Onlayn ictimai-siyasi qəzet
Martın 18-i ilk Qədr gecəsidir: həmin gün...
İlk Qədr gecəsi Ramazan ayının 18-dən 19-na keçən gecə, yəni martın 18-nə təsadüf edəcək.
Musavat.com-un xəbərinə görə, bu barədə Qafqaz Müsəlmanları İdarəsindən məlumat verilib.
Digər Qədr gecələri - Ramazan ayının 20-dən 21-nə keçən gecə (20 mart), Ramazan ayının 22-dən 23-nə keçən gecə (22 mart) və Ramazan ayının 26-dan 27-nə keçən gecə (26 mart) Qədr gecələri olacaq.
Qeyd edək ki, Ramazan ayı Azərbaycanda martın 1-də başlayıb. Şəvval ayının 1-i, yəni martın 30-da Ramazan (Fitr) bayramı olacaq.
Qədr gecələrinin mahiyyəti İslam dinində çox böyük əhəmiyyətə malikdir və Qurani-Kərimdə bu gecəyə xüsusi surə — “Qədr” surəsi həsr olunub. Qədr gecəsi Allahın sonuncu müqəddəs kitabı olan Qurani-Kərimin ilk dəfə Peyğəmbər Məhəmməd (s.ə.s)-ə nazil olduğu gecədir. Bu barədə “Qədr” surəsində deyilir: “Biz onu (Quranı) Qədr gecəsində nazil etdik.” (Qədr, 1) “Qədr gecəsi min aydan daha xeyirlidir.” (Qədr, 3 ) Qədr gecəsində mələklər və Ruh (Cəbrail) Allahın izni ilə yerə enərək insanların taleyi ilə bağlı məsələləri təqdir edir. “O gecədə mələklər və Ruh Rəblərinin izni ilə hər bir iş üçün enərlər.” (Qədr, 4) Bu gecə sülh, şəfaət və bağışlanma gecəsidir. Qədr gecəsi tövbə etmək, dua etmək, Allahdan bağışlanma diləmək üçün ən münasib və bərəkətli gecədir.
Peyğəmbərimiz (s.ə.s) buyurub: “Kim imanla və savabını yalnız Allahdan gözləyərək Qədr gecəsini ibadətlə keçirərsə, keçmiş günahları bağışlanar”.
Afaq Mirayiq,
Musavat.com
XƏBƏR LENTİ
17 Mart 2025
ŞƏRHLƏRŞƏRH YAZ