Onlayn ictimai-siyasi qəzet
İnfluenserlərdən yeni qaydalara reaksiya: “Mən televiziyayam?”
Reklam daşıyıcılarının əhatə dairəsi genişlənib. Bu, Prezident İlham Əliyevin təsdiqlədiyi “Reklam haqqında” Qanuna dəyişiklikdə əksini tapıb.
Mətbuat Şurası İdarə Heyətinin üzvü, texnobloger Fərid Pərdəşünas sosial şəbəkə hesabında qanuna edilən dəyişikliklə bağlı paylaşım edib.
O bildirib ki, bundan sonra hər bir influenser və ya bloger sosial media hesablarından etdiyi reklamlarda məcburi şəkildə “reklam”, “reklam hüququ əsasında”, “sponsorluq” və ya “tərəfdaşlıq” qeydini əlavə etməlidir:
“Bundan başqa, influenserə özü istifadə etmədiyi məhsulu istifadə edirmiş kimi göstərib reklam etmək qadağan olunur. Hər bir influenser VÖEN sahibi olmalı və hüquqi məlumatlarını qeyd etməlidir.
Azərbaycan qanunvericiliyində influenserlər rəqəmsal platforma təsirçiləri olaraq adlandırıldı. Qanun isə artıq qüvvəyə mindi”.
Musavat.com xəbər verir ki, blogerlər də məsələyə səssiz qalmayıb.
Onlar öz etirazlarını sosial media hesablarında bildiriblər.
İnfluenser Asya Aslanova (AsyaFuad) bildirib ki, şəxsi məlumatların açıq paylaşılmasına qarşıdır:
“Əlbəttə, bilirdik ki, bu, bizə də gələcək. Bunda əsla problem yoxdur. Hələ gec gəldi bizə. Amma niyə şəxsi bir məlumatımız hamıya açıq olmalıdır? Zatən aidiyyəti qurumlar bizim hər bir məlumatımızı görür. Hələ şirkətin də VÖEN seriyasını yazmaq... Məncə, bir qəribəlik var”.
İnfluenser Nəcibə Əhmədi (Nadjiba) instaqramda etirazını bildirib:
“Bütün ölkələrdə reklam paylaşıldıqda “reklam”, “sponsor” və s. yazmaq var. Nə xoş haldır ki, bu təcrübə ölkəmizə gəldi. Amma mən niyə “bio”ma VÖEN hesabımı yazmalıyam? Niyə postumun altına reklamı verən şirkətin VÖEN-ini, poçt adresini yazmalıyam? Niyə hər şeyin ən qəribə versiyasını etməyə çalışırıq? Mən TV kanalıyam?”
Könül
Musavat.com
ƏLAQƏLİ XƏBƏRLƏR
XƏBƏR LENTİ
23 May 2025
ŞƏRHLƏRŞƏRH YAZ