Onlayn ictimai-siyasi qəzet
Neftin qiyməti 50 dollara düşə bilər - Azərbaycan iqtisadiyyatını nə gözləyir?
ABŞ prezidenti Donald Trampın idxala rüsum qərarı artıq öz təsirlərini göstərməyə başlayıb.
Dünya birjalarında ciddi eniş müşahidə olunur. Aprelin 4-də ABŞ başda olmaqla, dünyanın əsas fond birjalarında indekslər 4-8 faiz arasında enib. Son məlumata görə, “Azeri Light” markalı Azərbaycan neftinin 1 barelinin qiyməti 3,84 ABŞ dolları azalaraq 69,64 ABŞ dolları təşkil edib.
Nəzərə alsaq ki, bu il üçün büdcə neftin 70 dollarlıq qiyməti ilə hesablanıb, dünya bazarında qiymətin bu həddən aşağı düşməsi problemlər yarada bilər.
Musavat.com xəbər verir ki, iqtisadçı Natiq Cəfərli neftin ucuzlaşmasının Azərbaycana təsirlərini şərh edib:
“Azərbaycana təsir edən əsas amil enerji daşıyıcılarının qiymətidir. Neftin qiymətinin düşməsi iqtisadiyyatda yeni problemlər yaradacaq. Hələlik o qədər də təhlükəli vəziyyət yoxdur. Azərbaycan neftinin ortalama qiyməti ilin əvvəlindən 75 dollardan yüksəkdir. Amma dünyanın mənzərəsini görə bilsək, neftin qiymətlərində uzunmüddətli enmələr, enmiş qiymətlərin bazarda qalması mümkündür.
OPEC+ ölkələri belə hasilatın artırılması ilə bağlı qərar qəbul etdilər. Bu tarif qərarla üst-üstə düşdüyü üçün neftin qiyməti bu qədər endi. OPEC+ ölkələri gündəlik hasilatı 450 min barelə yaxın artırmağı planlaşdırırlar. Bu o deməkdir ki, Azərbaycan iqtisadiyyatında yarım ildə neftin qiyməti 70 dollar civarında olacaqsa, ilin ikinci yarısında büdcə parametrlərində qoyduğumuz 70 dollarlıq qiymətdən aşağı ola bilər. Bu vəziyyət bir neçə il davam etsə, neft qiymətinin hətta 50 dollar civarında sabitləşməsi ehtimalı var, o zaman Azərbaycan iqtisadiyyatında problemlər yaşanacaq”.
Nigar HƏSƏNLİ,
Musavat.com
XƏBƏR LENTİ
06 Aprel 2025
05 Aprel 2025
ŞƏRHLƏRŞƏRH YAZ