Onlayn ictimai-siyasi qəzet
Rusiyada Ukraynanın Qazaxıstandakı keçmiş səfirinə hökm oxunub
Moskvanın Basmannı məhkəməsi Ukraynanın Qazaxıstandakı keçmiş səfiri Pyotr Vrublevskini qalmaqallı açıqlamalarına görə qiyabi olaraq altı il müddətinə azadlıqdan məhrum edib.
Musavat.com Rusiya mediasına istinadla xəbər verir ki, Vrublevski Rusiya Federasiyası Cinayət Məcəlləsinin 282-ci maddəsinin 2-ci hissəsinin “a” bəndi ilə (“Millət və dil zəminində nifrət və düşmənçiliyin qızışdırılmasına yönəlmiş, zorakılıq hədəsi ilə ictimai yerlərdə törədilmiş hərəkətlər”də) ittiham olunur.
“Pyotr Yuryeviç Vrublevskinin təqsirli bilinməsi... ona 6 il müddətinə ümumi rejimli koloniyada həbs cəzası verilsin”, - hakim Timur Vaxrameyev hökmü elan edib.
Tərəflər arasında gedən mübahisə zamanı prokuror təqsirləndirilən şəxsin 6 il müddətinə azadlıqdan məhrum edilməsini istəyib.
Vrublevskinin vəkili Dmitri Kirsanov agentliyə bildirib ki, o, hökmün mətnini alan kimi ondan apellyasiya şikayəti verəcək.
Müstəntiqlərin fikrincə, 2022-ci ilin avqustunda Ukraynanın Qazaxıstandakı fövqəladə və səlahiyyətli səfiri müsahibə zamanı “Rusiya vətəndaşlarına qarşı təhqiramiz, düşmən münasibət formalaşdıran, zorakılıq hərəkətlərini təşviq edən” bəyanatla çıxış edib.
Bu müsahibənin videoyazısı internetdə sərbəst şəkildə yerləşdirilib. Vrublevski istintaqdan gizlənib və beynəlxalq axtarışa verilib. Məhkəmə onun barəsində həbs qətimkan tədbiri seçib.
Yada salaq ki, 2022-ci ilin avqustunda qazaxıstanlı bloger Dias Kuzairovla müsahibədə Vrublevski Ukraynanın mümkün qədər çox rusu öldürməyə çalışdığını bildirmişdi.
Bundan sonra xarici işlər nazirinin müavini Ermuxambet Konuspayev Qazaxıstan Xarici İşlər Nazirliyində onunla görüşüb, Ukraynadan olan diplomata etiraz bildirilib.
Qazaxıstan Respublikası Xarici İşlər Nazirliyinin rəsmi nümayəndəsi Aybek Smadiyarov daha sonra qeyd edib ki, ukraynalı siyasətçi verdiyi açıqlamalara görə Qazaxıstan Xarici İşlər Nazirliyindən üzr istəyib. Lakin o, ölkədən qovulmayıb, məzuniyyətə gedib.
2022-ci il oktyabrın 19-da Vladimir Zelenski Pyotr Vrublevskini Ukraynanın Qazaxıstandakı səfiri vəzifəsindən azad edib.
Rusiyada Vrublevskiyə qarşı “Nifrət və ya düşmənçiliyin qızışdırılması, habelə insan ləyaqətinin alçaldılması” maddəsi ilə cinayət işi açılıb. O, qiyabi olaraq “həbs edilib” və beynəlxalq axtarışa verilib.
2024-cü ilin fevralında “Rosfinmonitorinq” onu ekstremistlər və terrorçular siyahısına daxil edib. Əvvəllər Vrublevskinin adı Daxili İşlər Nazirliyinin axtarış məlumat bazasında görünürdü.
Musavat.com
XƏBƏR LENTİ
27 Noyabr 2024
26 Noyabr 2024
ŞƏRHLƏRŞƏRH YAZ