Onlayn ictimai-siyasi qəzet
Görünməmiş şaxtalar Türkiyədə meyvəçiliyə böyük zərər vurub
Türkiyədə müşahidə olunan görünməmiş şaxtalar bu ilki mövsümdə üzüm məhsulunun 80 faizə qədərini, ərik, alma və gilas məhsulunun 50 faizini məhv edib.
Musavat.com xəbər verir ki, bunu TASS-a Konya Universitetinin professoru, beynəlxalq kənd təsərrüfatı iqtisadiyyatı üzrə aparıcı ekspertlərdən biri Haluk Gedikoğlu deyib: "Türkiyədə baş verən şaxtalar üzüm məhsulunun təxminən 80 faizinin, ərik, alma və gilas məhsulunun isə 50 faizinin itirilməsinə səbəb olub. Bunun nəticəsində Türkiyə meyvə-tərəvəz istehsalında ciddi itki yaşayacaq. Rusiyaya meyvə-tərəvəz ixracında da azalma gözlənilir".
O bildirib ki, şaxtaya məruz qalan məhsullar haqqında məlumatlar fermerlərin özlərindən alınıb və bu rəqəmlər ölkə miqyasında orta vəziyyəti əks etdirir. Konya Türkiyənin əsas kənd təsərrüfatı bölgələrindən biridir.
Gedikoğlu izah edib ki, ixrac da azalacaq, çünki kifayət qədər həcmdə keyfiyyətli məhsul əldə etmək mümkün olmayacaq: "Soyuq bir çox meyvə və tərəvəzə elə təsir edir ki, məhsulun keyfiyyəti xeyli aşağı düşür. Bundan əlavə, şaxtaların davam edəcəyi gözlənilir. Burada problem ondadır ki, şaxtalar indi çiçək yumurtalıqlarını vurub, onları məhv edib. Buna görə də, artıq belə çiçəklərdən meyvə ala bilməzsən".
Bundan əvvəl Türkiyə Kənd Təsərrüfatı Nazirliyinin rəhbəri İbrahim Yumaklı bildirib ki, pis hava şəraitinin nəticələri ərzaq təhlükəsizliyinə təhlükə yaratmır və əsas kənd təsərrüfatı məhsullarının daxili təchizatına təsir göstərməyəcək. O qeyd edib ki, ərik, üzüm, alma, şaftalı, nektarin yetişdirilən bəzi rayonlar şaxtadan əziyyət çəkir. Yumaklı daha əvvəl məlumat vermişdi ki, mart ayında və xüsusilə aprelin 10-dan 13-nə kimi Türkiyənin bir sıra bölgələrində son 30 ildə rekord şaxtalar qeydə alınıb. Bəzi yerlərdə havanın temperaturu mənfi 15 dərəcəyə enib. Yerli media Türkiyənin 81 vilayətindən 36-da şaxtanın qeydə alındığını, alma, ərik, alça, qoz bağları, üzüm bağları və digər kənd təsərrüfatı bitkilərinə ziyan vurduğunu bildirib.
Musavat.com
XƏBƏR LENTİ
16 Aprel 2025
15 Aprel 2025
ŞƏRHLƏRŞƏRH YAZ