Onlayn ictimai-siyasi qəzet
Naxçıvanda milyonluq layihələri olan şirkət icra hakimiyyətindən 200 min ala bilmir QALMAQAL
Culfa Rayon İcra Hakimiyyətinin yeni inzibati binasının tikintisi ilə bağlı qalmaqal yaşanıb. Binanı inşa edən şirkət pulunu ala bilmir.
Musavat.com xəbər verir ki, icra hakimiyyətinin yeni inzibati binasının tikintisi ilə bağlı 2023-cü ilin dekabr ayında APF Tikinti MMC ilə müqavilə imzalanıb. Müqaviləyə əsasən binanın tikintisi üçün şirkətə 201 min manat ödənilməli imiş. Bu məbləğin 3 ay ərzində hissə-hissə MMC-yə ödənilməsi razılaşdırılıb. Amma icra hakimiyyəti bu öhdəliyi yerinə yetirməyib. Səbəb olaraq isə büdcədə pulun olmaması göstərilib. MMC məhkəməyə müraciət edib. Məhkəmə MMC-nin xeyrinə qərar çıxarıb. Qərara əsasən icra hakimiyyəti 201 min manatı şirkətə ödəməlidir.
Musavat.com APF Tikinti MMC ilə bağlı da maraqlı məlumatlar əldə edib. MMC Vasif Talıbovun hakimiyyətdən uzaqlaşdırılmasından sonra yaradılıb. 2023-cü ildə Vergilər Nazirliyindən qeydiyyatdan keçirilən bu şirkətin nizamnamə kapitalı 8 milyon 100 min manatdır. MMC vergi öhdəlikləri üzrə bəyannamələri vaxtında təqdim etməməyə görə 3 dəfə də cərimələnib.
Maraqlıdır ki, 2023-cü ildə yaradılan bu MMC Naxçıvan Muxtar Respublikasında bir çox böyük layihələrin icrasını həyata keçirib.
Şirkət əsas dörd istiqamət üzrə fəaliyyət göstərir: kənd təsərrüfatı, qida, otelçilik və inşaat.
APF şirkətlər qrupunun otelləri siyahısına Naxçıvandakı "Saat Meydanı’’ və “Qrand’’ otelləri daxildir.
Şirkət Naxçıvan şəhərində çoxmənzilli yaşayış və qeyri-yaşayış binalarının tikintisini həyata keçirir.
21 yaşayış binasından ibarət “Nakhchivan Residence” şirkətə tapşırılan ən böyük layihələrdən biridir. Şirkət daha əvvəl Rusiyada tikinti sahəsində bir neçə layihə inşa edib. Azərbaycanda isə ilk layihələrini Naxçıvanda həyata keçirirlər.
“Gəmiqaya Bərəkət Qida Məhsulları" MMC də bu şirkətlər qrupuna daxil edilib. Bu MMC Naxçıvanın çörəyə olan tələbatının 80 faizini ödəyir.
Bu qrup Naxçıvanda təmir-tikinti materiallarının istehsalını və satışının əsas hissəsini də öz üzərinə götürüb.
İlkin Muradov
Musavat.com
XƏBƏR LENTİ
12 Yanvar 2025
ŞƏRHLƏRŞƏRH YAZ