Onlayn ictimai-siyasi qəzet
Azərbaycanda taxıl toxumuna olan tələbatın 70%-ni yerli istehsal ödəyir
Azərbaycanda toxum tələbatının ödənilməsində yerli toxumçular ildən-ilə daha çox paya malik olmağa başlayıblar. Tələbatın təxminən 70 faizdən çoxu yerli toxumçuların payına düşür".
Musavat.com xəbər verir ki, bunu Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Hacıqabul rayonunda təşkil edilən Aqrar İnnovasiya Festivalı zamanı jurnalistlərə açıqlamasında Taxılçılar Assosiasiyasının İdarə heyətinin sədri Niyazi Əmirbəyov deyib.
O bildirib ki, Hacıqabulda ötən il respublika üzrə taxılçılıqda rekord məhsuldarlıq qeydə alınıb, 55 sentner nəticə əldə olunub:
"Hacıqabul iqlim şəraiti və torpağa görə çətin rayondur. Əgər burada belə nəticə əldə edə biliriksə, bu o deməkdir ki, kənd təsərrüfatı sektorunda irəliləyişlər olacaq. Məhsul subsidiyaları mexanizmini xüsusilə vurğulamaq istəyirəm. Azərbaycanda ərzaqlıq buğdanın miqdarının artırılması üçün bu önəmli addımdır. Növbəti illərdə müasir suvarılma sistemlərinin quraşdırılması, yeni texnikanın alınması üçün həvəsləndirici tədbirlər davam etdiriləcək".
N. Əmirbəyov həmçinin, qeyd edib ki, keçən illə müqayisədə bu ilki festival təkcə, toxum sərgi satış yarmarkası formatında deyil, təkmilləşmiş aqrar innovasiya formatında keçirilib:
"Artıq bura gələn fermerlər, kənd təsərrüfatı işçiləri toxum növləri və sortları ilə tanış olmaqla yanaşı, ümumiyyətlə aqrar sektordakı yeniliklərlə, rəqəmsal texnologiyalarla tanış olmağa imkan tapdılar. Dövlət başçısının önümüzdə qoyduğu ən önəmli hədəflərdən biri ərzaq və taxıl təhlükəsizliyinin təmin olunmasıdır. Keyfiyyətli toxum yüksək məhsuldarlıqlı məhsul üçün əsas zəmindir".
Nigar HƏSƏNLİ,
Musavat.com
XƏBƏR LENTİ
24 Noyabr 2024
ŞƏRHLƏRŞƏRH YAZ