Onlayn ictimai-siyasi qəzet
"Ürəyimi nişan al, Kələntər dayı"... Vəfat edən Xalq artistinin ÖMÜR DOSYESİ
Xəbər verdiyimiz kimi, xalq artisti Ənvər Həsənov vəfat edib.
Musavat.com-un məlumatına görə, bu barədə onun ailə üzvləri məlumat verib.
Qeyd edək ki, Xalq artisti Ənvər Həsənov yanvarın 10-da saat 10:15-də halının pisləşməsi səbəbilə Xəzər Tibb Mərkəzinin Terapiya şöbəsinə hospitalizasiya olunub. Ona dəqiqləşdirilməmiş anemiya diaqnozu təyin edilib və ilkin zəruri tibbi xidmət göstərilib. Yanvarın 17-də vəziyyətinin ağırlaşması səbəbilə pasiyent Reanimasiya şöbəsinə köçürülüb. Aparılan diaqnostik müayinələr nəticəsində ona kəskin işemik insult diaqnozu təyin olunub. Yanvarın 18-də vəziyyəti stabilləşən Xalq artisti tibb müəssisəsinin Nevrologiya şöbəsinə köçürülüb. Fevralın 3-ü isə Xəzər Tibb Mərkəzindən Reabilitasiya Mərkəzindən evə buraxılıb.
Musavat.com 74 yaşında həyata gözlərini yuman Ənvər Həsənov haqqında məlumatları təqdim edir:
Azərbaycanın tanınmış aktyoru və rejissoru, Xalq artisti Ənvər Cəfər oğlu Həsənov 17 avqust 1950-ci ildə Bakı şəhərində anadan olmuşdur. O, bu gün - 16 mart 2025-ci ildə, 74 yaşında vəfat edib.
Ənvər Həsənov gənc yaşlarından kinoya maraq göstərmiş və bir çox məşhur filmlərdə yaddaqalan obrazlar yaradıb. Onun ən tanınmış rolları arasında:
"Yeddi oğul istərəm" Cəlal, "Dərviş Parisi partladır" filmində Şahbaz, "Babək" filmində Tərxan, "Atları yəhərləyin" filmində Sirac,
"Uşaqlığın son gecəsi" filmində isə Murad olub.
Ənvər Həsənovun həyat yoldaşı Mömünat Qurbanova da tanınmış aktrisa olub. Onların sənət və şəxsi həyatda birlikdə olduqları, bir çox filmdə birgə rol aldıqları məlumdur. O, Mömünat Qurbanova ilə birlikdə "Dərviş Parisi partladır" və "Atları yəhərləyin" filmlərində də rol alıb.
Mömünat Qurbanova İncəsənət Muzeyində çalışıb, şöbə müdiri kimi fəaliyyət göstərib. Bütün həyatı boyu yalnız üç filmə çəkilib. Hər üç filmdə də həyat yoldaşı ilə birgə işləyib.
Mömunat Qurbanova 2008-ci il dekabrın 8-də 50 yaşını qeyd etmək üçün ailəsi ilə birgə Nabrana gedib. Onlar Nabrandan geri qayıdarkən qəzaya düşüblər. Nəticədə Mömunat Qurbanova dünyasını dəyişib.
Ənvər Həsənov həmin günləri müsahibələrinin birində belə xatırlayır:
"Bir gün əvvəl də yarmarkadan dublyonka almışdı, evə gələndən sonra nədənsə xoşuna gəlmədi, dedi ki, səhər aparıb dəyişəcəyəm bunu. Gəldim ki, Möminat, dostlar aşağıda, maşında gözləyirlər, gedək. Dedi ki, Ənvər, sən get, mənim həvəsim yoxdur. Dedim, ay qız, sənin yubileyindir, gedək. Dedi, üzrxahlıq edərsən, mən gedim bu dublyonkanı dəyişim, sonra gec olar, dəyişməzlər. Razılaşdım və keçib o biri otaqdan ov tüfəngimi götürdüm ki, meşədi də, birdən ov düşər könlümüzə. Mömünat əlimdə tüfəngi görən kimi qalxdı ki, mən də gedirəm. Kaş, götürməyəydim o tüfəngi. Bu tüfəng atmaq həvəskarı idi, dedi ki, sən gedib mənsiz ov edəcəksən, mən də gedirəm. Getdik. Qayıdanda maşını dostumuz sürürdü. Birdən dedi ki, Ənvər, yuxu məni basır, gəl bir az da sən sür. Oturdum sükanın arxasına, Möminat məndən arxada oturub, dostum qabaqda, onun xanımı da ondan arxada. Çox yavaş sürürdüm, sonra ekspert də müəyyən etdi ki, o sürətlə yer buz da olsa maşın aşa bilməzdi, arxa təkərin altına daş düşüb ki, belə aşıb. Qarşıdan bir it keçdi, sükanı qəflətən döndərməli oldum, heç necə oldu bilmirəm, yığa bilmədim, çırpıldı ağaca. Maşının arxa qapısı, Möminat tərəf çırpılmışdı, heç ağzını açıb bir kəlmə deyə bilmədi".
Ənvər Həsənovun yaradıcılığı təkcə aktyorluqla məhdudlaşmayıb, o, həm də rejissor kimi fəaliyyət göstərib. Onun rejissor assistenti kimi çalışdığı "Ağ atlı oğlan" (1995) filmi də buna misaldır.
Ənvər Həsənovun sənətə verdiyi töhfələr yüksək qiymətləndirilib. O, 2000-ci ildə "Azərbaycan Respublikasının əməkdar artisti", 2018-ci ildə isə "Azərbaycan Respublikasının xalq artisti" fəxri adlarına layiq görülüb. 2023-cü ildən etibarən isə Azərbaycan Respublikası Prezidentinin fərdi təqaüdçüsü olub.
Ənvər Həsənovun xatirələri və sənət yolu haqqında ətraflı məlumatlar "Ənvər Həsənovun xatirələri" adlı kitabında toplanıb. Bu kitabda onun dostluqları, yaradıcılığı və şəxsi həyatı barədə maraqlı fraqmentlər yer alıb.
Onun vəfatı Azərbaycan mədəniyyəti üçün böyük itki hesab olunur. Ənvər Həsənovun yaratdığı obrazlar və sənətə verdiyi töhfələr uzun illər yaddaşlarda qalacaq.
Allah rəhmət eləsin!
Musavat.com
XƏBƏR LENTİ
17 Mart 2025
16 Mart 2025
ŞƏRHLƏRŞƏRH YAZ