistanı son aylarda Səudiyyə Ərəbistanı ilə İsrail arasında münasibətlərin normallaşdırılması üçün fəal iş aparır. Onun sözlərinə görə, əsas şərtlər Qəzzada münaqişənin həlli və Fələstin dövlətinin yaradılması qərarının həyata keçirilməsidir.
Ər-Riyad müdafiə paktı bağlamaq üçün Vaşinqtonla danışıqlar aparır. Təhlükəsizlik zəmanəti alan Səudiyyə Ərəbistanı İsraillə tam diplomatik əlaqələr qura bilər. Mümkün alternativ kimi Vaşinqton Ər-Riyada “NATO-dan kənar əsas müttəfiq” statusu təklif etməyə və ya ABŞ və Bəhreyn arasında imzalanmış sazişə oxşar pakt bağlamağa hazırdır. Bundan əlavə, saziş Səudiyyə Ərəbistanının nüvə proqramının yaradılmasında Amerikanın yardımını nəzərdə tuta bilər.
Musavat.com
XƏBƏR LENTİ
22 Noyabr 2024
ŞƏRHLƏRŞƏRH YAZ