Onlayn ictimai-siyasi qəzet
"Skype" fəaliyyəti rəsmi olaraq dayandırdı
Bu gündən "Skype" platformasının fəaliyyəti rəsmi olaraq dayandırılıb.
Musavat.com xəbər verir ki, uzun illər boyunca milyardlarla insanın ünsiyyət vasitəsi olmuş məşhur "Skype" platforması bu gündən etibarən rəsmi olaraq fəaliyyətini dayandırıb. Microsoft şirkətinin verdiyi məlumata əsasən, istifadəçilərin bütün hesabları avtomatik olaraq "Microsoft Teams" xidmətinə köçürüləcək.
Microsoft-un texniki dəstək səhifəsində qeyd olunur ki, bu dəyişiklik istifadəçilərin daha səmərəli və inteqrasiya olunmuş kommunikasiya vasitələrindən yararlanması məqsədilə həyata keçirilir. Şirkət bildirir ki, "Teams" artıq daha geniş funksionallığa malikdir və korporativ mühitdə, eləcə də fərdi istifadəçilər üçün daha uyğun platforma hesab olunur.
Qeyd edək ki, "Skype" 2003-cü ildə istifadəyə verildikdən sonra internet üzərindən səsli və görüntülü danışıq imkanları ilə sürətlə populyarlıq qazanmışdı. 2011-ci ildə Microsoft tərəfindən satın alınan platforma, xüsusilə pandemiya dövründə yenidən geniş istifadə edilməyə başlanmışdı. Lakin son illərdə "Zoom", "Google Meet" və "Teams" kimi alternativlərin yayılması ilə "Skype" tədricən bazar payını itirmişdi.
Microsoft-un bu qərarı texnologiya dünyasında bir dövrün sonu kimi qiymətləndirilir. "Skype" istifadəçilərinə isə yeni mərhələdə "Teams" platformasında davam etmək tövsiyə olunur. Hazırkı məlumatlara əsasən, istifadəçilərin şəxsi məlumatları və əlaqələri avtomatik şəkildə "Teams" sisteminə köçürüləcək və heç bir məlumat itkisi baş verməyəcək.
Toğrul İSMAYIL,
Musavat.com
XƏBƏR LENTİ
05 May 2025
ŞƏRHLƏRŞƏRH YAZ