Onlayn ictimai-siyasi qəzet
Aİ Suriyaya qarşı sanksiyaları dayandırır
Avropa İttifaqı enerji, nəqliyyat və yenidənqurma sahələrində Suriyaya qarşı tətbiq olunan sanksiyaları dayandırmağa hazırlaşır.
Musavat.com xəbər verir ki, bu barədə “Reuters” agentliyi müvafiq bəyannamə layihəsinə istinadən xəbər verib.
Məlumata görə, Aİ xarici işlər nazirləri fevralın 24-də Brüsseldə keçiriləcək görüşdə Suriya məsələsini müzakirə edəcəklər. Qeyd edilir ki, Aİ hazırda həm Suriya iqtisadiyyatının müxtəlif sektorlarına, həm də bir sıra şəxslərə qarşı sanksiyalar tətbiq edir. Lakin Avropa liderləri, dekabr ayında üsyançı qüvvələrin – İslamçı “Hayat Tahrir əş-Şam” (HTŞ) qruplaşmasının rəhbərliyi altında Bəşər Əsədin hakimiyyətdən uzaqlaşdırılmasından sonra bu məsələyə yenidən baxmağa başlayıblar.
Yanvar ayında Aİ nazirləri Suriyaya qarşı sanksiyaların yüngülləşdirilməsi üçün yol xəritəsi üzərində razılığa gəlsələr də, detalların müzakirəsi açıq qalıb. Yeni bəyannamə layihəsində Aİ Şurasının enerji, nəqliyyat və yenidənqurma sahələrində bəzi məhdudiyyətləri dayandırmaq, eləcə də bu istiqamətdə maliyyə və bank əməliyyatlarını asanlaşdırmaq qərarına gəldiyi vurğulanıb.
Bundan əlavə, Aİ Suriyaya humanitar yardımın çatdırılmasını asanlaşdırmaq üçün humanitar istisnanı müddətsiz olaraq uzadacaq. Sənəddə bildirilir ki, Şura mərhələli yanaşmanı davam etdirəcək və növbəti addım kimi əlavə sanksiyaların dayandırılmasını nəzərdən keçirəcək. Bununla yanaşı, Suriyadakı vəziyyətin yaxından izlənilməsinə əsasən, qəbul edilən qərarların müvafiqliyi qiymətləndiriləcək.
Musavat.com
XƏBƏR LENTİ
21 Fevral 2025
ŞƏRHLƏRŞƏRH YAZ