Onlayn ictimai-siyasi qəzet
Almaniyada müxalifət dilə gəldi: ukraynalı qaçqınlara yardımı azaldaq
Almaniyanın müxalifət partiyası olan Xristian Demokratlar İttifaqının lideri Fridrix Mers ukraynalı qaçqınlara sosial dəstək siyasətində dəyişiklik edilməsini təklif edib.
Musavat.com UNİAN-a istinadən bildirir ki, o, yeni gələn qaçqınların hazırda mövcud olan "vətəndaşlar üçün yardım" proqramından çıxarılaraq, sığınacaq axtaran şəxslər üçün nəzərdə tutulan daha məhdud maliyyə yardımı çərçivəsinə daxil edilməsini vacib hesab edir.
Mers qeyd edib ki, bu dəyişikliklər Almaniyanın sosial təminat sistemindəki yüklənməni azaltmağa kömək edəcək. Onun fikrincə, bu addım qaçqınların Almaniya cəmiyyətinə inteqrasiyasını da sürətləndirə bilər.
Bundan əlavə, Fridrix Mers peşəkar ixtisasların tanınmasının daha sürətli həyata keçirilməsini və ukraynalı qaçqınların ölkəyə daxil olduqdan dərhal sonra iş icazəsi almasını təklif edib. O, bunun həm qaçqınlar, həm də Almaniya iqtisadiyyatı üçün faydalı olacağını vurğulayıb.
Qeyd edək ki, Almaniya 2022-ci ilin fevralında Ukraynada başlayan müharibədən sonra bir milyondan çox ukraynalı qaçqını qəbul edib. Lakin son dövrlərdə qaçqın axınının yaratdığı maliyyə yükü və inteqrasiya problemləri ilə bağlı müzakirələr ölkədə daha geniş rezonansa səbəb olub. Fridrix Mersin təklifləri bu müzakirələr fonunda müxalifətin mövqeyini daha aydın şəkildə nümayiş etdirir.
XƏBƏR LENTİ
07 Fevral 2025
ŞƏRHLƏRŞƏRH YAZ