Onlayn ictimai-siyasi qəzet
Hepatit C virusunun hüceyrələrə belə yoluxurmuş
Dünyada milyonlarla insanı əhatə edən hepatit C virusuna qarşı ümidverici addım atılıb. Kopenhagen Universitetinin alimləri hepatit C virusunun hüceyrələrə necə yoluxduğunu açıqlayıblar. Bu mühüm kəşf xəstəliyə qarşı peyvəndin hazırlanmasına yol aça bilər.
Hepatit C dünya üzrə təxminən 58 milyon insanda xroniki iltihaba səbəb olur və hər il 300 min insanın ölümü bu səbəbdən baş verir.
Mövcud müalicələr virusun yayılmasını dayandırmaq üçün kifayət etməsə də, peyvəndin yaradılması səyləri uzun müddətdir ki, davam edirdi. Ancaq virusun hüceyrəyə necə daxil olduğunu tam başa düşməmək bu prosesdə əsas maneə idi. Kopenhagen Universitetində fənlərarası tədqiqat qrupu bu problemin həllində əhəmiyyətli irəliləyiş əldə ediblər.
Kopenhagen Universitetinin dosenti Jannik Prento bildirib ki, ilk dəfə olaraq hepatit C virusunun səthindəki hüceyrələrə bağlanmasına imkan verən zülal kompleksi kəşf edilib: "Bu, virusun hüceyrəyə necə daxil olduğunu başa düşmək üçün mühüm addımdır. Bu yeni məlumat virusun hüceyrələrə daxil olmasını əngəlləyən bir peyvəndin hazırlanmasına imkan verə bilər".
Postdoktoral tədqiqatçı Elias Augestad əlavə edib ki, həmin zülal kompleksinin strukturunu açmaq bizə virusun hüceyrələrə yoluxmasının qarşısını alacaq peyvəndlər hazırlamağa imkan verəcək: "Hepatit C virusunda hüceyrənin bağlanmasını təmin edən zülal kompleksinin quruluşu koronavirusdakı "sünbül zülalı"na bənzəyir. Lakin hepatit C-də bu zülalların funksiyası fərqli olsa da, virusun hüceyrəyə daxil olma mexanizmi eyni şəkildə işləyir".
Bu tədqiqat hepatit C virusuna qarşı peyvəndin hazırlanması üçün mühüm əsas yaradır. Alimlər bu yeni kəşflə immun sisteminin hepatit C virusunun səthinə bağlanacaq və bununla da virusu zərərsizləşdirəcək anticisimlər istehsal etməsini təmin etməyi hədəfləyirlər.
Kopenhagen Universitetinin Sağlamlıq və Tibb Elmləri Fakültəsinin iki şöbəsi ilə birgə aparılan bu araşdırma "Nature" jurnalında dərc olunub./Trend
XƏBƏR LENTİ
23 Noyabr 2024
ŞƏRHLƏRŞƏRH YAZ