Onlayn ictimai-siyasi qəzet
Tramp niyə dünyanın texnoloji liderlərini ətrafına toplayıb?
"Donald Tramp nə üçün dünyanın texnoloji liderlərini ətrafına toplayıb, yaxud nə üçün dünənə kimi Trampla düşmən olanlar indi onun ətrafına yığışıblar? Görünən odur ki, ABŞ-ın siyasi establişmenti və dünyanın texnoloji elitası birləşib".
Musavat.com bildirir ki, bu barədə Azərbaycan İnternet Forumunun rəhbəri Osman Gündüz deyib.
Ekspert ötən gün keçirilən inaqurasiyada iştirak edən dünyanın texnoloji liderləri haqda qeyd edib:
"Mark Zukerberq (Meta), Ceff Bezos (Amazon), Sundar Pichai (Google), Tim Kuk (Apple), İlon Mask (Tesla və SpaceX ), Sam Altman (OpenAI), Shou Zi Chew (TikTok) - maraqlıdır ki, bunların bir çoxu Trampın əvvəlki prezidentlik dönəmində, hətta 2023-cü ilədək onunla düşmən münasibətlərində olublar.
Onun sosial hesablarını bağlayıblar, statuslarını və mesajlarını siliblər, hər vasitə ilə onu əngəlləyiblər. Tramp isə onları "xalq düşməni", "saxta xəbər" mənbələri adlandırıb. Ötən dövrlərdə az qalmışdı ki, Tramp bu şirkətlərin hər birini bir neçə yerə bölsün.
İndi isə görünür ki, hamısı bir yerdədirlər. Düşünürəm ki, burada bir neçə məqam ola bilər.
Görünür ki, Tramp qarşısına elə məsələlər qoyub ki, xüsusən də Çinlə və ABŞ-ı gücləndirməklə bağlı, texnoloji liderləri andiçməyə dəvət etməklə o, keçmiş mübahisələri aradan qaldırmaq və gələcəyə yönəlmiş yeni əməkdaşlıq səhifəsi açmaq istəyir".
Osman Gündüzün fikrincə, Donald Tramp texnologiya nəhənglərinin dəstəyi ilə ABŞ-ın dünyada texnologiyalar və innovasiyalar, həmçinin süni intellekt sahəsində liderliyini möhkəmləndirməyi hədəfləyib:
"Eyni zamanda düşünürəm ki, texnoloji liderlərin Trampı ziyarət etməsi həm də bu liderlərin rəhbərlik etdikləri şirkətlərin gələcək taleyinin sual altında olması da mühüm rol oynayıb.
Keçmiş dövrlərdə Tramp administrasiyası texnoloji nəhənglərə qarşı antiinhisar qanunları sərtləşdirmək niyyətində olub və dəfələrlə sosial media platformalarının ifadə azadlığını məhdudlaşdırdığını bildirib.
Donald Tramp əvvəllər bir çox texnoloji şirkətlərin hədsiz böyük səlahiyyətlər əldə etməsindən narahatlığını da ifadə edib.
Güman ki, indi bu texnoloji liderlər Trampın yeni administrasiyası ilə yaxşı münasibət quraraq gələcəkdə bu tənzimləmələrin qarşısını almaq, gələcək riskləri idarə etmək və ya daha yumşaq siyasətlərə nail olmaq niyyətindədir.
Dünənə kimi aralarında soyuq münasibətlər olmasına baxmayaraq, yenidən bir yerdə toparlanmaq həm də təbii ki, parayla, bizneslə bağlıdır.
Bu qlobal texnologiya nəhəngləri texnologiyalar və süni intellekt, enerji, kosmos və kibertəhlükəsizlik kimi strateji sahələrdə ABŞ hökumətindən əhəmiyyətli maliyyə yardımları və subsidiyalar alırlar.
Xatırlayıram ki, ötən dövrlərdə təkcə Ceff Bezosun bulud texnologiyaları ilə bağlı ABŞ hökumətilə 10 milyardlıq bir müqaviləsini Tramp əngəlləmişdi.
Səbəb isə Ceffin sahiblik etdiyi "Vaşinqton Post" qəzetində Tramp əleyhinə olan yazılar idi. İndi texnoloji liderlər Trampın ətrafında birləşməklə bu maliyyə dəstəklərinin davamlılığını təmin etməyə çalışırlar.
Yəni görünən odur ki, qlobal şirkətlərin biznes maraqları, ABŞ-ın yeni dünya düzənində hegemon rolunun gücləndirilməsi, Çin, Avropa və digər bölgələrdə texnoloji rəqabət qabiliyyətini yüksəltmək kimi maraqlar Trampı və texnoloji liderləri bir araya gətirib".
Xalidə Gəray
Musavat.com
XƏBƏR LENTİ
22 Yanvar 2025
21 Yanvar 2025
ŞƏRHLƏRŞƏRH YAZ