Onlayn ictimai-siyasi qəzet
Qərb Rusiya SWIFT-ni vurmağa hazırlaşır
Yeddilik Qrupu (G7) ölkələri Avropa İttifaqı ilə birlikdə Rusiyaya sanksiyalardan yayınmağa kömək edən üçüncü ölkə banklarına yeni məhdudiyyətlər üzərində işləyir.
Musavat.com xəbər verir ki, bu barədə “Bloomberg” mənbələrə istinadən məlumat yayıb.
Onların fikrincə, bu tədbirlər SWIFT-i əvəz edən Rusiya Mərkəzi Bankının Maliyyə Mesajlarının Ötürülməsi Sistemindən (SPFS) istifadə edən maliyyə qurumlarına qarşı da yönəldiləcək. Qeyd olunur ki, bu mövzuda müzakirələr G7 liderlərinin iyun sammiti ərəfəsində aparılır və orada Rusiyaya qarşı daha sərt sanksiyalar müzakirə olunacaq.
“Bloomberg” xatırladır ki, Avropa İttifaqı yeni anti-Rusiya məhdudiyyətlər paketi hazırlayır və bu paketdə də öz ölkələrinə SPFS-dən istifadəni qadağan etmək niyyətindədir. Bu sistem artıq 20 ölkədə, o cümlədən Ermənistan, Belarus, Qazaxıstan, Çin və Tacikistanda fəaliyyət göstərir. Agentlik qeyd edir ki, Aİ G7 sammitində 14-cü sanksiyalar paketi ilə bağlı konsensus əldə etməyi gözləyir, lakin bəzi Avropa ölkələri SPFS-ni tamamilə qadağan etmək təşəbbüsü ilə hələ razılaşmır və belə bir addımın qanuni ödənişləri məhdudlaşdırmaqla üçüncü ölkələrlə münasibətləri korlaya biləcəyini deyirlər.
“Bloomberg”in həmsöhbətləri İtaliyada iyun sammitindən sonra qəbul edilə biləcək konkret məhdudiyyətlərin hələ də müzakirə olunduğunu və ölkələrin ayrı-ayrılıqda öz tədbirlərini görə biləcəyini qeyd ediblər.
2014-cü ildə Rusiya Bankı SWIFT formatında məlumatları ötürə bilən, lakin kanallarından asılı olmayan Maliyyə Mesajlarının Ötürülməsi Sistemini sınaq rejimində işə salıb. 2017-ci ildə SPFS istənilən valyutada əməliyyatlar haqqında mesajlar ötürməklə tam fəaliyyətə başlayıb. Əvvəlcə SPFS yalnız yerli Rusiya istifadəçiləri üçün nəzərdə tutulmuşdu, lakin 2022-ci ilin fevralından bəri 20-dən çox Belarus bankı, həmçinin Ermənistan, Qazaxıstan, Tacikistan, Qırğızıstan, Kuba və digər ölkələrin kredit təşkilatları ona qoşulub.
2024-cü ilin mart ayında Rusiya Bankı 2023-cü ilin sonuna SPFS-də 20 ölkədən 556 iştirakçının olduğunu bildirən bir hesabat dərc edib.
Musavat.com
XƏBƏR LENTİ
23 Noyabr 2024
22 Noyabr 2024
ŞƏRHLƏRŞƏRH YAZ