Onlayn ictimai-siyasi qəzet
“Nizami: Daxili Aləm” sənədli filminin təqdimat mərasimindən - FOTOLAR
Beynəlxalq Muğam Mərkəzində Azərbaycan və Türkiyə Birgə Əməkdaşlığı Çərçivəsində Hazırlanan “Nizami: Daxili Aləm” adlı sənədli filminin təqdimat mərasimi keçirilib.
Musavat.com xəbər verir ki, film Azərbaycan Respublikası Mədəniyyət Nazirliyinin və Kino Agentliyinin sifarişi ilə Türk kinematoqrafçılar tərəfindən istehsal edilib və Azərbaycan mədəniyyətinin dahi simalarından biri olan Nizami Gəncəviyə həsr olunub.
Tədbirdə dövlət rəsmiləri, mədəniyyət sahəsində fəaliyyət göstərən nüfuzlu şəxslər, Türkiyədən olan nümayəndələr və sənətsevərlər iştirak ediblər. Sənədli filmin nümayişi Azərbaycan və Türkiyə arasında mədəni əməkdaşlıq çərçivəsində həyata keçirilən strateji layihənin parlaq nümunəsi olaraq xüsusi əhəmiyyət kəsb edir.
Bu əməkdaşlıq Prezident İlham Əliyevin 2021-ci ildə imzaladığı sərəncam əsasında başlayıb və Nizami Gəncəvi irsinin beynəlxalq səviyyədə geniş təbliği məqsədini daşıyır. Filmin istehsalında beynəlxalq təcrübəyə malik peşəkar yaradıcı heyət və ekspertlərlə birgə intensiv iş aparılıb.
“Nizami: Daxili Aləm” sənədli filmi Nizaminin fəlsəfi baxışlarını, düşüncə dərinliyini və nadir intellektual zəngin irsini müasir təqdimat üslubu ilə tamaşaçılara çatdırmağı hədəfləyir. Film dahi şairin ideyalarını təkcə, Azərbaycan və Türkiyədə deyil, dünya səviyyəsində də tanıtmaq baxımından əhəmiyyətli addımdır.
Təqdimat mərasimi Azərbaycan və Türkiyənin mədəniyyət sahəsində möhkəmlənən əməkdaşlığının əyani təzahürü olmaqla yanaşı, Nizami Gəncəvi irsinin beynəlxalq müstəvidə tanıdılması üçün mühüm platforma təşkil edir.
Qeyd edək ki, filmin icraçı prodüsseri və rejissoru Atakan Kərküklü, ssenari müəllifi isə Kristina Lin Morellidir.
Atakan K. jurnalistlərə açıqlamasında bildirib ki, çəkilişlər 10-dan çox ölkədə aparılıb və 2 ildən çox vaxt sərf olunub: "Nizami Gəncəvi yaradıcılığı ilə yaxından tanış olduqdan sonra bu layihəni reallaşdırmağa qərar verdik. Ekran əsəri vasitəsilə şairin düşüncələrini, sevgi, həyat, mərhəmət, bəşəri dəyərlər haqqında fikirlərini dünyaya çatdırmaq istəyirik", deyə A.Kərküklü qeyd edib.
Nigar HƏSƏNLİ,
Musavat.com
XƏBƏR LENTİ
24 Dekabr 2024
23 Dekabr 2024
ŞƏRHLƏRŞƏRH YAZ